مفيوزية في قلب الحدث

الجزء 7

خرجات سارة من المقر و مشات لدار و ليل كامل و هي كتشوف فالتصويرة لي فتيليفونها، اش جا دابا ما يلقيها هاد خينا، دابا الى قالتها لعماد مغيبغيش يعطيها المهمة من الاصل، ولكن الى لقاتو بوحدها غدي تحنت عماد و تولي شادة المهمة صحا، هادشي الى ما قلبش عليها، دابا اصلا هوا مضارب باش يجمع المعلومات، يعني الى لقات هي هاد خينا و جابت ليه المعلومات غدي تاخد المهمة... فكري ا سارة كي غديري تلقاي هاد خينا، كيغديري الصكعة و نتي كتلوحي راسك فشي سواق مشي دياولك... بزز باش نعسات و هي كتفكر فشي حل، ديرا فيها واعراو غتلقا هي المعلومات قبل المافيا، ولكن مشي مشكل لا ضرر من المحاولة... فاقت امنية الصباح بكري، و خلات لبيت سارة، لقاتها باقا ناعسة، و هي تمشي تفيقها
امنية: سارة وا سارة واش مغتمشيش ليوم
سارة(من تحت المانطة): فين غنمشي
امنية: ياك وليتي خداما فالمافيا، ولا غير كتزفطي عليا
سارة بعد مذه عاد سرات معاها الهضرة، و تفكرات المهمة لي تابعاها، و هي تنوض كتنقز و تجارا، رجل فالارض ولاخرى فالمانطة حتا دخلات للحمام... خرجات من الدار كتجري تلاقات مع ياسين داخل للدار، مسكين مقالتش ليه حتا سالام، خلاتو بلاكة و زادة، بالحق حتا هوا متسوقش و زاد للدار... دخلات للمقر، كتبان ليها الدنيا هادئة على غير العادة، مشات ديريكت للبيرو د عماد، و غير دخلات و هوا يزكلها واحد الفاز
عماد(كيغوت): يا **** اش دخلك بلا مدقي الباب
سارة(كتعير فيه): جمع راسك ياكما جاتك **** عليا، حتارم راسك و خلينا خوت
عماد: اش باغا
سارة: بغيت نسولك، واش غتخدمني ولا غتبرك دير راسك كتعلمني
عماد: باغا تخدمي دخلي للكوزينة و طيبي لينا ما ناكلو
سارة: ياكما قالو ليك جابوني فام د ميناج
عماد: اوا بركي للارض معندك ما يدار هنا
سارة: و الى ثبت ليك العكس
عماد: اش غديري
سارة: عطيني يومين و غنفرجك
خرجات و خلاتو غير كيشوف، شوية حتا قلب عينيه و رجع لوراقو... مشات سارة خارجة كتمشي و كتفكر كي غدير تلقاه، حتا تفكرات واحد اللقطة من فيلم هندي، ملي تودر للابطال ولدهم خرجو يقلبو عليه فالزنقة و يوريو التصويرة للمارة، و هي دير بحالهم، غتولي هندية غير باش تخدم معاهم فشي حاجة ديال الصح... جبدات التصويرة و بدات دور فالشارع و تسول الناس واش شفتي هاد الراجل، و حتا واحد معبرها كلشي مشافوش، لمهم سرحات رجليها مريان، ضربات كغطا قداش، دارت العمالة كاملة، حتا غربات عليها الشمش اد رجعات للدار رجليها طيبين و منفوخين و تجر اديال الخيبة و الخدلان... وجدات ليها فتيحة واحد السطل ديال الما سخون فيه الملح و عطاتو ليها خشات فيه رجليها و امنية و نادية باركين حداها كينقيو فالخضرة فوق الطبلة لي غينصبو بيها العشا
فتيحة: انا قلت ليك هادي مشي خدمتك، مشيتي لويتي لباك دراعو باش يخدمك
نادية: ابنيتي نتي باقا صغيرة و باركا تابعا هاد الطيش، كملي قرايتك و ديك الساعة شوفي الى بغيتي ديري شي حاجة هاكدا
امنية: داك النهار قلت ليها ندفع ليها وراقها للافاك لي فالرباط و نمشيو بجوج و مبغاتش
فتيحة: يهديك الله ابنيتي خلي عليك هاد البلا و باك هانتي عرفتيه اش بغيتي مازال
سارة: كترتو من الهضرة، اوا راه لي فراسي هوا لي فراسي، انا ممفاكاش غنخدم معاهم و غناخد بوست كبير و نحنت داك **** د عماد
فتيحة(ضربات سارة للراس): صلحي فمك ا ديك الصكة حسن ما نريبو ليك
سارة: و مشيت حتا تبت و هوما لي كيجبدوني
دخل ياسن هوا لي قاطع الهضرة، شاف فيهم كاملين ديرين بسارة
ياسين: ا مالكي ا سارة ياكما غتجوجي
سارة: غنعوجك اداك الحمار، شفتيني وجه الزواج و انا فهاد الحالة
ياسين(كيستفزها):مسكينا بقيتي فيا
سارة: ياسين غتجمع *** ولا غنوريك وجهي لاخر
فتيحة(صنكعتها): راه غنريب لك فمك اديك الحمارة د بصح
ياسين: ياك بعدا اخالتي فتيحة، هي لي كتجبدني
فتيحة: نتا ساهل
امنية: فين كنتي ليوم غبرتي
ياسين(جا برك حداهم): لا غير واحد صاحبي كان خاصو يدي طوموبيلتو تصاوب و مشيت معاه، و عجبنا الحال فالكاراج شدينا الحتة واخا داك مولاه مممعاهش الضحك
سارة: هي فوجتي ليوم
ياسين: و قلت ما يدار، كون كنت دابا خدام كن راني مزوج و والد ولادي
امنية(كضحك): شكون هادي لي غتقبل عليك
ياسين: نتي نيت مالكي
امنية: لهلا يحيك، بقيتي ليا غير نتا نشرف فيك
ياسين(قرب حداها كيستفزها): مالني كي جيتك
امنية(دفعات ليه وجهو): بعد لهيه يرحم جدك عطيني شبر د التيساع
ناضة امنية معصبة و ياسين حط ايدو على قلبو و بدا كيغوت
ياسين: امنية انا كنبغيك
نادية(ضرباتو على كتفو كضحك): غيسمعوة الجيران
ياسين: ياك اخالتي انا على مزيني
نادية: معندي ما نقول
ياسين(كيغوت باش يسمع لامنية): صافي غدا نجيب السكار راني باغي امنية، امنية راني كنبغييييك
خرجات امنية من البيت و بركات تشير عليه بالصنادل و تغوت
امنية: ينعل جد باباك الحلوف، جمع راسك حسن ما نزيد نشتتو ليك
هوا هربان و كيضحك، و امنية تابعاه بالصنادل و السبابط و كلشي كيضحك عليهم...
حتا سخفو و بركو للارض كيرجعو النفس، و ياسين باقي كيضحك
ياسين: و درداكة مساهلاش
امنية: حكل سارة فيك، نتا وجه المحين
ياسين: و منبقاش فيك و تقبلي عليا
امنية(كتغوت): ماما دوي معا هاد الخرا
نادية: ياسين
ياسين: نعام ا خالتي
نادية: والله الى تليق تكون نسيبي ياك ا امنية
امنية: وااااااع
ناضت فحالها و خلاتهم كيضحكو، و ناض ياسين برك حدا سارة
سارة: شنو باغي تجيبني درة على امنية
ياسين: لا اصلا نتي مشي من النوع لي كيعجبني
سارة: كيشتيني شفت فيك بعدا، عافا خويا مد ليا داك التليفون لي حداك
دور ياسين راسو للخر ديال الطبلة، فين محطوط تلفونها، و هزو غيمدو ليها، ولكن دارت ليه فالخوا و حلو برك يقلب فيه
سارة: ياسين كنقولك معزيزش عليا لي يقلب ليا تلفوني طلق الزبل
ياسين: غنشوف غير شحال عندك ديال الكونيكسيون و نعطيك، كاع نقدر ناخد ليك شوية منها واه خوك محتاج الساطة كتسنا
سارة: و انا مالي هاد الصاطة مفخبارهاش بلي الصاط مسيزي
ياسين(برك كيشوف فتصويرة داك لي كتقلب عليه سارة): هادا ا سارة هوا مول المحل لي كنا عندو الصباح
خدات التيلي شافتو و هي ترجع شافت فياسين بصدمة
سارة: ربي ربي حلف بالله
ياسين: اه ا صاحبتي كلشي كيعيط ليه الشاف ادريس فالدرب، مكينش لي مكيخافش منو، راه معروف فالزنقة ١٢
سارة: لعار لما عطيني لعنوان، راني طيبت رجلي بالمشي ليوم و ملقيت والو كون كنت عارفاك عارفو منخرجش
ياسين: اوا متي مسولتينيش من الصباح، لمهم انا لي عارفو هوا سميتو ادريس و عندو محل كبير ديال المكانيك كيخدم فيه بايدو، و على حساب ما سمعت، السيد وااااعر و قاصح فخدمتو
سارة(كتفكر): اكيد هوا هدا، الى قدرت انني نقرب منو و وريت لعماد اكيد غيولي يثق فيا و يخدمني
سارة: خويا ياسين، قيد ليا العنوان بالضبط، بين ليا غنبدل الحرفة...