نلتزم مع بعضنا (للبنات بس)✋

حواديت💛

- اتفضلي عصير المانجا اللي انتي بتحبيه
= تسلم إيدك ياهدير ..
- قوليلي بقاا عاملة ايه ..وأخبار كليتك ايه ؟
= الحمد لله ، كله ماشي تمام
- ياارب دايما ياحبيبتي
= هدير بصراحة انا كنت عايزاكِ في موضوع كدة
- اتفضلي يازينب ..بس استني ، لو هتتكلمي في نفس الموضوع يبقي بلاش
= ياهدير إدي لعبد الرحمن فرصة ، والله العظيم عبد الرحمن بيحبك
- طب مانا عارفة ، وأنا كمان بحبه
= الله !! طب ليه بقاا المكابرة مادامك بتحبيه وهو بيحبك
- عشان بحب ربنا أكتر مني ومنه ومنك ومن أي حد في الدنيا
= ياهدير !! ..ياهدير دا انتي وعبد الرحمن كنتوا مرتبطين وقضيتوا سنتين مع بعض وعرفتيه وعرفك كويس وقصة حبكوا كانت تشهد عليها الجامعة كلها حتي لحد دلوقتي ، وكنتوا متفقين انه يجي يتقدملك بعد مااتخلصي جامعة وبقالك سنة اهو ..بس انتي فجأة اتغيرتي وسبتيه وبقيتي في حالك كدة لا بتكلميه ولا بتكلميني حتي ..جرا ايه لدا كله ؟
- جرا إني توبت يازينب ..توبت !!! ..كفاية بقاا ذنوب ، انا تعبت منها ، طبقت علي نفسي خنقتني مابقتش قادرة اتنفس من الذنوب ، أنا بحبه والله بحبه .. بحبه أكتر من أي حد في حياتي ، بس للأسف بداية الحُب دي كانت غلط  ، كلها غلط ، حبه أكبر ذنب طابق علي نَفَسي ، وأنا مش هسيب نفسي عايمة في بحر الذنوب لحد ماألاقي الموت بيشدني لتحت ..يبقي ايه المشكلة بقاا ، جاية تلوميني علي ايه ، علي إنّي نجيت نفسي ؟ علي إني لحقت نفسي قبل مااغرق وجريت علي ربنا يلحقني وينجيني من الذنوب دي ، وأخوكِ من الذنوب اللي بحاول أنجّي نفسي منها وهفضل أحاول لحد ماانجح وهنجح ، هنجح إني أنجّي قلبي من حُبه عشان أقدر أعيش
= اييه يابنتي التعقيد دا كله ، كفاية بقاا وبعدين أخويا ذنب ليه وعشان ايه وليه دايما تقولي عليه كدة ؟
- أخوكِ بتاع بنات يازينب ، وللأسف أنا كنت في يوم من الأيام من البنات دي ، وبيشرب سجاير وبيجيب في سيرة الناس ومش بيصلي وحاجات تانية كتير بقاا بس ربنا ستار ، وأنا عُمري ماهآمن علي نفسي مع إنسان زيه ولا أهلي هيأمنوا عليا معاه ..مش هو الإنسان اللي أحب يكون أبو ولادي  ، والحمد لله إني لحقت نفسي من دلوقتي ، ولو سمحت يازينب لو كُل ماتجيلي هتفتحيلي السيرة دي يبقي بلاش تيجي أحسن
= ماشي ياهدير براحتك ، براحتك خاالص

"" الحياة دي صعبة أووي ، صعبة ووحشة جدا ، وأوحش حاجة فيها إننا بنعيشها غلط ، بنتوه فيها واحنا مش فاهمين وفاكرين إنها كدة عال العال ، طب أنا قررت أعيشها صح ، قررت أهرب من الدنيا دي وأجري علي دنيا أفضل وأنضف وأفتح صفحة جديدة في حياتي من تاني وأبدأ من جديد ، بس ماأخدتش بالي إني وأنا بجري علي الدنيا الجديدة .. أخدت عبد الرحمن ..أصل عبد الرحمن دا جزء من ذنوبي ..بيدوس علي قلبي ومش عايز يرحمني ..كان صعب أمشي وأهاجر وأسيب عبد الرحمن ..بس لإني كنت بجري علي ربنا كنت واثقة فيه إنه هينجيني من الحب دا ..بس فجأة لقيتني شايلاه في قلبي وبجري علي ربنا ..بطلب منه يسامحنا ويهدينا ..وأهو دي كل الحكاية ..قاعدة بتعذب ومش عارفة أرحم نفسي من العذاب دا ..ياريتني أقدر أنتشله من قلبي وارميه وأجري وأهرب منه زي ماهربت من دنيته .. ""