نلتزم مع بعضنا (للبنات بس)✋

✨

- كان فيه بنت بتحكي إن زميلها مرة طلب منها يحفظوا قرآن سوا عشان يشجعوا بعض، من استغرابها وحيرتها من الطلب معرفتش ترفض ولا تقبل! عشان مش عارفة هو حرام ولا حلال؟! ففكرت وقالت له ممكن اختك تيجي تحفظ معانا وأنا كمان أجيب اخويا ونحفظ سوا كلنا، قال لها بس هما ميعرفوش بعض، قالت له واحنا كمان أغراب، روح احفظ مع أصحابك الولاد.

- بنت تانية بتحكي كان في معيد عندها في الكلية بيهزر مع البنات وبيضحك معاهم، ومعاها هي كان بيعاملها بشكل ناشف جدًا ولا ضحك ولا هزار وكلام على قدر السؤال والإجابة بس، ولما بنت زمليلتها سألتها إنتِ مش بتضايقي من المعيد فلان لما بيعاملك بالطريقة دي؟! قالت لها مالها طريقته! بالعكس ده الصح لأنه غريب عني مش المفروض يتعامل معايا زيادة عن كده أما اللي هو بيعمله مع البنات فَ هو ده اللي يضايق فعلًا ويزعل بجد لأن ممكن أي بنت منهم تعجب بيه وتحبه لمجرد إنها هتحس إنه بيعاملها هي بطريقة خاصة.

- بنت تانية بتحكي إنها كانت بتتكسف تقول إنها مش بتسلم لما تلاقي راجل بيمد إيده عشان متحرجهوش، لحد ما شافت الستات في سوريا وهما طالعين من تحت الأنقاض وحالتهم كرب ومع ذلك لابسين حجابهم الكامل ومفيش راجل فكر يمد إيده عشان يساعدها كانت هي بتقوم بكامل وجعها وتمشي لوحدها عشان محدش يلمسها، من وقتها البنت اتشجعت وبقت تقول أسفة مش بسلم على رجالة.

- بنت تانية بتحكي إنها لما بتخرج من بيتها كانت بتفضل تردد في سرها وتقول "وَجَعَلْنَا مِن بَيْنِ أَيْدِيهِمْ سَدًّا وَمِنْ خَلْفِهِمْ سَدًّا فَأَغْشَيْنَاهُمْ فَهُمْ لَا يُبْصِرُونَ" عشان محدش يبص عليها ويركز معاها أو يضايقها وهي ماشية أو يقول لها كلمة وحشة برغم إنها كانت بتخرج بكامل زيّها الشرعي.

- بنت تانية بتحكي إنها لما كانت واحدة تحاول تزن عليها عشان تلبس لبس أضيق من لبسها أو تقنعها تغير لبسها عشان تبان إنها أجمل وأصغر في السن، كانت بترد وتقول محدش هينزل معايا القبر أنا هنزل لوحدي وهتحاسب لوحدي، أنا مرتاحة في لبسي وراضية بيه كده.

- بنت تانية بتحكي إنها كل ما تقرأ وِرد القرآن اليومي بتاعها بتقرأه كله وتوهب الثواب لوالدتها عشان أُمية ومش بتعرف تقرأ.

- بنت تانية بتحكي إنها بتقعد كل يوم بليل قبل ما تنام تتكلم مع ربنا وتبكي له وتفضفض عن كل حاجة في حياتها ولما تخلص تلاقي نفسها بتبتسم وتنام وهي مرتاحة وكأن عمرها ما زعلت من حاجة.

- بنت تانية بتحكي إنها بتحس وسط الناس بالغربة وكل ما تخرج ما بيتها تندم إنها خرجت وشافت الدنيا برا عاملة ازاي، فتفضل تبكي وتقول طوبى للغرباء يارسول اللَّه.

..

في زحمة الحياة هتلاقي ناس شبهك، ممكن واحدة ولا اتنين، وممكن متلاقيش خالص، لو ملقتيش ومعرفتيش تعملي إيه ولا تروحي فين، ذكري نفسك وفكريها إن المكان ده مش مكانك، واثبتي وثبتي اللي جنبك لحد ما نمشي، ربنا دائمًا هيبعتلك علامات وينور لك بصيرتك ويخليكِ محاطة برعايته وكنفه، غَدًا نَلْقَى الأَحِبَّةَ، مُحَمَّدًا وَحِزْبَهُ.. لبيك اللهم لا عيشَ إلا عيشُ الاخرة.💜
#منقول