مفيوزية في قلب الحدث

الجزء 9

سارة: قلت ليك غنحنتك
بقا عماد كيشوف فيها ببرود كيتسناها تدوي
عماد: واش غتحضري اشنو درتي و علاش كدوي اولا خرجي عليا راه عندي ما يدار
سارة(بابتسامة): سمعت بلي عندنا مهمة سرقة شحنة كبيرة منوعة جايا من البرازيل قبل ما توصل للمغرب
عماد(ضرب فالبيرو): اش قربك لوراقي
سارة: مترفعش عليا صوتك، خدمت با و انا خاصني نعرفها
عماد(مزير على ايدو): دوي اش عندك
سارة: لقيت هاداك لي غيتوصل بيها
عماد(بصدمة): بصح، كي درتي
سارة(كتشوف فضفرانها): اسرار المهنة، المهم انا قدرت نقرب منو، و فالقريب العاجل غنقدر ناخد اكبر عدد من المعلومات
عماد: سارة واش متأكدة من هادشي لي كتقوليه
سارة: اه متأكدة، و الى متيقتينيش ها التصويرة
جبدات التيلي و عطاتو ليه... بقا عماد مبلوكي كيشوف فالتصويرة دون اي تعبير، لدرجة ان سارة دخلها الشك... حتا هز عينو فيها
عماد: من اليوم مغتبقايش ترجعي للمقر، غتبقاي حداه، راقبيه، كل صغيرة و كبيرة قيديها، و من هنا لشهرين بغيت المعلومات الكاملة عليه، ياله نوضي دابا
ناضت هزات تيليفونها و خرجات و كتشوف غير فالجبيلات، و غيب بقا عماد بوحدو فالبيرو و هوا يبدا يدوي مع تصويرة عادل
عماد: سمح ليا ا بوص، ولكن بنتك لصقة، و كان خاصني نتفك منها(رجع شاف فالباب): الخطوة اللول دارتها بنفسها، ندوزو للخطوة التانية
اصبحنا و اصبح الملك لله، و فاقت سارة معالستة ل الصباح، لبسات سيرفيط زرقة، و الكونفيرص ديالها، عاد خرجات ديريكت للكاراج...
ادريس(كيشوف فالساعة و سارة واقف قدامو): تعطلتي خمسة د الدقايق المرة الجاية غنردك لداركم، الوقت عندي كيتحتارم
سارة: صافي واخا
ادريس: دوزي بداي خدمتك، راه يالاه دخلات اوطو جديدة سيري شوفيها
سارة: واخا ا شاف
حيدات تجاكيطا ديال السيرفيط و تحزمات بيها، و بقات بتريكو نص كم كحل... مشات لديك لوطو و حلاتها و بركت تمخشش... دوزات نص النهار اللول غير فتامارا، و ملي ضربات ١٢ هز فهد شكارتو و جا عندها
فهد: يالاه اسارة تغداي و رجعي
ادريس(قاطعو): مغتخرجش هي من هنا حتا تكمل ديك الخدمة لي من الصباح و هي فيها، مولاها غيجي ليها فالعشية و زربان عليها
سارة(وحلات ليها العضرة): ولكن...
فهد: انا نبقا نعونها ا شاف
ادريس: فهد خرج حسن ليك، خدمتها ديرها بوحدها، يالاه خويو عليا الكاراج
شاف فيها فهد بدوك نظرات الله يكون فعوانك و خرج، و ادريس خلاها و مشا برك قدام الباب كيدوي فالتيلي. بركت تعير تحت حوايجها، و كتصوب فديك لوطو، و مع معصبة كلشي معكس، ولات خاويا على راسها الزيت و ضاربا ايدها بالساروت، لمهم حالا تما... مسالاتها حتا غفر لها الله الدنوب، يمكن مشي كاملة حيت السيدة غارقا دنوب، و باقا كتشوف فيها جا وقف عليها ادريس و مول لوطو
ادريس: كملتيها ولا مازال
سارة: كملات، تقدر تجربها
مول لوطو دار شاف فلوطو ديالو مزيان، و هوا يرجع عند سارة
الرجل: منفختيش الرويضات، و معمرتيش ليسانس انا تابعني سفر طويل
سارة(خنزرت فيه): و انا مالي قالو ليا صوبيها مشي بداي تعمري فيها
نزل عليها ادريس بواحد الضقة للراس، حتا تقطع فيها النفس و ولات شادة فراسها و باركا قفازيا و النفس مكتطلعش
ادريس: اش هاد الاسلوب باش كدوي مع الكليان، عتادري منو
و دابا المصيبة بغات تنوض تعير ولكن راسها تفرق، مقادراش تخرج حتا الهضرة، جا فهد كيجري يعتق الموقف
فهد(لمول لوطو): سمح لينا ا سيدي راها باقا جديدة، انا غنصوبها ليك
ادريس: فهد هي لي غتصوبها
فهد: واخا ا شاف غير رتاحو
مشا ادريس و الكليان، و عون فهد سارة باش وقفات و جاب قرعة ديال الما متلجة حطها ليها على راسها
فهد: راه قلت ليك الشاف صعيب، ايدو سابقاه
سارة: ناري راه كنحس بالبصلة السيسائية ولات شلاضة
فهد(كيضحك): كلشي عارف دقتو مكترحمش، ولكن بالحق مكيضربش بزاف غير الحالات القصوى، دابا غير حسم من الكليان و صافي
سارة: هادوك عندو خباطات مشي ايدين
فهد: كتقول الشائعات بلي كان بوكسور قبل ما يخدم هنا
سارة: بصح على هوا من ايمتا و هوا خدام هنا
فهد: شي خمس سنين و نص هاكداك، ملي كان عندو ٢٣ عام
سارة: غير بشوية المرض راه باقي كيضرني راسي
فهد: نوضي تصوبي لوطو قبل لا يجي يكمل عليك
ناضت لوطو تنفخ ليها الرويض و تعمرها و هي كتعير
سارة: سير انا بغيتها متكملش بيك الطريق تفركع، الكرض ا داك الحمار، انا انا سارة السمراوي يضربني هاد الكلب، غير لقيتيني فمهمة، حتا نطيحك فالفخ و نتفرجو ديك الساعة، دير ليا فيها مفيوزي ضرب لي كان، راه حتا انا مفيوزية و ملي كنوض كنخلط بنادم
و بقات كدوي كدوي حتا كملات و زادت حدا فهد باش متشوفش ادريس لترتاكب فيه شي جريمة... كمل اول نهار على خير من غير ديك الدقة لي باقا حاركا سارة، صافي و مع 6 سد ادريس المحل و خرج كلشي لديورهم...