مفيوزية في قلب الحدث

الجزء 14

ولات فتيحة مسكينة كتشوف سارة غير من الليل للليل، و امنية بلا منعود ليكم باقا مضاربة هي و ياسين، دابا تزاد المشكل ملي قال ليها متمشيش للرباط بوحدك، لمهم نخليو هادو فالحرب ديالهم، و نرجعو للحرب ديال سارة مع طوموبيلات
سارة (خاشية راسها كتصوب فواحد لوطو): فهد عطيني داك الساروت لي لفوق
فهد (مخشي تحت واحد لوطو و ممساليش): خرجي جبديه راني ممساليش ليك
سارة: راه غير حداك مدو ليا
باقي يالاه غيجوبها بان ليه ادريس لي هز الساروت، و تحدر على رجليه مادو ليها
سارة(شدات الساروت بلا مشافت شكون جابو): هانتا قدرتي تجيبو(دورات راسها عندو و هوا يبان ليها ادريس و وحلات ليها الهضرة)
ادريس: شفتك نص نهار و نتي فهادي، واخا تكوني كتقراي عليها الفاتحة
سارة (قلبات عينيها و رجعات تشوف فلوطو): حضيني انا
ناض و خلاها ساكنة فهاداكشي لي فايدها، و خرج... قالت تستغل الفرصة و تبعو تشوفو فين غادي، مع ديك لي غتهز راسها بانت ليها و البنت واقفا قدام المحل كطل لداخل بحالا كتقلب على شي واحد، كانت زوييينة و الشعر مجموع بواحد الطريقة بسيطة و العوينات القهويين و دوك الملامح الهادئة، لمهم كانت قوقة عند سارة... نسات سارة ادريس و مشات عندها و فهد سها مسكين كيشوف فالجمال قدام الباب...
سارة (وقفات عليها كي عزريل): اش حب الخاطر ا ختي
دنيا (بواحد الصوت رقيق و هادئ): سمحيلي على الازعاج، واش ادريس كين
سارة (فخاطرها): اش كيعجب الشاف فبحال هاد الانواع، يخ تفو
هو غير بيناتنا سارة غارت من دنيا، حيت دنيا الانوثة و اللطافة، و شوف هي كيف الرعدة، و غير بيناتنا عوتاني هي حتا معجبهاش ان ادريس تكون عاجباه وحدا بحال هادي، ندوزو للمهم
سارة: الشاف عاد خرج يتلاقا مع صاحبتو، كي شتيه هو كل نهار مع وحدة، و حنا حاكر علينا بالخدمة هنا، منصحكش ا ختي هو مشي شخص مزيان، تستاهلي ما حسن منو
دنيا مسكينة بقات غير كدور فعينيها، و تزيرات و ديرا ديك الضحكة الصفرة... و سارة بغات تكمل هضرتها، كون منزلاتش عليها ايد ادريس للعنقرة
ادريس: لمن خليتي ديك الخدمة
سارة (شدات من عنقها): حشوما ا شاف كنت غير كنسول البنت اش خاصها
ادريس (شاف فدنيا): تسنايني انا جاي
حدها هزات راسها بشوية و سكتات، و هوا جر سارة من قبها
ادريس (حطها حدا لوطو لي كانت كتصوبها): بلاصتك هنا، كملي خدمتك ليوم قبل ما تخرجي، و لا عودي باتي هنا
خلاها و خرج عند دنيا، اما فهد مسكين باقي كيشوف فدنيا بحسرة
سارة: امالك حتا نتا
فهد: زوينا
سارة (قلبات وجهها غيرة): راكم عواريتو نتوما مبقيتوش كتشوفو
فهد (دار شاف فسارة و رجع لدنيا): واش هاديك كاملة و مزويناش
سارة (دارت شافت فدنيا و ادريس لي كيدويو و بان ليها ادريس عطاها شي فلوس): اش بان ليك تكون زعما طيحا معاه و كتبتزو
فهد: لالا منظنش لا الشاف ولا هي من داك النوع
سارة: اولا زعما تكون مراتو و ولدو مريض
فهد: انا 4 سنين و انا خدام مع الشاف و عمري شفتو لابس شي خاتم
سارة: و شنو بان ليك نتا
فهد: منعرف، خلينا من النميمة دوزي لخدمتك
خنزرت فيه و رجعات خدامة، ولكن عقلها مشي معاها، و دازت مدة و بان ليها ادريس رجع لخدمتو و دنيا مشات
سارة (مع فهد بهدوء): فهد
فهد(كان حاط الساروت ففمو): ام
سارة: كي بنت ليك اول مرة شفتيني فيها
فهد (حيد السارة و جوب بتلقائية): لزبيانة
سارة (غوتات من الصدمة): شنوا
فهد (عاد سرات معاه اش قال): لا غير كنت كنضحك، نتي الانوثة واااع العار خليني عليك
هرب منها باش متبقاش تسولو، و خلاها ممستوعباش هضرتو، اويلي دابا زعما يكون حتا ادريس كيحساب ليه بلي هي... ويلي لا ميمكنش، اش هادشي... لمهم عاد ما زادت تفقصات... واخا كملات خدمتها وورجعات للدار ولكن بقا عقلها مشي معاها كيفكر واش ادريس يقدر يفكر فانها لزبيانة...
سارة(متكية فبيتها): واااع و لاش كنفكر فهاد الزبل، يمشي يق**، انا عندي تما خدما و صافي، مسوقيش يفكر فشما بغا
واخا بغات تنفض هاد الافكار ولكن بزز منها كتفكر...
سارة (خدامة تحت واحد لوطو): فهد ليوم شنو
فهد: لاربعا
سارة (تفكرات بلي غيخرج ليوم): شحال فالساعة
فهد: الثلاثة هادي
خرجات كتجري، و خلاتو مفاهم حتا زفتة... مشات كتجري بان ليها ادريس ركب فواحد لوطو ديالو، واحد المخرخشة ولكن كديباني بشما عطا الله، و خدات موطور من الكاراج و فهد مسكين يالاه غيلحق عليها يوقفها و يحدرها من الموطو، زادت و خلاتو...
كان غادي ادريس حتا وقف على غفلة فنص الطريق و خرج من لوطو، تخبات سارة ورا واحد الشجرة، و ادريس ربع ايديه
ادريس: اجي لهنا
مفهمات سارة ولو، مال هذا كيستدعي الجن
ادريس: سارة اجي لهنا
ماتت بالخلعة ملي عرفاتو حصلها، و بدات كترعد، اويلي يا سارة من ايمتا و نتي كتخلعي، تحدرات تشوف واش هازة زيزوارتها فالتقشيرة، ولكن معنها ما دير بيها حيت اصلا معندو ما يدير ليها... لمهم خارجت ديرا فيها اش بغيتي و هي راه غتموت بالخلعة
سارة (وقفات قدامو): نعام
ادريس (ببرود): لاش تابعاني
سارة: انا تابعاك، غلطتي ا خويا انا مكنتبعش الماركات بحالك...