نلتزم مع بعضنا (للبنات بس)✋

ليلة القدر💙

اليوم  ''الي هو امبارح"إن شاء الله مع ( آذان المغرب ) هنكون دخلنا فعلياً في ليلة 20 إن شاء الله .... يعني كل اللي فات حمادة  وكل اللي جاي حمادة تاني خالص

ركز بقى معايا ياحمادة

  10 نقاط  مُختصرة وسريعة ومُحدّدة

1-ليلة القدر سُمّيت هكذا لإنها تُقدّر فيها مقادير العباد السنوية

مثال ...إذا كتب الله لك قدر سيء للسنة القادمة (وفاة ابن _ فشل في زواج ..فشكلة خطوبة...حادثة سيارة ..الخ) وصرت تدعو بإخلا‌ص في ليلة القدر بالتوفيق والسعادة والعافية والنجاه فإن الله عز وجل يأمر الملائكة أن يمسحوا الصحيفة التي كُتب فيها الشقاء ويكتبون لك ما طلبت ( يَمحُوا اللهُ مَا يشاء ويُثبِت وَعِندَهُ أُمُّ الكِتاب )

2 -ليلة القدر بعبادة ٨٤ سنة ليلة واحدة ب ٨٤ سنة عبادة الساعة في ليلة القدر ب ٨ سنين عبادة.. والدقيقه ب 50يوم عبادة ....فأين المُشمّرون ؟

3-  مفيش أي دليل شرعي ثابث صحيح عن النبي صلي الله عليه وسلم ... ولا أحد من الصحابة ولا سلف الأمه يُجزم ( وحط علي كلمة يُجزم ده خمسين خط )

إن ليلة القدر ليلة ٢٧ كل اللي انت بتسمعه ده عباره عن إجتهادات من بعض الفُقهاء والعلماء  والأثر الوارد عن الصحابيّ أُبيّ ابن كعب رضي الله عنه إن ليلة ٢٧ هيا ليلة القدر كان الظاهر من مقصود كلامه إنها كانت ليلة ٢٧ لتلك السنة وليست في كل السنين والله أعلم

4- معلوم وثابت ومتواتر  إن ليلة القدر تتنقّل وليست ثابتة  سنة تبقي ٢٥ .. وسنة تبقي ٢٧ .. وسنة تبقي ٢٩ .. وسنة تبقي ٢٣ وهكذا ... في الحديث ( التمسوها في الأوتار )

 

٥-خطأ كبير وخلل عظيم إنك تجتهد ف القرآن والقيام والدعاء واعمال الخير ف الليالي الوترية  فقط

(21 _ 23_25_27_29)

وتتكاسل وتتراخى ف غير هذه الايام  إنت كده عملت بالظبط زي اللي عنده امتحان ف 10 دروس فذاكر 5 منهم بس ودخل الامتحان أبسط قواعد المنطق بتقول إنّه لايمكن يجيب (  full mark )  ف الامتحان لانّه أكيد هيجيله سؤال من الدروس اللي مذكرهاش .....

بالإضافه إلى إن فيه أقوال مُعتبرة عن بعض الصحابه وبعض السلف وبعض فقهاء الأمّه أن الليالي الوترية قد تكون ( ٢٢ _ ٢٤_٢٦ _٢٨ ) لإن طريقة حساب العرب زمان كانت مختلفه عن طريقة حسابنا اليوم ولكن المشهور والراجح ان الليالي الوترية هيا الليالي الفردية المهم ما عليك إلا أن تجتهد في العشرة كلهم فردي وزوجي إبتداءاً من هذه الليلة

٦- متسخّرش طاقتك ومجهودك في الانشغال بليلة القدر هتكون يوم كام ...ولا تشغل نفسك بعلاماتها ... سخّر جهدك وطاقتك في إنك تشتغل ال ١٠ ليالي دول وكأنهم أخر ١٠ ليالي ليك في الدنيا .... وليلة القدر تطلع زي ما تطلع ... وكلما كنت صادق وجاد سيكون إحساسك وشعورك بها صادق وجاد

 

٧- لو كنت من الناس الل فرّطوا وضيّعوا من أول رمضان ...أو لو مكنتش لسه بدأت أصلاً  ...لسة عندك فرصة متضيّعهاش...  يقول ابن تيمية  ( العبرة بكمال النهايات لا بنقص البدايات ) ... لو مش هتعدّي مع النّاس الل هتعدّي الأيام ده هتعدّي إمتى ؟؟؟؟ .....إنقذ ما يُمكن إنقاذه.......قال أحدهم ( حُسن الختام خيرٌ من حماسة البدء )

8-بالنسبة للناس الل بتطلع من المسجد بعد فجر كل ليلة وترية فتلاقي الجو جميل ومنعش والسما صافيه والشمس جميلة ويصورا ويرفعوا معلّقين ( أشعر أنها ليلة القدر )

‎ممكن فضلاً وليس أمرا بعد إذنكوا منعملش كدة ؟؟ .... مش شطارة والله ولا سبق صحفي  بل بالعكس طبيعة المنشورات ده بتضعف الحماسة وتقتل الهمّة عند بعض الناس

‎تخيّل معايا كدة إنّ واحد همّته ضعيفة وشاف كذا منشور من كذا حدّ بيأكد إن ليلة القدر كانت ليلة كذا .. تفتكر هيكمل باقي الليالي بنفس الحماسة والقوة الل دخل بيها العشر ؟؟ ... تفتكر إنه ممكن يكمّل أصلا ؟؟

‎الحكمة من إخفاء ليلة القدر إننا نجتهد في ال ١٠ الأواخر كلهم .. وإلا كان ربنا أطلعنا عليها كما الحال في يوم عرفه في ال١٠ الأوائل من ذي الحجة

ياريت نترفّع عن الموضوع ده حتي لا نُصيب الهمم بمقتل ونجعل الناس ديماً شاحنين الرصيد لآخر يوم ( وممكن نصور ونرصد العلامات لنفسنا وبعد كده نظهر كل الداتا الل عندنا اخر يوم كنوع من المكافأة ) وجهة نظري

9-  دلوقتي جهّز ورقة وقلم واكتب فيها حاجاتك ورغباتك ودعواتك .... حاول ما تكتّرش .. خليهم ٤ أو ٥ حاجات علشان تركّز عليهم ... وافضل ادعي بيهم من مغرب اليوم ً.. وتحرّي أوقات الإجابة وخصوصا الثلث الاخير من الليل .. وماتدعيش بلسانك ادعي بقلبك وحاول تبكي وانت بتطلب الحاجه ( اصنع قدرك بنفسك ) ...... قال ابن عبّاس رضي الله عنه ( للعبد مع الله قدران ... قدر بالدعاء ... وقدر من غير الدعاء )

10- للشباب .. ابتداء من مغرب اليوم ً  لو عرفت تعتكف في المسجد من بعد التراويح لحد الفجر يبقى تمام أوي...إعتكافك في المسجد بعيد عن الاختلاط بالناس هيساعدك علي إتيان العشر الأواخر بشكل مختلف .....( ولو قررت تعمل كده سيب تليفونك في البيت علشان لو خدته معاك الشيطان هيخليك تفتح نت في المسجد ويبوّظ عليك الل بتعمله )

نتعب ياجماعه ... نتعب ياجماعه ... نتعب ياجماعه

يقول ابن الجوزي رحمه الله  ( إن الخيل  إذا شارفت نهاية المضمار بذلت قصارى جهدها لتفوز بالسباق .. فلا تكن الخيل أفطن منك .. فإنما الأعمال بالخواتيم ..فإنك إذا لم تحسن الاستقبال ..لعلك تحسن الوداع )

والله من وراء القصد💜
#منقول