نلتزم مع بعضنا (للبنات بس)✋

المسلمه❤️

السلام عليكن ورحمة الله وبركاته....😍
بوست النهارده بإذن الله مهم جدا بالنسبة لكل بنت مسلمة و هبدأه بسؤال و اللى هو :
_انا كبنت مسلمة لما أخرج من بيتى🏤 لأى سبب شكلى و كلامى و لبسى هيكون ازاى؟🤔🤔
_طيب إجابة السؤال ده حبيباتى هتلاقوها ف الخطوات الجاية ⬇⬇:

١_الخطوة الأولى (النية) 😊 و اللى هى أنا خارجة من بيتى ليه نيتى إيه ؟!!
لازم نيتك إن خروجك ده يكون الغرض الأول والأخير منه هو طاعة الله سواء كان سببه ( طلب العلم، أو العمل ، أو الزيارة ، أو العلاج  .....او أى سبب تانى) أيوه بالضبط ف كل إللى فات ده لازم نيتك تكون الطاعة و ابتغاء رضا الله وحده علشان تبعدى عنك وساوس الشيطان و تاخدى أجرك كامل بإذن الله 🤗🤗

٢_طيب نوينا الطاعة ف خروجنا...جه بقا دور اللبس 😃😃
اه هتفرحوا دلوقتى كله صحصح يعنى 😆 طيب ماشى هنلبس بقا يبقى لبسنا ده يكون موافق للمواصفات الشرعية المعروفة ⬅اللى هى ( فضفاض ، لا يصف ولا يشف ، ليس لبس شهرة فى ذاته ) يعنى محجبة يبقى حجاب طويل يغطى الجزء العلوى من جسمك و الطقم يكون واسع محتشم ألوانه مش ملفته ولا صارخه 😏
مختمرة يبقى خمار واسع و طويل و العباية أو الطقم برضه واسع و محتشم 😊
منتقبة يبقى نقاب شرعى يرضى ربنا من غير رسم العيون و الحواجب و لا خمار أو طرحة قصيرة ع النقاب ولا شخاليل  و الشنطة الروز و الكوتشى الارنوب ماشى ...و العباية تكون  واسعة 🙂
و الحذاء يكون م غير كعب بيعمل صوت متنسوش .." و لا
يضربن بأرجلهن ليعلم ما يخفين من زينتهن" 🙄

٣_لبسنا بقا خلاص و استعدينا للخروج نروح بقا نسلم ع بابا و ماما  و نبوس ع ايديهم 😍😍....مشينا بقا و وصلنا لباب الشقة نخرج بالرجل اليمين و نقول دعاء الخروج ⬅( بسم الله توكلت على الله و لا حول و لا قوة إلا بالله اللهم إنى اسألك خير المخرج و المولج )

٤_طيب لو هتمشى لمشوارك حاولى تستغلى وقت المشى ده ف الذكر و الإستغفار و أهم حاجة غض البصر و المشى بطريقة معتدلة من غير تمايل و لا تكسر ف مشيتك😶
و غض البصر مش معناه انك تحطى راسك ف الأرض ف متشوفيش قدامك تحصلك حادثة لا قدر الله لا غض بصرك يكون بالنظر لمستوى طريقك قدامك يعنى منبصش ع حد و ف نفس الوقت نشوف طريقنا فهمينى يا بناويت🤓🤓
طيب لو هتاخدى أى  وسيلة  مواصلات متنسيش دعاء ركوب الدابة⬅( الحمد لله الذى سخر لنا هذا و ما كنا له مقرنين) و تحاول تتجنبى ملامسة الناس القاعديين من الشباب يعنى حاولى تخلى حاجز بينك و بينهم شنطتك مثلا و لو السواق مشغل أغانى متديش ليها انتباه خلى خاتم التسبيح ع طول ف إيدك  أو  طلعى مصحفك و لو الصوت عالى جدا استغفرى كتير و ربنا يعينك ان شاء الله ⚘⚘

٥_ وصلنا بقا الجامعة أو مكان الشغل او أى  مكان كنا قاصدينه أكيد  هنتكلم احنا مش خرس لكن هنتكلم ازاى بقا ده هو المهم 😌😌؟
( صوت المرأة  عورة ) ده مش معناه انك تنونوى زى القطط أو متنطقيش خالص لا اتكلمى ف حدود حاجتك للكلام بصوتك العادى و طريقتك العادية ف الكلام من غير تمييع ولا تكسر و تنغيم  للكلام و صوت المرأة بيكون عورة لما بيكون سبب لإثارة الرجال 😡😡😡
لكن انتى كبنت مسلمة ملتزمة تحب ربها و متمسكة بسنة النبى و الشريعة مش كده ولا عمرك هتكونى كده 😌😌

٦_ ف طريقك أو ف الجامعة أو شغلك  هتسمعى كلام كتير يضايقك زى  ستنا الشيخة أو   دخلينا  الجنة معاكى .....و غير ده كتير 😑😑متزعليش اصبرى و احتسبى و مترديش ادعيلهم  بالهداية

⬅عرفنا بقا هنخرج من بيوتنا  ازاى و طريقنا هنمشيه ازاى عرفتوا بقا قد ايه الإسلام  كرمنا و حافظ علينا و سن لينا سنن كلها خير لينا حتى ف أدق أمور  حياتنا  🌺🌺
أصلا  لازم تفهمى انك أثناء  خروجك بتكون بتمثلى دينك و بتبقى صورة حية لأخلاق الإسلام  انك بتبقى قدوة لغيرك و أن بنات كتير هيقلدوكى و يحبوا الالتزام من خلال تصرفاتك
ف خليكى قدوة حسنة و صورة جميلة الكل يتمنى يكون زيها 😊😊
🤗🤗🌷🌷