انا في راسي دايما اكبر كارثة في الدنيا
أنو راجل يجي يتكلم كلام ما كريم عن بنت اي عارفه أنو السمعه ما مكتوب عليها راجل او مرأه بس دوما المرأه عقابها اكبر واكتر من المجتمع الذكوري ومجتمع الاناث علي حد سواء اها في ظل افكاري دي كان انا ونجلاء متفقين نمش مشوار سوا والحاجه الغريبه أنو ميمي ما ماشه معانا جاني قلق بسيط كده بس نجلاء طمنتني قالت لي احنا بنطلع طوالي يا ريم مالك المره دي قلقانه من ناحيتي قلت ليها طيب يا ستي بخرج معاك علي موعدنا لبست لي لبس فضفاض وطلعت معاها اتحججت علي ناس البيت مشيننا ناس ميمي غيرنا ملابسنا وطوالي علي المشوار المريب المره دي تجاوزت الخطوط الحمراء دخلتني بيت كده علي انو بيت وحده قريبتها عاوزه تزورها ما مانعت طوالي خشيت معاها ؛ فجأه سمعت لي صوت شرزمه من الرجال
ضحكه عاليه من وراء الباب بسم الله
قلبي وقع من مكانو واتملكتني خوفه معاها رجفة وصراحه صدمني صوت نجلاء لمن قالت لواحد منهم اي ريم الحكيت ليكم بيها جبتها ليكم والله ما باقي لي الا اجري من مكاني ده .... فجأه جاني ولد اصفراني طويل وجيه
**
الارتباك كان ظاهر في ملامحي نجلاء قالت لا ما تقلقي ما حيحصل ليك شئ والله
اتمنيت اني اكون في حلم ولا خيال
بس وين ده الوااقع الراجل ده قال لي
كلام ما كريم ومافي بنت بترضاهو علي
روحها اي كان وضعها فجأه وانا متهكمه وملامحي متجهمه جاء خاشي مازن
كل العملو ضرب الولد كف وساقني من يدي طلعني من المكان الشارع كلو
خشمو ما فتحو معاي بس انا جد
كنت مستغربه الزول ده الجابو هنا
شنو؟؟؟ وعرف كيف احنا هنا اسئلة كتيره حيرتني لمن سألتو بكل بساطه قال لي
اسمعي ياريم انا سويت البمليهو علي
ضميري و أنا ما مضطر أني اوضح ليك اي
حاجه وتاني مره ما تسمحي لوحده
تسوقك علي هواها في اماكن انتي ما عارفاها وين أول مره احس بدرجه
خطر كبيره لمن حصلت البيت هبه
قالت لي بسم الله تعالي هنا يا ريم انتي كنتي وين انا واختي ما بينا اسرار البساط
احمدي بس كنت خايفه من ردت فعلها ناحيه الكلام الحأقولو ليها حكيت ليها الحاصل بس بطريقتي انا يعني اضفت احداث ومسحت احداث
شكلها ما اقتنعت بكلامي بس انا حلفت ليها
وبكل اسف وكل خجل حلفت وانا عارفه
نفسي كذابة في قعدتنا دي جاءني اخوي وائل قال لي انا مشتاق لأمي ارح نزورها اتصلت عليها تلفون حددنا موعد انو نتلاقي بره البيت طلبنا منها تجينا في
بيت ابونا بس رفضت اها كلها يومين ثلاثه وموعدنا مع امي جاء اتصلت علينا بعد لبسنا قالت ما بتقدر تجي حصل ليها ظرف والله انا بقيت نار منقد من الوجعة حتي امنا الوالدنا وهي عايشة ما
قادرين نلاقيها ونحكي ليها عن همومنا
كسرت بخاطرنا شديد :،(
اليوم داك الليل كلو أنا كنت ببكي
بس معليش شكلو لازم نتعود علي وضع زي ده الصباحيه قررت
اني امشي لنجلاء تفهمني حاجه.
بس في حاجه جواي بتناديني وبتقول لي اوعك تمشي في النهايه قعدت
زهجت من التفكير خلاااص المدرسة قربت
قررت اني انزل مثاق ادبي ده انسب
حاجه لي زوله زي كده والابشع من كده
انا ما خاته اي طموحات لي قدام يعني مخليا نفسي للايام زي ما تجي تجي
نجلاء بعد القصه الحصلت شهور ما لاقيتها الا وقت نزلنا المدرسة
من لاقيتها اعتقد انها كانت المواجهه المفترض تكون بينا يعني لازم المواجهة
يتبع....
