'YA'YAN MIJI

BABI NA ASHIRIN DA UKU

‍
         'YA'YAN MIJI
‍

Na Umm Asghar

          23

Kusan sati biyu kenan kullum da safe Ummie ke zuwa gida wurin Aisha don koyon girki. Zuwa yanzu kam Alhamdulillahi tana iya shiga kitchen tayi girkin abincin kuma a cinye ana santi. Ita kanta tana jin dadin yadda kullum tayi girki Abdulhalim ke yabawa don tun baya yadda cewa ita keyi har ya yadda don Aunty Aisha tana directing dinta ne kawai amma komai ita keyi aikin Aisha kawai ta saka ido.

A yammacin wata talata ne Aisha na zaune tare da Daddy a parlournshi na sama, yana karatun jaridar daily trust ne ta ranar ita kuma tana kallon tashar Africa magic hausa sai dai ba duka hankalinta ne akan kallon ba tana kula da twins da suke wasa.

Zainab ce ta shigo parlour da sallama sannan ta durkusa tacewa Aisha "Mummy Yaya Farida ce tazo tana parlour a kasa", jim Aisha tayi cikin tunanin lafiya Farida tazo yanzu da yamma don magriba ma ta kusa kuma ita din tun bayan aurensu zuwanta gidan baifi a kirga ba shima kuma bata fin mintuna goma take tafiya.

Tashi tayi ta sauka zuwa parlournsu na kasa. Farida na zaune akan kujera double seater ta hada kai da gwiwa. Koda Aisha ta shiga parlour bata dago ba ga alama bata ma san ta shigo parlourn ba har saida Aishan ta mata magana  sannan ta dago kanta. Fuskarta tayi jajawur alamun taci kuka ta koshi.

Ganinta a haka gaba daya sai Aisha ta rude cewa takeyi "Farida lafiya wani abu ya faru ne ko baki da lafiya, ina maigidan? Me ke faruwa ne, kiyi mini magana mana". Gaba daya Aisha ta manta wacece Farida da irin zaman da sukayi tare yanayin data ganta a ciki ya sanyayar mat da jiki sosai.

Ita dai Farida banda kuka babu abinda takeyi tun Aisha na bin kanta don taji damuwarta harta gaji ta kyaleta. Suna zaune a wurin akayi kiran sallar magriba don haka Aisha tace mata "ko meye yake damunki hakuri zakiyi ki fawwalawa Allah al'amuranki ita wannan rayuwar da kike gani hakuri shine jigonta dolene ki koyi hakurin zama da mutanen da Allah ya hada ki dasu. Yanzu ki tashi kiyi sallah in yaso sai ki samu Daddy kuyi magana".

Bata jira jin amsawar Farida ba ta haya sama don yin sallar magriba. Sai da ta fara shiga parlour Daddy ta dauki 'yanbiyu ta mika su wurin nannysu sannan ta wuce dakinta tayi sallah. Koda ta idar bata tashi ba sai bayan da tayi salkar isha sannan ta fito.

Ta samu su Zainab da Ruqaiya akan table suna jiransu don yin dinner amma har lokacin Daddy bai fito ba. "Zainab je ki kira Farida tazo taci abinci" Aisha tace mata. Tashi tayi ta nufi aiken da akayi mata, dawowa tayi tace mata wai tace ta koshi.

Cewa tayi da yaran suci abincinsu kawai ba tare da sun jira Daddy ba. Bayan sun gama cin abincin ne ta koma sama don ta tambayi Daddy ko akwai abinda yake son ci ta mishi don tunda taga bai sauko dinner ba tasan ba cin abincin zaiyi ba.

Koda ta shiga parlour ta iske shine tare da Farida tana zaune a kasa akan rug din tsakiyar kanta a sunkuye a kasa sai dai hakan bai hana kukanta fitowa ba. Juyawa tayi zata bar parlour Daddy ya tsaida tare da cewa "ya zaki fita ko ba wurina kika zo ba" yace yare da kashe mata ido daya😉.

Murmushi kawai tayi amma sosai Daddy ya bata kunya. Cewa tayi "na gani ne dama baka sauko kayi dinnwr ba shine zan tambayeka ko akwai wani abu da kake so na shirya maka kafin dare yayi". "Thanks for the gesture amma bana bukatar komai sai tea sai ki hada mini da cake, ai akwai ko?" tace "um akwai" ta juya ta bar parlour.

A lokacin da suka zo kwanciya ne Daddy ke fada mata dalilin zuwan Farida wai mijin ne ya korota saboda tana da matsala da matarshi da yaranshi yace bazai iya zama da matar da bata son 'ya'yanshi ba. Ita kuma Farida tace wai yaran ne keyi mata rashin kunya kuma wai uwarsu ke saka su ba kuma tayi magana ba sai yace ita fitinanniya ce bata son zaman lafiya shi yaranshi nada tarbiyya baza suyi mata rashin kunya ba.

Shiru kawai Aisha tayi bata ce komai ba sai dai cikin ranta cewa takeyi alhaki ai kwikwiyo ne hakanan kuma sharri dan aike ne duk inda yaje zai dawowa maishi. Tana tuna yanda Farida ta takura mata a zaman gidannan ta kuma yi sa'a komai tayi daidai ne a wurin Daddy bata laifi yanzu gashi abin ya dawo kanta.

Sai dai bazata iya fitowa ta gayawa Daddy hakan ba don haka tace mishi "to yanzu wanne mataki zaka dauka don kasan bazai yiwu ja yanke hukunci ba tare da kaji ta bakin maigidanta ba ko", yace "hakane nayi tunanin kiranshi muyi magana sai naga dare yayi amma In Sha Allahu gobe zan nemeshi don naji ta bakinshi amma idan har abinda tace mini gaskiya ne shima bai kyauta ba ai yaran yanzu ba abin yarda bane bazai yiwu ka bashi shaida ba farat daya".

Wannan rayuwar da abin mamaki take, shine kawai abinda Aisha ke cewa a cikin ranta don sosai Daddy ya bata mamaki jin cewar da yakeyi wai mijin Farida bai kyauta ba tunda yabi bayan yaranshi bayan shi dinma haka halinshi yake akan yaranshi sam su basa laifi sai dai kai ka saba musu amma badai su suyi maka ba.

Washegari ne bayan Daddy ya dawo daga office mijin Farida yazo. A parlourn bakinshi ya sauki surikinnashi. Sai bayan sun gama gaisawa ne sannan suka fara tattaunawa akan maganar  inda yake shaidawa Daddy cewa Farida bata so ko yaya taga yaranshi sun rabeshi sai ta hau harare -harare tana zare musu ido shine yasa ma ko dakinta basa shiga haka nan kuma ta raina matarshi ko gaisheta batayi gashi sai tace wai bata yadda yayi hulda da matarshi ba shi kuma ya gaya mata cewa yana son matarshi bawai ya daina sonta bane yasa ya aureta shi kuma baiga diya macen da zai aura ya wulakanta Matarshi akanta ba, idan taga bazata iya zama da ita ba to sai dai ita ta fita ta bar mata gidanta.

Shiru Daddy yayi yana saurarenshi sai dai ranshi idan yayi dubu ya baci da rashin arzikin da Farida keyi a gidanta don kuwa shi ta zubarwa da mutunci don duk wanda yaji abinda takeyi a gidanta zaice ne bata samu tarbiyyar arziki ba a gidansu.

Hakuri ya bawa mijinnata yace mishi kuma In Sha Allah hakan bazai kuma faruwa ba don sosai zai ja mata kunne akan hakan. Sun rabu akan cewa sai gobe zata koma gidan.

*****

Kuyi hakuri da wannan wallahi kaina ciwo yakeyi dauriya kawai nayi nayi typing wannan, sannan kuyi hakurin rashin jina kwana biyu bana samun caji ne a wayata kusan kullum a kashe take yini lokacin dazan samu cajin kuma dare yayi.

UMMASGHAR.