مفيوزية في قلب الحدث

الجزء 2

الجزء الثاني
كانو دوك جوج شماكريا مضورين ياسين، و سارة و أمنية فامهم غيطيحو للارض من خطورة الوضع، شوية خرجات نادية و فتيحة من الدار و دخلو وسطمنهم باش يفكو، الدرب كامل كيتفرج، و ياسين دقة فيه و دقه فنادية و فتيحة، سارة و أمنية باقين يالاه غيحللو الوضع رجع واحد الشمكار منهم بلور و هز طيطوارة و شير بيها قاصد ياسين، ولكن متجي غير فنادية و معودتش نادية الهضرة، طاحت على طولتها و راسها كيسيل بالدم، و فتيحة طاحت حداها كتغوت
فتيحة(مخلوعة): نادية نادية مالكي
ياسين تحدر يشوف مال نادية، و الشمكارا تخلعو و بغاو يهربو، بدات أمنية كتبكي، و يالاه غتمشي عند ماماها، و هي تبان ليسا سارة لي جبدات زيزوارا من تقشيرتها و تبعات دوك الشماكيرا، واخا أمنية خافت على ماماها، ولكن ان سارة ترجع لعادتها القديمة راه كارتة... خلات ياسين يتكفل بماماها و بدات كتجري ورا سارة و كتغوة عليها
أمنية: سارة لا ا سارة رجعي لهنا
اما سارة فشبعات هادوك الجوج تخصار هضرة غير من لحزام لتحت و تابعاهم و كتحلف على ما غدير ليهم
سارة: ليوم نعيد
شتو بحال دوك المطاردات ديال الافلام، كيتجاراو و سارة مزاكلاهمش، و المكلخين متفرقوش باش يتلفوها بقاو تابعين بعضياتهم، مبقاش كيبان لسارة الشانطي، و غير قطعو هما جات غدوز كانت غطحنها واحد لوطو كون ما فراناش مولاها، و هي متسوقتش لانها كانت غتمشي فيها، و كملات طريقها تابعاهم، و امنية عاد وصلات لموقع الحدث
أمنية(كتزرب فالهضرة مع مول لوطو): سمح لينا ا خويا
و خلاتو واقف ببرود تابع سارة لي كتجري بعينيه، حتى خرج واحد الراجل خمسيني من لوطو و شاف فيه
الرجل: تعطلنا ا عماد
عماد(بعد عينيه على الطريق): هاحنا غادين
نرجعو لسارة لي شدات واحد من دوك الجوج، و زغبو الله حيت غير شداتو و لاحتو للارض، و هي تهز رجلها حتا هزاتها و عطاتو بين رجليه، و شدات ديك الزيزوارة نزلات ليه بيها على طول ايدو، و السيد كيغوت و الماس تخلعو من المنضر ديال الدمايات
سارة(كتغوت): يا ولد ***** تجي لعائلة سارة و تجرب فيهم، غ**** ديلمك ليوم ال****
اوك غرقاتو كلام ناقص و بغات تخصر لو وجهو كون ما عنقاتش أمنية لي جات شداتها و بدات كتزاوك فيها
أمنية: العار ا سارة بمعزتي عندك رجعي لعقل سارة العار
بقات سارة كتجابد باغا توصل ليه و تةمل عليه، و هوا مسكين عاجز عن الحركة، و الى مخفت نكدب عمرو غيولد خادشي الى بقا عيش... بستة و ستين كشيفة فكات امنية داك المسكين من براثن سارة، و جراتها يرجعو يشوفو نادية و خلاوه غارق فدماياتو حتا عتقوه غير الناس و يمكن معتقوهش شكون عرف...
وصلو البنات للدار، لقاوها خاوية، عرفوهم غيكونو غير فالسبيطار، و هزات أمنية صاكها عاد مشاو كيجريو للسبيطار... غيبات نادية يومين في هذه الاثناء هاداك المتضرر من سارة تعالج واخا الاثار غتكون دائمة ولكن هوا مبارك لي خلاتو حي، عاد زيد انه مقاد على مشاكل المخزن... دازو تحاليل نادية و قالهم الطبيب بلي خاصها الراحة و يقدر تولي شوية مدوخة فهاد الفترة. لمهم منتعمقوش فالتفاصيل، رجعو للدار صحا سلام، و ياسين تعلم الدرس، حيت رباتو سارة من اوب و جديد، شداتو بندخاتو خلاتو عبرة لمن اعتبر باش يتعلم اول مرة يضارب يضاربها قدام الدار حتا طيح نادية فمعامعو...
بركات سارة فبيتها كتريني على البوكس فداك كيس الملاكمة لي دخلاتو هادي عام للدار بعد مضاربااات و تقربيلاات كبيرة، زيد انهم معارفينش حتا منيني جابت فلوسو، و هي راها غير طاحت عاى كنز فالزنقة، اجل يا ناس لقات بزطام كامل بفلوسو و شي سوارت، لمهم انها خسرات لفلوس على البوكس ديالها... حتا دخلات عليها أمنية
أمنية: وا صاحبتي واش باقا كتريني من الصباح
سارة(عنقات داك الكيس): اشنو تاني اش بغيتي من هاد الصباح
أمنية: واش كتسطاي عليا، راه جايين دار خالد لعندنا ليوم
سارة(باستغراب): شكون خالد
أمنية: اويلي عدايدي و داك ولد صاحبت صاحبت ماماك لي وراوه تصويرنك و عجبتيه
سارة: و اش جاي يدير
أمنية(كضحك): جابو الهوا فنصاصات الليل
سارة: ضحكك باسل كندوي بصح
أمنية: راه دويما فالموضوع هادي شهر جايين يخطبوك
سارة: من نيتك داويا
أمنية: واااع و السيد كامل و مكمول راجل و رجال عندو دار بوحدو خدام فالمطار معندو خواتات معندو خوت اش بغيتي مزال
سارة: لا الله يجعل الباراكا، عرفتي اش غديري دابا، غدوري ١٠٠ و تحيدي الحضية، حتا يجيو و نشوفو هاد الراااااجل لي فارعا ليا راسي بيه
أمنية: اوا وجدي راسك انا نازلا نعون ماما و ماماك
سارة: سيري سيري
و خلاتها حتا خرجات و رجعات تريني
سارة(بسخرية): قالك راجل هاحنا غنشوفو