جبنة في المصيدة

21

اتخلعتا في تصرفاتا معاي ، قلت ليها خاله لحظة بس ، والله انا م عارفه اقوليكي شنو لكن ديك شقتك واكيد بتحتاجيها ، وانا بس دايرة مبلغ بسيط يعني ،، قالت لي نداااا بطلي نقه و يلا عيب توقفي عم عباس كتير ، يلا حبيبتي اتوكلي ، صحي يا ندا اديني رقمك ،، قلت ليها رقم شنو ؟ قالت لي تلفونك ،، قلت ليها م عندي والله ، لكن ان شاءالله بجيب ،، قالت لي طيب .. 
انتظرتنا لمن اتحركنا و قفلت الباب ودخلت ،، لانه بيتهم قريب لبيتنا وصلتا سرعه نزلتا قدام بيتنا ،، لقيت خاله نعمة دي تبكي و تلطم و عبدالرحمن داك ما بينطق نهائي ، وحمزة بيسال فيهم ما فاهم حاجه ،، قلت لخاله نعمات قومي معاي البكا ما بيقوي ولا بيغير شي ، استغلي حزنك لفرح وانسي وعيشي ما خلاص انتي اتختيتي في الامر الواقع ، قومي معاي ، قالت لي سيبيني يا نداا ، قلت ليها لا ما حاسيبك وانحنا كلنا طالعين مخلين ليها البيت داا يا خالتي ، جمزة قالي انتي مجنونة حنمشي وين ؟ قلت ليهو من متين كان بيهمك ، عايز تمشي ارح ما عايز تمشي خليك هنات انا بسوق خاله نعمة و عبده و عبده زاتو كان ما داير يمشي خليكم هناا ، كفايه ياخ زله و اهانه و قلت ادب ياخ ، انحنا ما صدقنا اتعافت و بلغت الصحه كل يوم والتاني رافعين ليها ضغطهاا ،ياخ حنو عليهاا يااخ ،، قلت ليها قومي معاي ، قالت لي حنمشي وين يا نداا ، قلت ليها بس قومي و اديني المفتاح دا اجدعو ليها في وشها ،، انا داخله الم هدومنا عبدالرحمن قوم علي حيلك ،، قوووم لم حاجاتك انت راجل م تقعد و تلطم زي المطلقات ، قوم علي حيلك ، قومو لمو ملابسكم انا بتكلم معاكم في زول منتظرنا براا ،، خاله نعمة قامت مسكينه بقينا نلملم في الشنط ، و غصباً عنو حمزة بقا بساعدنااا ، لمن انتهيناا و طلعنا ، اعتزرت لعم عباس ،، رفعنا الشنط ،، و واقفين منتظرني جمب العربيه ، مشيت علي باب ناس حنان و برجلي بقيت اضرب في الباب ، لمن فتح لي الزفت ياسين، قلت ليهو نادي امك ،، جات طوالي زي القدر ،، قالت لي خيررر ،، 
ما فتحت خشمي معاها ، جدعت ليها المفتاح في الواطه ، قلت ليها يلا دنقري شيلي ..
و مشيت علي العربيه ، قلت ليهم اركبو اركبو 
..
اتحركنا و بالجد حسيت بيهم واثقين فيني شديد ماشين معاي في امان ، زي م انا ككنت ماشه معاهم في يوم من الايام في امن و امان ،، طول الطريق سكوت و هدوء م عادي ، المسافه شويه بعيده زي ساعه الا ربع لانه مافي زحمة ،، المهم وصلنا 
نزلنا قدام عمارة ، قلت لعم عباس الحته دي اسمها شنو ؟ قالي ال(..)
قلت ليهو حلوة شديد ،، قلت لحمزة و عبده شيلو الشنط عشان عم عباس يمشي اخرناهوو ، قالي لا ،، انا بطلع اوريكي الشقه ، قلت ليهو وصف لي بس الزمن اتاخر تلحق تاخد راحتك ،، قالي لالا م حتكلفني شي ، المهم ،، طلعنا و معاي خاله نعمة الدور التاني ،، شقه ماشاءالله حلوة شديد ، المهم سالت عم عباس من هنا اقدر اصل الشغل كيف ، اركب من وين ولا اسوي شنو ؟ عبده قالي سهله ،، وقفنا في البلكونة و بدا يوصف لي ،، رتبنا امورنا وعم عباس مشاا .. 
كلنا نمنا ما اتناقشنا ولا اي شي ، رغم انهم مستغربين انا كيف قدرت اوفر شقه زي دي بس الحاصل كان اكبرر من الاسئله دي ..
صحيت 7 صليت ، و لقيت خاله نعمة صاحيه ،، لبست لي عبايه و دايرة انزل ، قالت لي ماشة وين ؟ قلت ليها الدكان نشوف لينا حاجه نشرب شاي ببسكويت ،، 
قالت لي انا فتحت التلاجة و كلو لقيت كل حاجه موجودة ، انتي في زول قاعد هنا ؟؟
اتخلعتا و بقيت اتلفت قلت ليها هنا وين ؟
لالاامافي زول غيرناا .. 
قالت لي اسالي الاداك الشقه دي ، قلت ليها تمام و مشيت لبست للشغل ، قلت ليها انتي حتشتغلي الليله ؟ 
قالت لي ايوة ضروري الناس ديل عندهم مناسبة ، قلت ليها يعني شغل كتير عليكي انا بعد انتهي بجي اساعدك ،، قالت لي لالا
خليكي بعيده عن الخدمة فاهمه ،، انتي مكانك في المكاتب و باستني و حضنتني عليها ، قالت لي الله ما يحرمني منك يا رب 

مشيت عملت لي شاي 
وعلي فكرة ( فعلا علاقتي بي حمزة اتغيرت زي الكأنها علاقه كانت اسبوع م اتربينا سواا ، عارفه ان البينا خوة ، بس لو استمرت صداقتنا علي النحو داك بالجد كان دخلنا حتات ما عارفه كان آخرها شنو ،، )

مشيت اقفل النار من البتوجاز ، اظن لفيت العين عكس بقت و انا فكيت الصرخه و بقيت ماسكة راسي و بكورك ، و بصرخ النار لا ، النار النار لالا ، النار لا و بقيت بتزكر لقطات و سامعه صوت صواريخ و كواريكي لمن كنتا صغيرة ،، و بنادي في امي و ببكي ، و في ولد صغير(اكبر مني ) بقول لي انزلي انزلي 
م تخافي سرررعه ،،،، و انا هنا ببكي حمزة بقول لي في شنو حصل شنو فكي يدك من راسك ،، الببكي شنوو ، ندا انتي كويسه ، نداا فوقي يا بت انا جمبك مالك ..
لمن بقيت بتلفت و قعدت في واطه المطبخ و ابكي ، ( الوقت دا خاله نعمة طلعت )
ببكي لاني م عارفه الحصل شنو زمان اسي عايشه بنص زاكرة ، و ما فاهمه حاجه ، حمزة بقول لي ندا قومي في شنوو ، من زنو البزنو علي لمن اتعصبت و كوركت فيهو قلت ليهو يا

خ زح مالك و مالي خليني في حالي ، ابعد

قالي لا ما ببعد ، قومي الببكيكي شنو 
قلت ليهو خليك في حالك ،، زح من وشي ،، (لانه قدامي لمن بشوفو بسترجع احداث من لمن كنت معاهم ، و انا بحاول استجمع جزئيه الحريق دي ) ،، بس بقيت اقوليهو ابعد يا حمزة ، زح من قدامي ،، لمن مشاا ... 
غمضت عيوني و بحاول اجمع الحصل و الولد دا منو ؟؟

استككانة 🌚~

يتبع .......