نلتزم مع بعضنا (للبنات بس)✋

السيرة النبويه ❤️🌸

🔅الحلقة السادسة 5🔅

((ميلاد النبي عليه أفضل الصلاة والسلام))

يلا صلو على النبى 💗

ونكمل كلامنا مع ميلاد النبى. عليه الصلاه والسلام ..و أول واحده كان ليها الشرف فى ضم النبى ، أجمل مخلوق صلى الله عليه وسلم هى أم أيمن وأسمها الحقيقى "بركه الحبشيه "مربيه النبى صلى الله عليه و سلم..
و عشان كده كانت من أكتر النساء أرتباطآ بالنبى ﷺ.بركه كانت جاريه عند عبد الله أبو النبى عليه الصلاه والسلام وبعد وفاه عبد الله فضلت بركه تخدم آمنه ..

جه عبد المطلب جد النبى صلى الله عليه وسلم و شاف أجمل مخلوق بين يديه .. كان مولود يأخد العين من الجمال ♡. فيحضنه عبد المطلب و يضمه لصدره ويأخده ويطوف بيه حوالين الكعبه ويدخل جوف الكعبه ويرفع إيده و يحمد ربنا و يخرج بيه من جوف الكعبه ويطوف بيه مرة كمان ويبص للسماء ويقول يااارب سأسميه محمد ♡ وكان أسم جديد والعرب مش متعوده عليه .ويرجع لآمنه ويقول لها : سميته محمد.. فتقول ..ليه ؟ فيقول: ليحمده أهل الأرض ويحمده أهل السماء ♡ :') ..

و يفضل المولود مع أمه آمنه ولكن بتحصل مشكله ..آمنه مش قادره ترضعه.
وكانت مكه مليانه أوبئه وأخدت قريش عاده أن أى رضيع يتولد فى الكام سنه اللى فيهم وباء..بتيجى قبيله لمكه أسمها بنى سعد فيها مرضعات بالأجر، كل مرضعه بتاخد طفل بره مكه..بعيد عن الوباء ويكون ده لمده سنتين وتاخد أجر عليه وبعد ما تفطم الولد، بترجعه لأهله وتاخد مبلغ تانى بعد ما تسلم الولد ليهم.

وبعد أيام من ميلاد النبى ﷺجت قبيله بنى سعد و كانت من بينهم حليمه السعديه نسبه لبنى سعد وهيه فعلا هيسعدها ربنا عز وجل بشرف إرضاع النبى ﷺ..وصلت القبيله لمكه وكل مرضعه بدأت تاخد طفل.. وكانت المرضعه الشاطره هيه اللى تلحق تاخد ولد أهله أغنيااا ..

و أخر وحده وصلت كانت حليمه لأنها كانت فقيره وكانت بتركب على "أنثى حمار" ضعيف و بطئ جدا فوصلت متأخر لمكه .. حليمه بتقول أنها بمجرد ما وصلت لاقت كل واحده من أصاحبها خدت رضيع.. ومتبقاش إلا طفل واحد! و هو النبى ﷺ..

و أن محمد ﷺأتعرض على كل المرضعات ومفيش ولا واحده رضيت تاخده ..يا ترى ليه ؟.. وإيه اللى حيحصل لما تقرر حليمه تاخده.

صلوا عليه وسلموا تسليما 😍
💗💗💗💗💗💗

🔅 الحلقة السادسة 6🔅

يلا صلو على النبى

وقفنا المره اللى فاتت و أحترنا اوى أن مفيش ولا مرضعه من مرضعات بنى سعد رضيت
تاخد النبى ﷺ..طب ليه؟ .. لأن محمد ﷺ يتيم :') ..

كل مرضعه قالت هعمل ايه بولد يتيم.. مش هينفعنى..لأن اللى بيكرم المرضعه أبو الرضيع..بيدينى فلوس أكتر عشان أخد بالى من إبنه أكتر.. طب جده هيهتم أنه يدينى زياده! وللا هيدينى الأجر وبس؟..فرفضت المرضعات أنها تاخد النبى ﷺ..
وحليمه لاقت أن متبقاش غير محمد ﷺ.
..فقالت هعمل إيه بيتيم عبد المطلب.. فرجعت لزوجها وقالت له : دلوقتى كل وحده من صحابى خدت رضيع و أنا مش حابه أرجع بينهم من غير رضيع..

أعمل إيه؟ آخد يتيم عبد المطلب؟
فجوزها قالها: خديه لعل ربنا يجعل فيه بركه..
وفعلا حليمه خدت النبى عليه الصلاه والسلام..وبتقول أنى بمجرد إنى ضميت محمدﷺ لصدرى أتملى صدرى باللبن.. معرفش إزاى .. و مكنش أصلا عندى نقطه لبن بسبب الفقر و قله الأكل.. وفضل محمد ﷺ يرضع و يرضع .. كان جعان أوى .. و أنا مش عارفه منين كل اللبن ده..

وبعد كده حليمه قالت لزوجها: جرب شوف فى لبن فى الشاه بتاعتنا وللا لأ.. فقال لها : يا حليمه انتى عارفه انها مفيهاش لبن.. قالتله : جرب ممكن تلاقى ولو حبه نقط..

فلما راح لاقى فى لبن فى الناقه وفضل يحلب الناقه لحد ما اتملا كل الطبق بلبن كتير اوى .. و راح لحليمه مش مصدق نفسه ..إيه ده! ..إزاى ده بيحصل يا حليمه؟ قالت له مش عارفه .. لعل ربنا أدانا نسمه مباركه ..رضيع عبد المطلب ده مش عادى..

وبتقول حليمه : شربت لبن وشرب زوجى وشبع محمد ﷺ وأبنى كمان... ونمنا مرتاحين اوى
و والله ما كنا بنقدر ننام قبل كده من الجوع ومن عياط ابنى بسبب شده الجوع.
حليمه مرضعه النبى ﷺ بتقول قضينا يوم فى مكه وصحينا الصبح عشان نرجع لبنى سعد بالأطفال الرضع.

فركبت على الحمار بتاعى..فلاقيت الحمار بيجرى بيجرى وبيسابق نوق اصحابى ..فقالولى : حليمه ايه ده .. مش ده نفس الحمار اللى جيتى بيه لمكه؟ فقالت ايوه.. قالولها : مش ممكن .. ده كان بطئ جدا ومش قادر يمشى ..حتى وصلتى بعدينا..وكنتى آخر واحده!!

قالت: لأ ..دى هيه لكنى احمل عليها رضيع مبارك...
والحمد لله وصلوا لبنى سعد وتقول حليمه كنت بحب محمد ﷺ أويييي .. وكان بيكبر فى اليوم الواحد قد اللى بيكبره اى طفل فى شهر ويكبر فى الشهر قد اللى اى طفل بيكبره فى سنه.. فكان بيكبر بسرعه أوى
وحليمه لاحظت ده رغم أن اصلا العرب كانوا بيكبروا بسرعه فى الباديه ..ومعروف أن جو الصحرا بيساعد على ده لكن النبى عليه الصلاه والسلام كان برده دايما مختلف عن الأطفال التانيين..
و بتقول حليمه كنت انا وزوجى بنحب محمد ﷺ أكتر من أبننا
.. و مرت الأيام وخلصت السنتين ولازم حليمه تفطم محمد ﷺ
وترجعه لأمه ..لكنها كانت بتحبه اوى وعايزاه يفضل عندها كمان شويه ..

ياترى هترجعه لأمه بسهوله وللا هتفكر فى فكره؟؟؟؟
هنعرف سوا بكره إن شاء الله
صلوا عليه وسلموا تسليما 😍
🌸🌸🌸🌸🌸

#لو_عرفتموة
#حياتي_دعوة