نلتزم مع بعضنا (للبنات بس)✋

قصه جديده♥️

للبنات للي بتلبس بناطيل او اللي مش بتصلي و بعيدة عن ربنا ، او البنات الملتزمه حتي عشان يتعظوا ،خليكو صحبه صالح 💔😭😭

كالعاده قاعده قدام التليفزيون ، الجو سقعه جدا والدنيا بتمطر بطريقه غريبه ، وانا قاعده بشرب نسكافيه ومشغله فيلم أجنبي وبتفرج عليه
والدنيا هاااديه جدا ، وإذا فجأه أسمع طنط مها جارتنا بتصوووت ، أتفزعت وجريت من مكاني أبص من الشباك ، ماما وبابا صحيوا من النوم علي صويتهاا ، ماما خايفه ومش فاهمين حاجه !
بابا فتح باب الشقه وجري وماما جريت علي إزدال الصلاه ولبسته علي السلم ، انا من الخضه مش عارفه أتصرف إزاي
كل الي فكرت فيه إني أجري أشوف في إيه
دخلت قوضتي بجري ، شديت جاكت الترينج من علي الشماعه والطرحه لبست علي السلم انا كمان
من اللخمه سبت باب الشقه مفتووح
في دقيقه كنت واصله شقه طنط مها
بابا واقف واخد عمو محمد في حضنه وبيعيطوا
ماما واقفه حطه إيدها علي بؤها ومابتنطقش !!
طنط مها عماله تصوت وتعيط وانا مش فاهمه حااجه
الناس بدأت تتلم من الصويت ، سكان العماره كلهم نزلوا !!
ومازلت مش فاهمه حاجه ومش عارفه في إيه !!
لحد ماسمعت طنط مها بتقول ، ياحبيبتي يا بنتي
دي لسه ، لسه طالعه من الدرس وقالتلي انا جعانه ياماما
قولتلها استني بابا زمانه راجع من الشغل وهناكل سوا ، قالتلي انا هنام لحد مايجي صحيني ..
ودخلت تنااام ، بس نامت للأبد
مااتت قبل ماتاكل !! وكملت صويت
بس انا تنحت شويه ، ماتت مين دي الي ماتت !!
انا مش مستوعبه ، حسه إني بحلم ، مصدومه
أيه ماتت ، إزاي ؟! دي لسه صغيره ، دي لسه مكملتش 20 سنه !! دي خلاص كان فاضل شهرين علي امتحانات الثانويه العامه وتدخل الكليه !!!
مرت كل حاجه بسرعه ، الدنيا هديت نوعا ما ، الناس بصراحه مسابوش طنط مها ولا عمو محمد
بدأو يتحركوا ، منهم الي راح يطلع تصريح الدفن
والي أتصل بالمغسله تيجي ، والي راح المسجد جاب الكفن والمغسله الي بيغسلوا عليها . .
الوقت عدي جري وفجأه بقت الساعه 9 ، أحمد إبن عمو أيمن جارنا جاب تصريح الدفن
وطنط الي هتغسلها جت ومستنيه يجهزوها !
مش عارفه يجهزوها إزاي بس أنا سمعتها بتقول لمامتها إنت جهزتيها ولا لا ؟!
فمامتها قالتلها هدخل أجهزها ، ولقيت مامتها بتنادي عليا ي أميره .
كنت خايفه ومرعوبه انها تطلب مني الي خايفه منه !!
فرديت عليها بخوف ، نعم ياطنط مها !
والي خفت منه حصل ، لقيتها بتقولي تعالي معايا نجهز أيه سوا ، دي أختك ياحبيبتي ، مقدرش أدخل عليها حد غريب !
وطبعا في الظروف الي طنط فيه ووجعها دا ، مكنش ينفع اقول لا
كنت ماشيه ببطئ شديد ، عاوزه الأرض تنشق وتبلعني قبل ما اوصل للقوضه !
وصلت طنط فتحت الباب ، دخلنا ، شديت الملايه من علي وشها ، شهقت واترعشت ، بس اناحاولت اصبرها ، وانا عاوزه الي يصبرني اصلا
المفاجأه إن أيه لابسه هدوم الخروج مغيرتش
الميك أب لسه علي وشها ، لابسه بنطلون إسكيني إسود
وبدي بكم لونه فيروزي ، اللون الي كانت بتحبه !
طنط جابت بطانيه كبيره وغطيتها
بدأت تقلعها هدومها ببطئ وانا بساعدها
انا كنت حسه ان الساعات الي عدت في دقايق من شويه
بتعدي دلوقتي في سنين !! بدأنا نحاول نقلعها البنطلون ، كان ضيق لدرجه اننا فعلا مش عارفين نقلعهولها خالص
بس ربنا يسر ، وجهزناها !!
خرجت وانا في حاله ذهول تاام ، مبنطقش ومش عارفه اتلم علي اعصابي ! كنت كأني بحلم ، يارب افوق
دخلت طنط الي بتغسل ومعاها مامتها وماما
بدأو حوالي الساعه 9 ونص ، خلصوا علي 11
كل دا وانا حسه اني بحلم ، انا خلاص شويه وماما هتيجي تصحيني وتقومني من النوم !!
بدأ المسجد ينادي علي صلاه الجنازه ! عشان هيصلوا عليها الظهر
ماما فتحت الباب ونادت علي بابا عشان يجيب الصندوق ويشيلوها وقفلت الباب
شويه ولقيت طنط الي بتغسل بتفتح الباب وبتناديلي
روحتلها ، نعم ياطنط ؟!
قالتلي مامتك بتقولك هاتي من علي الحبل الكبرته !
روحت وجيبتها ورجعت ، وانا بديهالها
سئلتها ، هو انتوا ليه عاوزين كبرته ؟!
قالتلي عشان نسترها بيها !! قولتلها تستروها ازاي يعني !
مش إنتوا كفنتوها خلاص ؟!
فردت ااه ، بس برده القماش ممكن يشف تفاصيل جسمها
فبنرمي عليها كبرته عشان نسترها ، وعشان محدش من الرجاله يشوف اي شئ في جسمها .. وقفلت الباب !
خلصت ومحارمها طلعوا يشيلوها ، نزلنا صلينا صلاه الجنازه
العربيات بدأت تتجمع للمقابر ، انا روحت لماما
ماما انا مش هروح مقابر تحت اي وضع !!
قالتلي خلاص انت حره
اطلعي روقي شقه طنط مها واعملي اكل عشان الناس الي هتيجي من البلد
طلعت فعلا بدأت اروق ،دخلت غرفه ايه
الدولاب مفتوح ، هدومها شكلها جميل
الوان واشكال ، بناطيل مقطعه وبناطيل اسكيني
بديهات والتسريحه مفروشه بالميك اب والبرفانات
ايه مشيت ! ايه سابت كل الهدوم دي
سابت البناطيل الجميله الي كانت بتلف علي المحلات عشان تجيبها ، والميك أب الي كانت بتدفع فلوس فيه بالعبيط
اتكفنت بقماشه بيضا في الاخر وهتروح القبر لوحدها !
طب وهو انا اختلف عن ايه في ايه ؟!
ما انا لبسي كله بناطيل وبديهات ضيقه ! انا مابسترش نفسي اصلا ، كل تفاصيل جسمي باينه !
مبعرفش انزل من غير ميك أب وبرفان جايب لاخر الشارع
هي سابت كل دا ومشيت ، انا كمان هيجي يوم واسيبهم وامشي
معرفش امتي ودي المصيبه ! اني ممكن اموت في اي وقت
لما بنبقي في امتحان ، بنبقي عارفين الورقه هتتسلم امتي فبنستعد وبنخلص كل الإجابات قبل الوقت كمان عشان نبقي جاهزين ، بس واحنا عايشين منعرفش الورقه هتتشد امتي ، ممكن دلوقتي ممكن بعد ساعه ، ممكن بعد يوم ، الله اعلم
بدأت أفوق ، ماهو أنا لازم افوق ، الناس قربت تيجي وانا لسه مخلصتش حاجه ، شيلت المغسله الي كانت ايه بتتغسل عليها ، مسحت الميه ، وفرشت السجاده ، الشقه برا كانت نظيفه ، هعمل أكل إيه ؟! انا مش فيا حيل اعمل ايه حاجه ، مسكت التليفون ، كلمت المحل الي جمبنا طلبت أكل يجهز بعد ساعتين ، وقولتله لما بابا يجي من الدفن هيحاسبك !
الوقت عدا بسرعه ، بيرعه البرق ، خلاص دفنوها ورجعوا
سابوها في القبر لوحدها ، يارب هون ياارب
إستأذنت أمي إني هروح أغير هدومي وأرجع
روحت شقتنا دخلت ، وقفت قدام المرايه الي في وش الباب
بدأت ابص لهدومي ، جسمي وتفاصيله ،هو انا فعلا مستوره ؟!
ولا مستنيه أتستر غصب عني لما اموت !! اااه مش قادره
جريت علي التليفون كلمت ايات ، اول واحده جت في بالي
ايه بنت معايا في الكليه ، منتقبه ، جميله وهاديه ، بحسها شبه الملايكه ، كانت دايما بشوفها بتوزع ورق علي البنات
كنت ببعد عنها عشان كانوا بيقولوا عليها متشدده ، مع اني كنت بحسها بتحاول تقرب مني !
كلمتها
الو ، أيات أنا أميره فكراني ؟!
اااه طبعا فكراكي ، اتبسط جدا جدا اني سمعت صوتك
عامله ايه ؟!
بدأت أعيط ، اااه انا مش بعيط انا بصوت ، انا جوايااا رعب !!
ايات انا عاوزة اشوفك حالا
انا جيالك البسي ، وقفلت
قمت لبست ، لبست عبايه ، مكنتش،مستحمله البس بنطلون
طب ولو مت هيفضلوا يطلع عينهم عشان يقلعوني البنطلون زي ايه 😩😭 !!
لقيت ايات بترن ، نزلتلها
خدتني في حضنها ، قعدت اعيط ، مكنتش بعمل حاجه غير اني بعيط ، مش عارفه انا زعلانه علي ايه ولا زعلانه علي نفسي ولا خايفه من اللي ايه هتشوفه ؟!
قولتلها هنروح فين ؟!
قالتلي هنروح علي أقرب مسجد نقعد فيه
روحنا المسجد ، المسجد الي صلوا عليه علي ايه !
قعدت حكيتلها كل شئ
فردت بهدوء وقالتلي فعلا وكفي بالموت واعظا
عارفه يا أميره ، الموت دا الحاجه الوحيده الي حقيقه في حياتنا ، الحاجه الي مينفعش تتأجل ، مينفعش نهرب منها
الحاجه الي فيها اختيارين بس ياجنه يا ...... ربنا يسلمنا !!
مافيش حاجه بتحصل صدفه يا أميره ، ربنا قدر موت ايه ربنا قدر ودبر انك تحضري كل دا ، وربنا الي خلا مامت ايه تناديلك عشلن تدخلي بنفسك ، عشان يفرجك علي النهايه
علي النهايه الي احنا كلنا هنقابلها
بصي يا أميره لما السخان عندنا بيبوظ بنروح ندور علي شركه الصيانه لانهم هما الي صنعوه والصانع أعلم بصنيعته !
وهكذا ربنا لما فرض الحجاب مش عشان يخنقنا او يعذبنا ، حاشاه ، بس عشان احنا صنيعته وهو أعلم بعباده
ربنا فرض عليك الحجاب عشان يحفظك ويصونك ويسترك ، وعشان انت كمان بجسمك بتفاصيله فتنه للشباب وبتفتنيهم ، والحجاب مش طرحه ، زي ما العربيه مش ابواب بس
الحجاب ليه صفات معينه ، لا يصف لا يشف ، لا يكون ملفت ، ليس لباس كافرات ، ليس زينه في أمره ، وهكذا
انت لبسك مابيستركيش ، انت كل تفاصيل جسمك الرجاله عارفينها ، انت طول ما انت ماشيه في الشارع كل واحد بيتفرج علي جسمك في موازينك يا أميره ، الأمر فعلا مش سهل
الأمر مش هين يا أميره عشان نيتهون بيه ونعدي حياتنا ، واحنا ڤاترينه للشباب وإنت عارفه إننا فتنه ليهم !!
مش سهل إنك لما تنزلي مشوار لحد الجمعه كل بصه علي جسمك في موازينك أحسبيها بقا !!
كدا كدا هتتستري ، الكفن ٣ طبقات يا أميره ، إتستري بمزاجك ، أحسن مايسترك ربنا بشرعه غصب عنك بس ساعتها ،هتكون الستاره نزلت
بكيت ، بكيت علي نفسي ، بكيت علي جسمي بكيت علي الدنيا لأني شوفت نهايتهاا
أيات إنزلي هاتيلي لبس يرضي ربنا
أيات من كتر الفرحه قعدت تكبر
الله أكبر الله أكبر ولله الحمد
قومي يا أميره إسبغي الوضوء وصلي لله توبه يبدل الله سيئاتك حسنات وكأنك للتو ولدتي 💚💜
ونص ساعه وهرجع
قومت اتوضيت وصليت ، سجدت وطولت في السجود
دعيت وبكيت ، يارب رضاك والجنه
حسيت ب ايات جمبي ، عرفت من صوت بكائها
أخدت الهدوم ، دخلت الحمام ، لبست
جابتلي فستان جميل لونه زيتي وعليه خمار بني
لبستهم حسيت اني فعلا اتسترت ، حسيت اني بقيت غاليه وحره ، كفايا احساس الطمأنينه إنك هتبقي ماشيه مش خايفه تفتني حد ولا إن جسمك يبقي معرض للشباب !!
حكاوي من القلب 💔"