مفيوزية في قلب الحدث

الجزء 6

فيقا سارة مع الستة د الفجر و لبسات سيرفيط ديالها و خرجات مواكلا ما شاربا ما عالما حد غاديا باش تبدا خدمتها، ولكن ضغيا تكسرو ليها امالها ملي دوا معاها باباها في حضور عماد
عادل: غتخدمي معانا ولكن تحت اشراف عماد، و خدمتك مغتفوتش المقر
سارة: ولا ولا ولا و مشي هادشي لي بغيت، بغيت حتا انا نهز فردي ديالي نخرج نهرب الحشيش، نسرق و اهم حاجة هي نقتل الباشار
عماد(شاف فيها بنص عين و دوابسخرية): حتا تبقاي حية ملي تهزي الفردي
سارة: نتاعود دخل سوق راسك انا و بابا و نتا مالك
عماد: غير بلاتي حتا طيحي بين ايديا غنعود نربيك من اول و جديد
سارة: دابا نتفرجو
عادل: سارة عماد مغدينش توليو تجيبو ليا المشاكل، سارة انا ما عينت عماد عليك حتا عرفتو غيهتم بيك، و نتا ا عماد متندمنيش
عماد: صافي ا بوص غير خليها ليا و مدخلش كلشي غيدوز مزيان
سارة: اه الواليد مدخلش، باين ليا غنتفاهمو مزيااان
هي باغا طيرو بشوفاتها و عماد باغي يتلاح يقجها و يتهنا، اما عادل فتابعاه الخدمة، و واخا خيف ليخلي سارة ولكن معندو ميدير، هوا ديما خدمتو كتجبرو انه يسافر بزاف... خرجات سارة و عماد كل واحد باغي يشعل العافيا فالثاني، و المشكل ان عماد محاملهاش و خاصو دابا يدورها فالمقر و يعرفها على الشخصيات الرئيسية... منطولوش بزاف، سارة كطير و غتبقا طير هوا يديها للشرق و هي غاديا للغرب، يدوي معايا تعيرو، ولا غير كيجمع ليها ملي غيشدها غيبرد فيها غديد سنين...
برك عماد فالبيرو ديالو كيقرا شي وراق و سارة باركا قدامو
عماد:الى ملقيتي ما ديري متبقايش حاضياني انا
سارة: على جمالك الفتان
هز فيها عينيه، متكدبش السيد تيتيز حسات براسها كضحك على راسها
عماد: اوا متحضينيش
سارة: محاضياكش و نتا غير محسوس
عماد: لي كيلعب بالعافيا كيحرق ايديه و نتي كتلعب بيها ا سارة
سارة: واو رائع جميل قلتي كلمة مفيدة
ضرب فالبيرو حتا طارو لوراق من حداه
عماد: مكنضحكش معاك البرهوشة، كون مكنتيش بنت البوص كون صفيتها ليك دابا
سارة: حربش تحط ايدك عليا
خرج من البيرو و ردخ الباب قبل لا يرتاكب فيها شي جريمة قتل... و هي حطات رجل على رجل فوق البيرو و بغات حتا هي دير ديك اللعيبة ديال تلعب بالكرسي ساعة غير تحركات بالكرسي و هي تكربع... ناضت من الارض بالزربة خيفة ليشوفها شي واحد و يشمت فيها، و بركت كتجمع فالوراق لي شتتاتهم، و كتهز فيهم و تحط فوق البيرو قبل لا يحصلها شي واحد، ولا داكشي غير معربز فوق البيرو و ناضت وقفات نفضات حوايجها و تمات خارجة، و المكلخة وحلات ليها واحد الورقة فالتجاكيطا لي محلول نصها و مشافتها و ناضت خرجات... مشات ديريكت للدار حيت عادل سافر و عماد خرج، ولكن مخرجات حتا خلات جاسوس ديالها تما العفريتا دغيا دارت الصحاب... غير دخلات للدار و هي تشدها فتيحة و بركت تفتي عليها
فتيحة: ابنتي ايمتا غديري عقلك، راكي بنت و خاصك تبتي و نتي غير كطيري، لاش دخلتي لهاد المافيا تاني واش ناقصينا مشاكيل...
لمهم فتيحة مسكينة كتخوي الحجرة على والو، و سارة هضرة ماماها كدخل ليها من ودن و كتخرج من الثانيا، بقات حتا ناضت فتيحة مسكينةملي شافت راسها غير كتخوي الما فالرملة، و يالاه غتبدل سارة وهي طيح ديك الورقة لي كانت فحوايجها، مع ديك لي هزاتها لقاتها تصويرة ديال شي واحد كيبان فالعشرينات، و من ملامحو بينا ممعاهش اللعب. اول حاجة طاحة ليها على بالها هي مكتب عماد، و خافت لتكون شي تصويرة مهمة، داكشي علاش خرجات مع ١١:٠٠ د الليل و مشات لمقر. دخلات و الاجواء هادية و كتسلت حتا وصلات لمكتب عماد، غير بغات دخل سمعات صوتو لداخل كيدوي فاتيلي و بينا معصب
عماد: متقولش ليا انا مبغيتكش تعود ليا قصة حياتك، لوراق يحضرو هي يحضرو، لعملية مهمة و نتا كتقول ليا حتا واحد مدخل ليا للبيرو، الى محضرتوش ليا الوراق دابا غتحفرو قبوركم بايديكم...
بركات سارة غير كدوز بالدفال، و كتسمع فيه لاح التيلي حتا بان ليها من الشق د الباب تشتت، و بقا نص نهار و هوا كيردخ و يخصر الهضرة
عماد: اش غندير فالعملية و لوراق ناقصين، ولاد ***** ليوم نتعشا بشي ****
سمعاتو سارة غيخرج و هي تخبا حتا خرج و بعد عاد دخلات للبيرو، مسكين كانت فيه الحرب الاهلية كلشي مشتت و فوق البيرو واحد الملف حمر... جبدات التصويرة و مشات كتجري حلات الملف باش ترجعها ليه، ولكن الفضول و ما يدير، و بدات كتقرا فالعملية ليطالع ليه الدم عليها، و بالفعل عملية خطيرة، كدوي على ان شي واحد اولا هاد خينا لي فالتصويرة غيتوصل بشحنة كبيرة ديال السلاح و الحشيش و المجوهرات اش جابهم لبعضيلتهم الله اعلم لمهم جايا من البرازيل و الى وصلات للمغرب غدي التجارة ديال عصابتهم تنهار و طيح فالسوق السوداء و هوما معندهم حتا معلومة على هاد الشخص لي غيتوصل بيها اولا على مكان الشحنة لمهم عندهم معلومات بلا مولاهم. بقات سارة كتشوف فالتصويرة
سارة: الى قدرت نجيب ليه معلومات اكيد الواليد غيحيد داك الخرا من قدامي، خاصني نعرف شكون هاد المرض
جبدات تلفونها و صورات الشخص عاد خرجات من المقر بحالا عمرها دخلات....