كنت حيرانة طبعا بس مع الاسف ما عندي زول عشان يجي يخطبني او حاجه اعتذر بيها او اي حجه حاسه بروحي مربطه
الدراسة وقربت تنتهي ...... حرب نفسيه عديل وخصوصا انو عباس ده راجل كبير الفارق العمري البينا كان عامل لي هاجس يعني ما ممكن انا شابة صغيره في مقتبل عمري اوافق لي بي راجل قدر ابوي ..... واكتر حاجه محيراني ابوي كيف يوافق عليه بعد عراك شديد مع نفسي كان لازم اقعد مع والدي واوريهو وجهة نظري
لكن صراحه صدمتني ردة فعلو قال لي اسمعي هنا ياريم الراجل ما بقيسوه بعمرو الراجل بأخلاقو والزول ده انا اديتو
كلمه لاني كنت واثق انك ما حتخالفيني الراي وده عشمي فيكي وبعدين يا بنتي انا لازم اعرس ليك انتي واختك .,... وافوق انا شوية لنفسي ما هو مستحيل اقعد كده
بقية عمري بعد طلاق امك ...... ولا انتي ما بتحبي راحتي يا بنتي !!؟؟؟
طبعا غلبني الكلام لوهلة شعرت بأبوي ده بفكر بأنانيه شوية يعني معقول عاوز
يعرس لي انا وهبة عشان يخلص مننا وهو
يتزوج شكلو ما مفتكر انو فكره زوجه الاب بعد زواجنا ما حتأثر علينا طيب لشنو كده حتي لو جاب لينا
زوجه اب من غير ما نتزوج انا وهبه احنا كنا حنوافق ..... قلت ليهو
خير يا ابوي ان شاءالله الفي مرادك يتم
لكن ينتظرني لمن اخلص الجامعه كلها شهرين ....... فترة كئيبة ما عارفة نفسي بفكر في شنو حياة رتيبه مع رجل ما بعرف عنو شئ ولا لأنو خلاص حأخش علي طور المسؤلية ..... في الجوطه الداخليه الحاصلة دي وقفت لي غصة حزن في حلقي ..... اتذكرت امي هسي لو انا
أمي كانت قاعده كانت وقفت معي بس يا خساره ........ هبة اختي ما حتقدر تقول لي
حاجة لانو مصيرها زي مصيري .......
الوقت داك كان انا ومازن مفترض نساعد
حسين عشان نجلاء تسامحو بعد مناقشات ومناوشات مازن اقترح علي حسين انو يتزوج نجلاء ويطلقها عشان لو في شخص تاني عاوز يتزوجها ما يقدر يتكلم فيها يعني يتستر عليها حسين طوالي وافق الذول ده كان مستعد يعمل اي حاجه عشان يبعد عذاب الضمير الهو عايشو بس كان المشكله نجلاء كيف تقتنع لينا باقي لي هي عنيده شوية المهم قعدت مع نجلاء دي لمن حلقي ده نشف من الكلام
اصلو ابت تقتنع لي حاولت مرات ومرات
لمن دخلت هبة اختي في الموضوع .. ...
واقنعناها ظرف اسبوع عملو عقد والموضوع تم بس المعامله حقت نجلاء
كانت قاسية لدرجة انو انسان يستحملها
بتذكر مره قالت ليهو قدامنا انا بكرهك
يا حسين وما تعتقد في يوم انك تقدر تاخد قلبي او تجبرني اني اكن ليك مشاعر حتي لو كانت ذره من احترام والزواج حقنا ده
بس قدام الناس وانا منتظره اليوم الحأطلق منك تصدق انو انا لفظ مطلقه احسن لي واكرم لي من زوجة حسين ياخ نجلاء دي قدر ما حاولت اناقشها في حكايه التعامل دي رفضت تستجيب لي ..... ومصره علي موقفها من غير اي جدال ...... اهلها اقترحو انهم يرحلو مكان تاني عشان لو نجلاء اتطلقت ما يتكلمو فيها ......
خلصنا من معضلة نجلاء والدور جاي علي والايام ماشة سريع والمده دي كلها انا ما حصل قعدت مع عباس ده نهائي
يوم زارني في الجامعه وجلست معاهو
بس ما كنت طايقه اقعد معاهو نهائي
........ قال لي ياريم انتي مالك مقلقة كده
كلها اقل من شهر وحتكوني في عصمتي
من بعيد شايفة مازن واقف قلت بسم الله
ده كمان الجابو شنو وعاوز شنو ما عارفاهو فهم شنو من خلال قعدتي مع عباس ده حاولت اخفي الارتباك الانا
شاعره بيهو ..... المهم قعده واحده مع عباس حددنا عرسنا متين واتونست معاهو شويه ما لقيت لي عيب فيهو علي الاقل لحد اللحظه ..... اها قال لي اوصلك البيت قلت ليهو لا معليش انا حأمش بالموصلات .. ولا اتناقش معي كتير قال لي راحتك يا ستي .........
سبحان الله انا ماشه بس واثقه اني حألاقي مازن في طريقي من لاقيتو قال لي ماشاءالله كمان بقيتي تخلطي !!!
قلت ليهو ده خطيبي يا مازن اسمو عباس
وزواجنا بعد التخرج وانت اول المعازيم
مازن شبك يدينو مع بعض قال لي شنووووو يختي !!؟ ريم انتي جاده ولا دي
لعبة جديده .... قلت ليهو جاده معاك حمدلله ما بينا حاجة والا كنت حأزعل علي فراقك الكلام ده قلتو عمدا عاوزه اشوف ردت فعلو حتكون شنو ..... سرح شوية وقال لي اااه اي صاح حمدلله ..... الله يسعدك يا ريم وان شاءالله عرسك حضور انا ذاتي حأخطب قلت ليهو تمام
من جواي كنت حاسة انو ده ما اخر لقاء
مع الرجل العنيد ده وخطوبتو القالها دي اكيد ندية ليس االا ..... الرابط البينا كان
غريب شديد مازن دايما ما بظهر الا وقت الشده ....... بظهر في اوقات غريبه دائما حمدلله الجامعة خلصت ويوم
زواجي جاء زياد ومعاهو امي بالله امي زي الضيفه .والصادق ولد زياد ده وقف معانا وقفه لمن غلبنا ذاتو نرد ليهو الجميل ده كيف زول
الاصالة جاريه في عروقو ...... نجلاء لمن جات عرسي كانت مغطيه وجهها ونهائي مافتحتو الا لي انا وهبة عشان ماف زول يتكلم فوقها ,,,,, وجوطه شديده اهل امي واهل ابوي ونفوسهم نهائي ما طيبه لبعض
عباره عن ناس بطاعن بالكلام بس واساءت وغايتو انا اكتر حاجه شايله همها كان فراق ا خوي وائل ..........
لأنو عنيد وما بسمع كلامي وانا خلاص حأخليهم وحشوف حياتي كنت شايله هم تقييل شديد في صدري بس مصير القلق ده في يوم ينتهي ....... حمدلله اليوم
المرهق ده انتهي ومفترض اتأهب لحيأه جديده بعيده عن اهلي ..... ويبدأ المشوار
يتبع....
