مفيوزية في قلب الحدث

الجزء 3

الجزء الثالث
تعدات أمنية على سارة ملي بركات باغا تلبسها كسوة، خلاتها سارة حتا خرجات و لبسات سيرفيط كحلة و كونفيرصا مكدورش و جمعات شعرها كودشوفال... سمعات الهضرة و السلامات و الصوابات، و متشاورت مع حد و خرجات نازلا لعندهم... شافتها فتيحة حشمات وباش تغطي دارت ديك الضحكة الصفرة و جراتها عندها
فتيحة: ها هي بنتي و نوارتي ا الحاجة زهيرة
زهيرة: تبارك الله ا ختي فتيحة
دورات سارة راسها في الموجودين، كينا غير زهيرة و واحد البنت كتبان فالعشرينيات و معاها دري صغير، بقات شحال و هي كتشوف فالدري الصغير، شنو زعما العريس بحال كونان صغار اولا شنو، حتا دق الباب و هي تمشي امنية باش تحل بينما فتيحة و زهيرة كيدويو و ديك البنت غير كتشوف فسارة بابتسامة و الدري الصغير عينيه غير كيدورو، عاد دخل خالد من ورا امنية لي وصلاتو للصالون و مشات للكوزينة تشوف واش اناي تشحر... شاف خالد فسارة و دير ابتسامة باردة، سلم على فتيحة عاد برك حدا البنت، عند بالو الى شاف فسارة غتحشم و تحدر راسها ساعة جبهتها صنطيحة بقات كتشوف فيه و حتا هو نفس الشيء بلا حشمة بلا حيا حتى دوات ماماه
زهيرة: اش بان ليكم نخليو الدراري يدويو مع بعضياتهم و يتفاهمو
سارة: اه معندي حتا مشكل
فتيحة(قرصاتها): اللقوة
و دارت كتبسم ليهم اما خالد فابتسامتو مقدرش يحبسها من تصرف سارة
فتيحة: بنتي سارة خرجي نتي و خالد للجردة دويو شوية
سارة: لا الواليدا جردة عامرة غنطلعو غير لبيتي
ولا خالد خيف ليضحك قدامهم، اما زهيرة بقات غير كتشوف و توصلات لحل
زهيرة(شافت فالبنت لي حداها): بنتي امال سيري معاهم
خالد: مكين لاش هو غير حديث بسيط و غنرجعو
سارة: اه حديث بسيط
فتيحة بغات تلاح على سارة، و سارة ميكات على الوضع و طلعات فالدروج و خالد تابعها حتا دخلات البيت و سدو الباب. سارة مبردة على قلبها بركات فوق سريرها و خالد بقا كيشوف فالبيت كيف مقلوب سفاه على علاه
خالد: بين ليا مكيعجبكش التنظيم
سارة: صراحة مكيعجبني والو
خالد: سمعت بلي نجحتي فالباك
سارة: اه بالمعدل
خالد: باغا دخلي لافاك
سارة: لا مباغاش نقرا باغا ندخل للمافيا
خالد(بدا كيضحك): عندك ١٨ عام و كتفكري فالمافيا
سارة(بغرور): الرجولة مند الطفولة... غندخل للمافيا و ستندمون
خالد: و علاش غندمو
سارة: حيت كضحكو عليا... شحال فعمرك
خالد(برك فكرسي قدامها و جبد كارو ديالو): عندي ٢٦ عام
جبد بريكتو و بغا يشعل لقا سارة كتشوف فيه
خالد: باغا تكمي
سارة: عاد قطعت بغيتي الواليدا تفصلني
خالد(ضحك حتا شبع): متأكدة بلي نتي انثى
سارة: انا راجل و نص
خالد: شنو انا غنتزوج براجل بحالي بحالو
سارة: باغي توحل فيك مونتيف
بقا شحال و هوا كيشوف فيها حتى لاح داك الكارو لي فايدو فالارض و ترخا فوق الكرسي
خالد: نتي باغا تزوجي بيا ا سارة
سارة: بقات فباغا ولا مباغاش، بقات فواش عندك المؤهلات باش تزوج بيا
خالد: مالها وضيفة
سارة: شي حاجة بحال هاكداك
خالد: الى شافتك الواليدا هاكدا غتقلب وجهها عليك بمرة
سارة: انا غنتزوج بيك نتا ولا بمك
و استمرو في حدييييث لا ينتهي حتا دخل فتيحة الشك بلي كيديرو شي زبلة. ولكن معندها مناش تخاف امنية جاسوس خبير، من لي دخلات سارة و لاخرى كتشنط من لباب... غيكدب خالد الى قال بلي معجباتوش، واخا سمع عليها بزاف، و كان فالبداية باغي يتزوجها على مصلحتو، ولكن لقا روسو تعجب بشخصيتها... خرجو رجعو قدام العائلة، و دارت زهيرة لخالد
زهيرة: اوا ولدي اش قلتي
خالد: نشوفو بعدا البنت اش قالت
فتيحة(مع سارة): اوا سارة اش قلتي
سارة: اه معنديش مشكيل حتا لهاد الساعة
زهيرة: نقراو الفاتحة اولدي
خالد: بسم الله
لمهم مرت الامور بسلاسة، و تفرتكت الجقلة و فتيحة و نادية غيطيرو بالفرحة، و ياسين شدها ضحك على سارة، اما امنية فغطير بالفرحة على قبل سارة، و سارة قلبها بارد ممسوقاش للباشار بحال كتزوج كل نهار... غير تكات فبيتها و هي دخل عليها امنية كيف العجاجة
أمنية: اوا كيجاك العريس
سارة: مبيهش حتا لدابا
امنية: بعدا قابلا هي قريبا غنشوف وليدات سارة
سارة: ناقصني صداع، لا اختي مبغيتش البز
امنية: بحالا هوما بغاوك، تعلميهم يديرو الزيزوار فالتقاشر
سارة: بعدا فالتقاشر مغيحصلهم حد، و مالكي مكينفعش
امنية: الله يصبر خالد معاك
خليونا من هادو، غنمشيو لوحدين اخرين، عند نادية و فتيحة لي باركين فالبيت و سادين عليهم و فتيحة هازة التيليفون
نادية: اش غتقولي ليه
فتيحة: غنقول ليه لي وقع
نادية: كون جيتي عليا متعلميهش، هوا عمرو تسوق ليكم
فتيحة: متقوليش هاكداك ا نادية، عمرو منسانا ولا حتا خصصنا، غير الضروف و ما دير
نادية: صافي صافي عيطي دابا علميه
دوزات فتيحة النمرة، شوية حتا وصلها صوتو لي عياتو السنين
عادل: الو شكون معايا
فتيحة: عادل
عادل: فتيحة! ياك لاباس ياكما طاريا ليك ولا لسارة شي حاجة
فتيحة: لا لا غير
عادل: فتيحة كنقول ليك متبقايش تعيطي، انا مبعدركم غير باش نحميكم، الى لقاوكم غيقدرو يضغطو عليا
فتيحة: انا غير بغيت نعلمك بلي ليوم سارة تخبطات... اا بغيت نقول تخطبات
عادل: بصح؟ شكون خطبها
فتيحة: خدام بيلوط، سميتو خالد زيدان باه ميت و عندو ختو وحدا مطلقة بولد
عادل(بان عليه الغضب): رفضيه ا فتيحة
فتيحة(بصدمة): اويلي اش كتقول...