اهاا بعد عبودي و حمزة طلعوو،، بقينا قاعدين انا و خاله نعمة ، قالت لي ندي ، نداااااااا
طبعا لأنو م اسمي م اتوقعت انها بتقصدني انا ، لمن اشرت لي بي يدها حتي اتلفت ، وابتسمت ليها ودي اول مرة تشوف ابتسامتي ، قالت لي واحلاتي ،، تعالي جيبي المشط اسرح ليكي ، طوالي جريت جبت المشط و قعدت ليهااا ، بتدندن ، دندنة كداا حلوة شديد ، بالجد بستمتع لمن بتدندن ، قالت لسه ما عايزة تتكلمي ؟
فرحيني بسماع صوتك حبيبتي ، و الله انا من جواي بحاول بس م داير يطلع صوتي ،، لمن قاطعنا اتصال ،، بقيت تتكلم بي اهتمام ، و بتقول للمتصل ليهااا :
انتي ضامناهم يا نجوة ؟
طيب من كم لي كم ؟ اهاااااا
و الله المرتب حلو شديد ، لالا انا عتيزة يوم بي يومو او بالاسبوع ..
اهااا ، لالا ما بعيدين شديد ، نص ساعه بالركشه ،، خلاص اتفقتي معاهم علي متين ؟؟ عليك الله يا نجوة انتي واثقه فيهم و عارفاهم كويس ؟؟
اي حتي طبيخ بطبخ ما عندي مشكله ، احسن لي من شغل الدار ، الفقر دي ما داير تشغلني بالصباح و انا شغل الليل و ابيت برا بيتي دا صعب علي والله ،،
خلاص عديلة ، رسليهو لي في رساله ..
و قفلت علي كدااا ، و بقت تدعي ان ربنا يسهل امرهااا ...
اليوم دا م كانت فيهو حاجه مهمة ، بس الاولاد جو وبقينا نتفرج تلفزيون ، و خاله نعمة دي مارقه داخله في البيت ، و كل م تسمع حركة تقوم ناطه ....
بس والكانت خايفه منو فعلاا حصل جاا راجلا داخل ، انا زاتي لمن قمتا ناطة ، و الخاله وقفت اتصنمت في مكانا و انا خايفه منو من موقف امس بالله حتي اولاده كاشين منو وملامحهم اتبدلت من فرح لعبوس و عبودي وحمزة ديل كنكشو في بعض و انا قاعده في السرير ، رجعت لورااا .. و بقيت متابعه دخلة البرندة ..
لمن جا داخل بالله زي القدر ........
و خالة نعمة عيونها علي اولادهاا ،، بس من جا داخل قاليهاا داير اكل و بحمر ليها
قالت لي طيب ، جرت المطبخ و كانت عامله عدس فته دقايق مافي جات داخله بالصينية ، و نادتو ، جاا مارق بي سروال داخلي صغير و فنله حمالات ، قالت ليهو استر نفسك يا ميرغني ، ولا رد عليها و جاا يقعد كداا
شافني ياداب .. جا علي و قاليهااا ، دي بت منو دي ،
حنان اختك ما بتجيب السماحه دي و جاا علي و خت يدو في خدودي و يدو خشنة و مقززة باقيه لي والله ليوم الليله ما انساها و بعاين لي كداا بنظرة توقع الطير من سماهوو ،، بعدت عنو ورجعت لورا اخر السرير
قالت ليهو دي ندي ،، قاليها بت منو ؟؟
سكتت ،، قالت ليهو بت صحبتي بتشتغل معاي في الدار حصلت ليها ظروف ، انجبرت تسافر و مسكتني ليها كم يوم ، قلت تونسني ،، قاليها ودي تاكليها من وين ؟
قالت ليهو بسم الله يا مم ميرغني دا كلام شنوو ؟ الناكزو احنا تاكلو معانا
قاليها اهااا (بصوت زي الرعد) ،،،
مشا من جمبي و خاله نعمة دي واقفه جمبو وهي خايفه من شي معين ..
مششا قعد في الكرسي كدا قصاد صينيه الاكل و عاين للصحن مسافه
و قاليها دا شنوو دا ؟ قالت ليهو فتت عدس و سلطه ، قاليها قربي جااي ، قالت ليهو في شنووو ؟
قاليها " بنهرة كدااا " قلت ليك قربي جاااي
قرربت بتردد كددا ،
قالت ليهو اهااا ، قاليهاا دا اكل تأكليهو لي راجلك ؟ قالت ليهو مالوو ما اكل ، حمدلله نعمة غيرنا ما لاقينهااا ،، قاليها طيب
و شال صحن الفته و طرااااااااااااخ ( بي قوتو كلهااا ) وفي وش خاله نعمة و العدس حارر ،
يا حليلا لحد اللحظة دي صوت صرختا بتردد علي اضاني ،، انا من غير م احس رغم المسافه البيني و بينها الا اني قمت ناطه من السرير جريت عليها صرختااا ، رغم ان اولادها اقرب ليها الا اني وصلته قبلهم وهم من خوفهم من ابوهم ماف واحد حاول يتحرك غير حمزة بس انا سبقتوو ،
و مسكتها باللهفة و هي في الواطه من الخلعه وقعت ، وانا من براءتي طلعت الفنله و بمسح ليها وشهاا و هي تتالم ، والراجل دا يعاين و عندو صرت وش اعوذ بالله ،
و الخاله دي تتأوى و تأه أه = تتألم
كنت نبيهة و عقلي حاضر ، قمت جريت علي الحفاظة اتزكرت ان فيها مويه باردة و جريت فتحتها و عبيت جك
و عبودي ببكي و حمزة دا مستغرب فيني ، دي بتسوي في شنووو ، و راجلاا دخل جوة الاوضه ورزع الباب ،،
حمزة بدا يقوم فيها وانا ماسكة الجك ، لمن قعدناها في طرف السرير و بديت اكب الموية في يدي " الصغيرة " وامسح ليهاا في وشهاا
و عايزة اتكلم ما قادرة لساني تقيل اصلا من وقت الحصل صدمتي فقدتني النطق ( حتعرفو لقدام ) ..
بس دايرة اقوليها اكب ليها من الجك طوالي ما قادرة بقيت بأشر و بحاول اتأتأ = اتمتم
بس ما قادرة بالجد و هي ما فاهماني ، قمت مسكتها من راسا و مديتو لقداام و بقيت اكب ليها ف المويه البارده و عبيت جك تاني و بقيت اكبو ليهاا ، لمن قالت لي خلاص ندويه انا بقيت تمام حبيبتي ،،
مشيت لعبودي مسكتو من يدو و بقيت بأشر ليهوو علي عيونوو ، حمزة قالي دايرة شنوو ، طبعا دي كانت اول مرة الاغيهم= بحاول اتكلم معاهم لاني طبيعي ساكته و فاقدة النطق و زاكرتي مهزوزة ، فاا كانو مستغربني
وانا بأشر ليهم علي صباعي و عينوو
، امه قالت لي قصدتك الماس حق عيونو ؟
هزيت ليها راسي= ايوة
طوالي عبده قام جابو لي ، شلتو منوو
و بقيت بمسح لخاله نعمة في وشهااا ، قالت لي ندي دا لشنو ماليهو لازمة ما بسوي شوي ، ما رديت عليهاا و كملتا مسح
و رجعتا قعدت مكاني و بعاين فيها ، و فعلا لقيت نفسي بنفذ العهد القطعتو بيني و بين نفسي تجاه خاله ، نعمة
بعدها بساعه قالت لينا انتو ساهرتو الليله يلاا قومو نوموو ، جات غطتني وغطت عبودي
قالت لحمزة انت نوم يلاا ، و الصباح ماف طلوع من غير اذني ، هز ليهو راسو=حاضر
و نمناااا ....
و في نص الليل دااك سمعت خاله نعمة تكورك مع راجلاا وشكلة مدورة ، قروش و ما قروش و اتلائمت معاهو قالت ليهو قرش ما عندي يا راجل اخجل علي شنبك ياخ انا سنين بكد الحجر ياخ اخجل ياخ
لمن تكبر و تعجز منو الحيشيلك غير اولادك ديل ، خليك حنين معاهم و علمهم ، لمن يشوفوك بتتعامل بالقسوة دي حيطلعو كيف م تنسا ديل حيكبرو يبقو رجال ...
سكت و قاليهاا والبت دي ؟ قالت ليهو مالك و مال البت انت انا مسؤله عنها و بعدين دي فترة مؤقته ، قاليها م تقعد هناا
قالت ليهو ليه قاعده في راسك ؟ انا المسؤله عنهاا ... قاليها طيب انا بعرف اخليك تطلعي القروش دي كيف .....
استككانة🌚~~
يتبع .......
أنت تقرأ
جبنة في المصيدة
Short Storyوجعتي كانت غير ، بداية حياتي اللي هي اصلا ما يتقال عليها حياة كانت غير ، 9 سنوات كانت بمثابة 90 سنة من الوجع و المعناة ، و اكيد كلنا مرينا بلحظات عرفنا فيها قدر شنو ربنا دا كان رحيم ، كنته متيقنة من التاسعه ان في نور حينور عتمتي ، في بطن الحوت كان...
