رغم التحديات (قلبي لك ج3) للكاتبه أميرة صلاح

29

رن جرس المنزل فنهضت لتفتحه ...لتجده واقف أمامها بكل هيبة ووقار ..
ارتمت بأحضانه وهي تقول معاتبة: لسه فاكر يا أستاذ إن ليك أخت !!.
قبل رأسها ودخلا قائلا: قولت أخليكي مع الأستاذ شوية ..بدل م يقول إني خدتك منه !!.
هتف حازم باستنكار: بالله عليك تسيب الأستاذ في حاله.!!
ضحك إياس بقوة وهو يقول: هو انت لحقت !!؟
هتف حازم بضيق : لم نفسك يالا ...
هتفت بيريهان مخلّصة: بس خلاص .. انتوا كل م تشوفوا بعض هتتخانقوا !!
احتضن إياس كتفيها ليجلسا قائلا: عاملة ايه !!؟.
ابتسمت بيري برضا: الحمدلله .. بس انت وحشتني .. وماما مشوفتهاش غير مرة واحدة !!!
– معلش يا حبيبتي .. بس مشكلة سمر وأمها لسه متحلتش !!.
تساءلت بيري بحذر: طب هي طنط صفية لسه مش موافقة علي السفر مع سمر ومراد،!!
تنهد إياس بقوة قائلا: سيبك منهم .. المهم انتي !!
ابتسمت بخجل وهي تقول بفرحة: مبسوطة اوي يا أياس ... كلهم بيحبوني وانا كمان بحبهم .. وطنط مني بتعاملني زي بناتها بالظبط وبرضو عمو مصطفى ..؟
ضحك إياس قائلا: مش مرات الغالي !!
أتت الصغيرة ندي قائلة: مامي ... فين العروثة (العروسة) بتاعتي ؟؟
ضحك إياس بقوة وهو يقول: عروثه ... هو انا هلاقيها منك ولا من التاني اللي بيتكلم عربي ملخبط ..
ضحكت بيري وهي تقول: لو سمحت متتريقش علي نودي .. نودي دي عسل !!.
أخرجت له لسانها مغيظة وهي تقول : عثل أنا ...
احتضنت ندي بيريهان وهي تقول : حبيبتي يا مامي ..
ابتسم إياس براحة وهو يجد بيريهان قد تكيفت مع الوضع هنا .. خاصة الصغيرة التي كانت ملازمة لياسمين فقط لتقول كلمة ماما كالبقية ...
••••••••••••••••
نزل إياس للأسفل حيث شقة حماه .. واصطدم بجلال الذي ما آن رآه عاد أدراجه مرة أخرى ...
ضحكت بيريهان: هو انت عملت ايه !؟؟
هتف إياس ببراءة: ولا أعرفه حتي !!.
فتحت إبان الباب لتحتضن حازم قائلة: يا مرحبا بالعريس!!
ضحك حازم وهو يقول: هو مين فينا بقا ؟؟
ضحكت إبان بخجل وهي تقول: عديها بقا ...
احتضنت مني بيري وهي تقول: أهلا بمرات الغالي ..
هتفت إبان غامزة: ماشية معاك يا عم ..
احتضنتها بتول وهي تقول: فرصة وجاتلها ..
ضحكت بيري وهي تقول: محسسني انكم مش زيي ..
هتفت إبان :قصدك فريدة .. فريدة عندها 3 مش واحد !!
ضحكت بيري قائلة: الله انتي بتقري عليا صح،،..!؟
ضحكت بتول هي الأخرى قائلة: سيبك منها.. وقوليلي مسافرين امتي !؟؟
– مش عارفة .. بس تقريبا بعد يومين ولا حاجة !
تساءلت إبان : مسافرين فين !!؟
هتفت بيري: شرم ..!
فغرت فاها بصدمة ورمشت مرات عدة لتستوعب الكلمة ،..
هزتها بيري قائلة،: إبان .. بت روحتي فين،!!؟.
انتبهت لها إبان : ها .. بتقولي ايه ؟
هتفت بتول بقلق: روحتي فين .. مالك ؟!
أغمضت عينيها وهي تقول: مفيش .
وبعد مدة ..
كان الجميع يلتف حول طاولة الطعام يترأسها مصطفى ..
وبعد مدة انتهوا من طعامهم مع شرود إبان ...
°°°°°°°°°
جلست جانب زوجها وعقلها مازال يفكر ويعيد إليها ذكرياتها ...
انتبه لها فهمس في أذنها قائلا : ركزنا معانا دلوقتي وبعدين أعرف مالك !!؟
هزت رأسها بالإيجاب وهي تعود إليهم .. ثانية ..
هتف حازم : بقولك ايه يا بتول .. اجلي سفركم شوية ..
هتفت بتول بحزن: كان نفسي والله .. بس أمجد إجازته مش كتير وهو حابب يزور مامته فيهم .. وكمان قبل ولادة ياسمين دانا م صدقت اقنعتها ...
هتف إياس بتساؤل: وانتوا مسافرين فين يا حازم ،!!؟
– شرم ،.!
نظر ناحية زوجته التي أطرقت رأسها وهي تعض علي شفتيها ...
هز رأسه متفهما وقد عرف الآن ما بها ..
تساءل إياس: علي امتي ان شاء الله كده !!؟
– كنت ناوي علي بكرة .. بس بتول مصرة تسافر وياسمين خايفة فلازم حد يكون جمبها ...
هتف مني باستنكار: وانت مأجل سفرك عشان ياسمين ؟؟.. ملكش دعوة انت بيها انا لسه عايشة !!.
هتف حازم مبررا: مش قصدي حاجة والله يا ماما ..بس هي علطول طالباني في التليفون انا او بيري وكانت بتول معانا احيانا خصوصا مع انشغال يوسف عشان يلحق يخلص قبل موعد ولادتها .. وكمان طنط فريدة ومشكلة سمر !!..
مني باقتراح: طب م تخليها تيجي هنا .. لحد م تولد او جوزها يخلص شغله .؟!.
هتف حازم بضيق خفي : قولتلها كده .. قالت يوسف رافض الفكرة .. وكمان طنط فريدة رفضت .. والدكتورة قالت انها كويسة وده توتر حمل وتجربة لاول مرة،..
تنهدت مني بقلة حيلة: خلاص انا ابقي اروحلها وكمان إبان معايا اهي !!
فغرت فاها بصدمة ونظرت لزوجها الذي أومأ لها موافقاً ..
هتفت بتول : طب خلاص امشي انا بقا عشان الحق ارتب الشنط!!
هتفت إبان بغيظ: امشي يا بتول الله يسهلك !!
ضحكت بتول وهي تخرج لها لسانها مغيظة واتجهت تغادر المنزل ،...
نهض إياس وهو يقول: طب نمشي احنا بقا عشان الحق الاجتماع !!
نهضت بيري وهي تقول: خليك شوية معايا،!!
اختضنها إياس قائلا: مرة تانية ان شاء الله .. الشغل دلوقتي عليا بعد م سيف باشا احال نفسه للمعاش...
ضحكت بيري وهي تقول: الله يكون في عونك يا حبيبي
قبل رأسها وأمسك بيد زوجته ليغادرا بعدما سلمت علي الجميع ..
•••••••••••••••••••
في السيارة.
كتفت يديها أمامها وهي تقول: اجتماع ايه ده ان شاء الله،!!؟.
نظر نحوها بطرف عينه وهو يقول: م خلاص بقا السفرية طارت .. ارجع اشوف اكل عيشي ..
زمت شفتيها بضيق وهي تقول: وارجع انا لوحدي تاني ،!!
أمسك يدها يرفعها مقبلا : طب ايه رأيك تيجي معايا . هتنفعيني !.
ضربته علي كتفه بيدها الحرة قائلة: مصلحة يعني !!.؟
التفت ليدير محرك السيارة قائلا: اعتبريها كده !!
ضحكت بقوة وهي تقول: تدفع كام،!!؟
ضحك هو الآخر بعدما تذكر ما تشير إليه قائلا: لا دلوقتي انتي اللي عايزة .. يعني هتدفعي !!
كتفت يديها أمامها وهي تقول بغيظ: يعني مش هقبض خالص !!.
انطلق بالسيارة قائلا: معلش تتعوض ..
نظرت نحوه بغيظ وأشاحت بوجهها بعيدا عنه في حنق !!
**************
في القصر
وقفت ياسمين بجوار سمر والتي تصر علي الذهاب لوالدتها .. بعدما رفضت الأخيرة رؤيتها ..
هتفت ياسمين بمواساة: خلاص يا سمر .. سيبيها دلوقتي ،!
هتفت سمر ببكاء: مش هقدر يا ياسمين .. دي ممكن تمشي وتسيبني هنا !!
ربتت علي كتفها وهي تقول: معلش سيبيها دلوقتي .. واحنا بنحاول مع باسم وباباكي يمكن يوافقوا يرجعوها !!
ازداد بكائها وهي تقول: مش هيوافقوا باسم عندي وبابا لا يمكن يرجعها !!.. خصوصا بعد ما كان ناوي يطلقها!!
تنهدت ياسمين بحزن وشفقة عليها .. والديها تفرقا بعد عمر طويل وخلال فترة في الحياة كل شخص يظل مع الآخر طويلا تحسبا لفقدان أحدهما ...لقد أخطأت صفية وعوقبت بالفناء عن عائلتها وزوجها يرفض رؤيتها وكذلك ابنها الذي صرخ في وجهها في القسم بعدما عرف كل الحقائق ومساعدتها لشريف في اختطاف إبان ومحاولة قتل إياس ... بأنه لا يريد رؤيتها بعد ذلك .. وأنها تنسي بأنه لها ابن من الأساس ..
وسمر مسكينة حقا .. ربما تعاقب علي ما فعلته سابقا مع إياس وإبان ...ومحاولة تفريقهما بمساعدة والدتها بالطبع .. هاهي تعاني من التشتت ...
أمسكت بيدها تتجهان ناحية الداخل ...
هتفت فريدة بلهفة: سمر يا حبيبتي .. انتي كنتي رايحة علي فين ؟!.
أطرقت سمر رأسها بخجل وهي تقول: كنت رايحة لماما .. بس كلمتها ورفضت تشوفني ،!!
ربتت علي شعرها بحنو وهي تقول: معلش يا حبيبتي .. سيبيها علي راحتها .. دلوقتي هي محتاجة تقعد لوحدها .
هزت رأسها بآلية وقد زاد بكائها عندما احتضنتها فريدة ..
°°°°°°°°°°°°°°°°°°°°°°°°°°°°°°
وبعد شهر ...
جلست ياسمين تعد أوراق المحكمة ليوسف عندما انتابها ألم تحت معدتها ... صرخت فجأة عاليا جعلت يوسف يخرج من الحمام عاريا يلف منشفة حول خصره ..
ركض ناحيتها وهي تمسك ببطنها وتصرخ: ياسمين .. مالك،!؟؟
صرخت ياسمين وهي تقول: شكلي ..شكلي بولد .. الحقني يا يوسف !!
هتف يوسف بغباء: طب اعمل ايه،؟؟!
صرخت ياسمين في وجهه وهي تقول: ماما .. هاتلي ماما،..
ارتدي بنطال وتيشرت ونزل لوالدته بعدما اتصل بالإسعاف ..التي كانت تصعد بعدما سمعت صراخها ..
هتف يوسف بقلق: ياسمين بتولد .. مش عارف اعمل ايه ؟
– اتصلت بالإسعاف ؟؟!
– ايوة اتصلت وهما جايين في الطريق .
أكملت فريدة الصعود قائلة : اتصل بحماتك تحصلنا ع المستشفي!!
أخرج هاتفه وهو يقول: حاضر حاضر !
°°°°°°°°°°°°°°°°°°
ظل يجيب الردهة ذهابا وإيابا وقلبه يدق بعنف .. لا يصدق بأنها في الداخل وهو يقف منتظرا ..
كم يشعر بها وبصراخها يمزق قلبه أشلاء ..
ربت إياس علي كتفه قائلا: هدي نفسك يا يوسف .. ان شاء الله هيبقوا كويسين !!
هتفت فريدة وهي تشير ناحية زوجته: تعالي هدي مراتك الأول عشان انا مش ناقصة قلق !!..
نظر ناحية زوجته التي كانت بعيدة بعض الشئ وتبكي ..
احتضنها قائلا: اهدي يا قلبي .. انا مش واخد حبوب المهدئ عشان اخلصهم عليكم !!
ضربته بغيظ : هتبقي كويسة صح !!؟.
أبعدها عنه وهو يقول غامزا: ان شاء الله .. عقبالك بقا !!!
ضحكت وسط دموعها وهي تقول: يارب نجيها !!
هتفت بيري بعلو صوتها وهي تسمع صوت الصغير: ولدت .. ياسمين ولدت ..
ركض يوسف ناحية الباب قائلا: طب هي كويسة ؟؟
ضحكت بيري قائلة: لا ده لسه نمبر وان،!!
هتف يوسف بغيظ: بت امشي من وشي !!
ضحكت بيري بعلو صوتها وهي تقول: الله مش انت الي جبت تؤام ،،.
هتفت يوسف لحازم : مشيها من هنا !!
أمسك حازم يد زوجته قائلا: تعالي يا حبيبتي .. مش ناقص هو !!
نظرت نحوه بضيق : مانا كمان متوترة وخايفة وبحاول اخفف الجو شوية،!!
هتف يوسف وهو يشير بيديه: انصرفي يا بيري ..
خرج الطبيب من الغرفة فركض ناحيته قائلا: مراتي فين !؟
ضحك الطبيب قائلا: هي كويسة .. بس بنت حضرتك متعبة شوية !!
ضحك إياس قائلا: هي لحقت،..؟؟
هتف الطبيب : مكنتش عايزة تسيب الكم بتاعي ...!
ضحك إياس قائلا: اشرب بقا يا جو !!
هتفت فريدة : إياس .. بالراحة شوية !!
ضم زوجته وهو يقول: قال عيال قال !!
دخل يوسف للغرفة وترك إياس ضحكاته تتبعه ..
°°°°°°°°°°°°°°°°°°°°
حمل يوسف الصغيرة التي تشبثت به بكل قوتها ورفضت تركه منذ حملها .. تقريبا منذ أكثر من نصف ساعة ..
بينما إياس تولي حمل الصغير ..وإبان تداعبه برقة ...
فتحت ياسمين عينيها بتعب وهي تمتم: آه .. ولادي يا يوسف !!.
أشار لإبان بأن تعطيها الصغير حتى يفك أسره من ابنته ..
اقترب إياس منه يداعب الصغيرة التي استجابت له وحملها منه لتتشبث به هذه المرة ....
ضحك إياس قائلا: ايه البت دي .. انا خايف لتعمل كده لما تكبر وتبقي شبه العلقة في حياة جوزها ..
هتفت ياسمين بغضب: هات بنتي يابن فريدة .. وملكش دعوة بيها!!
أخذتها منه إبان ويبدو أنها جائعة لتعطيها لوالدتها ... بينما أمسكت إبان زوجها وخرجا من الغرفة حتى تطعم ياسمين طفليها!!
هتفت إبان بحنق: إياس خف عليها شوية .. عشان تقدر ترضع العيال ..
همس في أذنها بشئ فابتعدت عنه بصدمة !: دلوقتي ؟؟!
ضحك إياس : دلوقتي ع السريع بما أنها خلاص ولدت ... يلا بقا !!.
– طب هقول لماما!!
– لا طبعا .. مش عايز حد يعرف احنا فين .. ابقي نرجعلهم بالعيال !!
ضحكت إبان وهي تقول: عيال ؟؟!..
أمسك بيدها قائلا: حاليا محتاج إبان .. شيلي الجزء بتاع ماربيلا وبنت الشافعي وهاتيلي إبان !!
**************
هتفت بتول وهي تحتضن ياسمين: مبروك يا حبيبتي الف مبروك !!
نزلت لمستوي ابنها وهي تريه الصغيرة : شايف .. عينيها زرقا ما شاء الله .. تتجوزها يا زيزو،!!؟
هتف الصغير زياد نافيا :لا . بيلا !
ضحكت ياسمين وهي تقول: جدع يا زيزو .. بنتي محدش هيتجوزها أصلا!!
نظرت نحوها وهي تقول بعند : عقبال م يكبر يغير رأيه !!.
°°°°°°°°°°°°°
حمل مصطفى الصغيرة فيما حمل سيف الصغير قريري العين ..
هتف مصطفى: ما شاء الله .. يتربوا في عزك يا يوسف .. ويباركلك فيهم !!
– الله يبارك في حضرتك يا عمي !!
سيف بتساؤل: هتسميه ايه بقا !؟
ابتسم يوسف قائلا: فريدة وآسر !!
احتضنه سيف قائلا: ربنا يباركلك فيهم ..
– الله يبارك فيك يا بابا .. ويطولنا في عمرك !!
أتت ياسمين وهي تحمل صينية المشروبات تضعها علي الطاولة أمامهم ....
قبل مصطفى رأسها قائلا: مبروك يابنتي !!
– الله يبارك فيك يا عمو!!
وكذلك احتضنها سيف قائلا: مبروك يا ياسمين .. ربيهم كويس !!
تنحنح يوسف قائلا: احم .. احم ..
نظر نحوه سيف قائلا: انا قاصدك علي فكرة ...!
أطرق رأسه خجلا ، فيما قالت ياسمين: متخافش يا عمي .. ربنا يباركلهم في ابوهم ..
– ربنا يجعلهم ذرية صالحة ..!
*************
وسط البحر
حيث أوقف إياس اليخت الذي استقله ومعه زوجته .. تعويضا لها علي شهر العسل !!
وبعد خطوة تأخرت شهرا كاملا بسبب سفر الجميع وتركهم لهما وحدهما مع ياسمين التي كانت تعاني رهبة التجربة الأولي ومع ولادتها انطلق بها إلي هنا حيث اليخت خاصته ... والذي اشتراه لهذا الغرض فقط ..!
وقفت تنظر للبحر وهي تراقب أمواجه المتلاحقة بآلية الخالق ...
شعرت بيديه وهي تحيط خصرها يشتم عبيرها الذي امتزج مع رائحة البحر .. وأصبح لا يقاوم ..
هتفت إبان وهي تنظر للبعيد: كان نفسي من زمان أشوف وسط البحر !!
ضحك إياس وهو يقول: انتي ليه محسساني انه وسط البلد !!.
أبعدته عنها وهي تقول: اوعي !!
أعادها لوضعيتها قائلا: خلاص .. واديكي يا ستي شوفتي البحر كله ..
أراحت رأسها علي صدره قائلة : انا بحبك اوي يا إياس !!
طبع قبلة علي عنقها قائلا: وإياس بيعشقك يا قلبه !!
تشبثت بيديه أكثر وهي تريح رأسها علي صدره تبتسم برضا وحب ...
تفتخر .. بأنها عاشقة له ... زوجها يحبها بل ويعشقها أيضا ..
حب من نوع آخر .. ربما يكون أسطورة من الأساطير ..
وكم تفتخر ..وستحكي لأولادها قصة العشق التي جمعتها بوالدهم ...
************
حملت ياسمين الصغيرة ترضعها وبعدها تري أخيها الذي مازال نائما ،....
ارتمي يوسف جانبها علي الفراش بإرهاق ..
كانت ياسمين نصف نائمة ولم تلاحظه بل شعرت بحركة جانبها ...
وجهت نظرها إليها وهي تقول: نامي يا فيرو .. الله يكرمك !!.
التفتت ليوسف دون رؤية: يوسف .. قوم العب مع فريدة !!
غمغم نائماً وهو يقول: سيبيني أنام .. واوعي تصحيني !!
زفرت بضيق وهي تقول: نام ياخويا نام ..
حملت الصغيرة ونهضت من مكانها وخرجت من الغرفة ...
جلست علي الأريكة بعدما أعطت الصغيرة لفريدة ...
هتفت فريدة بشفقة: قومي نامي يا حبيبتي .. ارتاحي شكلك تعبان خالص ..
تثاءبت ياسمين وهي تقول: خلي بالك منها .. لما تنام ابقي حطيها في سريرها ...
نهضت بعدما أنهت حديثها ثم التفتت فجأة وهي تقول: أمال إياس وإبان فين .. انا مشوفتهمش من يوم ما كنت في المستشفي !!؟
ضحكت فريدة وهي تقول: إبان وإياس طلعوا رحلة فين معرفش !!؟
هزت رأسها بتفهم ومن ثم أكملت طريقها للأعلي !!...
عادت فريدة بنظريها للصغيرة تداعبها في سعادة ...
تعيش فرحتها مع أولاد ابنها الأكبر ... سعادة حرمت منها في أدم .. لكنها تعيشها الآن وبكاملها .. .
**********
وضعت الكتاب جانبا لتضع رأسها علي كتفه وهو ينهي عمله،..
هتفت إبان بضيق: احنا ايه اللي رجعنا من هناك ..؟
أمسك رأسها ليريح ظهره علي الأريكة قائلا. : نرجع تاني إن شاء الله ..
تأففت بضجر قائلة : أنا خلاص زهقت .. أنا هسحب ورقي !!
ضحك إياس قائلا: دانتي لسه مكملتيش شهر حتى .. لحقتي تزهقي ..!.. ع العموم عامل حسابي أبوكي قالي ..
نهض من مكانه وغاب لحظات ثم عاد بعدها ....
جلس أمامها وهو يضع صندوق صغير علي الطاولة أمامها ..
أمسكت به تفتحه لتخرج منه علبة مليئة بالشيكولا اللذيذة ..
صفقت بحماس قائلة : الله .. حلوة أوي ..
نهضت من مكانه تحتضنه بقوة ارتد للخلف ..
أمسك بها يبعدها عنه قائلا: وكل شهر ليكي مفاجأة !
قبلته قائلة : حبيبي يا إيسو ..
جلست علي قدميه والتقطت العلبة لتأكل منها وتطعمه ..
وضع نصف الشيكولا في فمها قائلا بمكر : الا أخبار الكرز إيه في السوق ..
ضحكت بانطلاق رقصت لها دقات قلبه وهي تقول: الكرز شاحح اليومين دول !!
ضحك إياس قائلا : طب خلصي يلا .. عشان عايز أنام ..
أمسكت بالكتاب ووضعته علي صدره قائلة: افتح صفحة 24 واقراها كويس عشان تشرحهالي ...
هتف أياس بغيظ : نفسي تعرفي إني ساقط 6 ابتدائي بس انتي رافضة ...
كتمت ضحكتها قائلة: ملييش دعوة .. عشان أنا كمان عايزة أنام ...
ألقي الكتاب علي طول ذراعه ونهض وهو يحملها قائلا: مش هتفرق لو اتأخرتي كام سنة صح؟!
ألقت العلبة قائلة: لا عادي .. مش ورايا حاجة !!