مفيوزية في قلب الحدث

الجزء 17

وصلو للكوميسريا، و سارة ميكات على القدية ديال عماد، حيت عندها اولوية كبر دابا، و خاصها تخرج باش تشوف هاد عماد علاش ناوي و البوليس اش وصلهم لتما... دخلوها هي و ادريس، و هي تمشي وقفات على الشاف الكبير
سارة (كتبسم): السي جواد و غبرااا اولا
جواد (مفهم والو و هو كيشوف فيه): سارة اش كديري هنا
بركات على راحتها و ادريس مفاهم والو و واقف
سارة: لا غير توحشت الكوميساريا و بغيت نجي نضرب طلا عليكم و نسلم عليكم، و دابا انا غادا يالاه بسلاما
بغات دير فيها قافزة و تجر ادريس و تخرج،ساعة شدوهم
جواد: مالهم اش دارو هادو
لكوميسير: لقيناهم فالبلاصة لي خرجو منها كميونات التهريب الليلة
جواد (حط ايدو على راسو): سارة حلفتي حتا تلوحي راسك فالمافيا
سارة (كتبرر): لا و الله ما درت حاجة هاد المرة، انا غير كنت ديرا بيكنيك انا و صاحبي
نغزات ادريس باش يايدها، ولكن ادريس مفاهم والو بقا غير كيدور فعينيه
جواد: مكنكدبوش هنا ا سارة، مجاك البيكنيك حتا لنهار التهريب و فنفس البلاصة و فخلا
سارة: انا بغيت غير لهواء الطلق و صافي، كين شي مشكل
جواد: سارة انا عاقل ملي كنتي تهددينا بالمافيا و شهادت بوليسي راه كتساوي شهادة 60 واحد، معندي ما ندير ليك
سارة: ياك ا سي جواد، نسيتي ايام الطعام و الخبز و الملح لي شركناه
جواد (دوا مع البوليس): دخلوهم للداخل
مخلاو ليها ما تقول، و تحركات و ادريس خاصو تفسير طوييل و عريض ولكن خلاه لوقتو، دابا خاصو يقلب على حل لهاد الكارثة الطبيعية لي طاح فيها، مسكين ما دار لا بايدو لا برجلو حتا غيلقا راسو فالحبس و غيقولو ليه بلي سارة ديك الشنيولة لي خداما معاه مفيوزية، و هادشي لي كتر مبغاش يدخل ليه لراسو...
حطوهم فواحد الحبس، و مشات بركات سارة ببرود فالارض، و وقف عليها ادريس
ادريس: اش هادشي لي طرا
سارة: طرا لي طرا، دخلنا للحبس، متخممش راه اصلا غير الرجال لي كيدخلو للحبس
هزها من القب ديال التجاكيطة
ادريس(خنزر فيها حتا بورشات من الخلعة): غتشرحي ليا ولا غنوليو فشي حاجة اخرى
سارة (توترات): هانتا اشاف غير تهدن، غنحلو الموضوع، القصة طويلة و منقدرش نعودها هنا، غير تكالما نخرجو و نشرح ليك كلشي،راه غير كنت باغا نولي فالمافيا و بغيت ننتاقم منك لمهم خاصنا دابا غير شي حل باش نخرجو من هنا و نشرح ليك
ادريس (مع هي اصلا كانت مخشيا فالحيط و زاد قرب حتا لودنها): متخافيش نتي غتخرجي، ولكن للسبيطار
سارة (ديرا ايدها على وجهها): لا خليني غير نزل و نشرح ليك
لوا ليها ايدها وراها، و عطاها واحد جوج صليات حتا حسات بدراعها تفصلات و كملها ملي هز ايدو حتا هزها و عطاها للعنق، معقلاتش على راسها حتا طاحت ديخا... و لاحها للارض... دخلو البوليس تحديدا جواد لي كيعرف سارة من ايام القرايا، كانت ديما مضاربة مع الاساتدة و جايبينها للكوميساريا، و كتفلت حيت قاصر...
جواد (مع البوليس): نزلو هدا للتحت
شدو ادريس جروه، و جواد و الكوميسير هزو سارة باش يسعفوها للسبيطار، و غير بيناتنا راه معطاهاش شي عصاا...
حلات عينيها مشقلبة كيبان ليها راسها فالسبيطار، عنقها باقي مفصل عليها، بزز باش تحركات، قاست حناكها لي تنفخو و بركات مربعة على السرير
سارة: مقدرش يجمع ايدو هاد المتوحش... على الاقل خرجت من تما
ناضت و اول حاجة فكرات فيها هي عادل، خاصها تعيط على باباها باش تعلمو على العملية اولا، و خاصها تعرف اش هادشي لي دارتو هي من اللول، و خاصها تحاسب مع ادريس على العصا كاملا لي كلاتها... يالاه هزات تلفونها، لقات شي ابيلات من ياسين و الاغلبية من ماماها، حدها سيفطات ليهم مساج حيت مفيها لي دوي معاهم، و بغات تعيط لباباها ولكن وصلها مساج، و لقات بلي ادريس لي مسيفطو، واش هدا كيسيفط المساجات حتا من الحبس، حلات المساج كتقرا فيه (مدام خرجتي سيري لعند دنيا و ديو مي للسبيطار، انا غنبقا هنا حتا يحلو القضية، و ملي غنخرج غتشرحي ليا)
سارة: هاد ال... معنديش الكلمة المناسبة ليه، ولكن راه فكر على الاقل قدر يخرجني من تما
عيطات لباباها لي كان باقي فايطاليا، و عودات ليه كلشي من اللول حتا للخر، غير خلات شي زبيل دارتهم لراسها، لمهم دخلات ليه فالموضوع و قالت ليه على ادريس لي فالحبس، و بلي خاصو يلقا شي حل لهادشي... خرجات مشات ديريكت لدار ادريس، و مقدراتش تقول لدنيا ولا رباب شي حاجة
دنيا: سارة فين ادريس
سارة: لا غير جا عندو واحد الكليان على غفلة و قالي نجي انا نمشي معاكم
رباب: اه مشي مشكل غير خليه فخدمتو
سارة حدها سكتات و عونات هي و دنيا رباب حتا خرجات و ركبوها فلوطو، و مع سارة عندها داك البيرمي لي عطاتو لراسها هي لي صاكت بيهم و مشات وصلاتهم... مقدراتش نخليهم، يمكن حيت حاسة حتا بالدنب لي مدخلا ادريس للحبس و هوا عندو ما يدار، و يمكن مباغاش تكسر ثقة ادريس لي عطاها ليها ملي امنها على مو و ختو... مقدراتش تبرك و كل شوية كتمشي طل واش سالات الحصة ديال علاج رباب، حتا تفقصات، عاد خرجوها، و رجعتهم سارة للدار... اما فهد مكلف بالمحل على اكمل وجه...