مفيوزية في قلب الحدث

الجزء 4

الجزء الرابع
مبغاتش هضرة عادل دخل لفتيحة لراسها، واش هوما هربو من المافيا باش تعود تلحق بيهم، كيفاش ممكن هادشي، اه عادل مفيوزي و قال ليها بلي خالد حتا هوا مفيوزي و اكثر من هذا انه عدو ديالو... ولات هي و نادية هازين هاذ الهم، خصوصا ان سارة معارفاش حتا شكو هوا باها عاد تعرف قضية المافيا... مكانش عند فتيحة الوجه باش تقول لسارة بلي خالد ممزيانش ليها دكشي علاش خلات هاذ المهمة لنادية و هي تكفلات بانها تمشي عند زهيرة تقول ليها بلي مبقاوش باغين هاد الزواج و عيط ليها عادل باش يعلمها بلي غيجي عندها و يديها معاه لدار زهيرة... دخلات نادية لبيت سارة في حين فتيحة كتوجد راسها على قبل تمشي مع عادل لي جاي عندها... بركات نادية مقابلة مع سارة و سارة مرتاحة فوق السرير كتلعب فتيليفونها
سارة: اش طاري ا خالتي
نادية: بنتي الموضوع على خالد
سارة: مال هاذ خالد
نادية: الزواج تلغا
سارة:و علاش
نادية: هوا... الصراحة...
سارة شافت فيها بنص عين و عرفات بي الموضوع فيه ان... نادية توترات من نظرات سارة، و سارة عرفات بلي نادية واخا تسولها مغتقولش شي كلمة مفيدة، فكرات اول حاجة فماماها، حدها دارت السبة بالعطش
سارة: خالتي انا جاية غنمشي نشرب و نجي
معاقت نادية بوالو، عاد كملات عليها امنية لي جات هي و ياسين كيتشكاو على نادية مضاربين عوتاني... خرجات سارة سلتة و مشات لبيت ماماها، و وقفات قدام الباب كتسنط على فتيحة لي كتهدر فالتيلي
فتيحة: وصلتي؟... اه هاني واجدا... صافي خليك تما انا خارجا... واخا
تخبات سارة ورا الباب حتا خرجات ماماها و تبعاتها بسقيل... خرجات فتيحة مزروبة و سارة كيف النينجا من وراها و نادية على نيتها كتسنا فيها فالبيت، بقات سارة كتشوف ففتيحة و هي كتركب فلوطو ديال عادل
سارة: اياه الواليدا ركبي و زيدي، و الله لمعرفت شكون هاد خينا لرجعت للدار ليوم
عندها الزهر ديال لهنود لقات سفيان جاي بلموطور ديالو، يالاه نزل يسلم عليها و هي تركب على الموطور
سارة: نشوفك من بعد ا سفيان راني مزروبة غناخد الموطور ا خويا
باقي مستوعبش خدات ليه الميطر، رزيقو الوحيد خداتو ليه سارة و انطلقت تسابق الريح تابعا ماماها، غير هي دارت الكاسك باش متعرفهاش... مسافة الطريق، و وصلات فتيحة و عادل لدار خالد، و سارة تخبات بعيد و نزلات كطل عليهم... وقفات قدام الباب و بقات كتسنا دقيقة جوج ثلاثة نص ساعة ساعة لاروب عاد خرجو، و هي تحبا سارة عوتاني و بقات حاضيا ماماها من بعيد، و فتيحة شد ليها عادل فايدها و كانو كيدويو، شي لي خلا سارة و فضولها يقربو بجوج حتا تخبات ورا لوطو و بدات كتسنط لهضرتهم
عادل: هوا مكيعرفنيش، و واخا يعرفني ميقدرش يقرب ليها و اناحي
فتيحة: خيف عليها ا عادل، حنا هربنا من هادشي باش نحميوها
عادل: سيري نتي دابا و عنداك تزبليها و تقولي ليها شي كلمة
فتيحة: احياني هاديك بنتك خارجا بحالك راسها قصح من المسن كطير كون ما انا لي ولدتها كون قلت واها ولد
سارة شدات رجليها عندها لتطير عليهم متلبسين و كملات المحاورة الشيقة
عادل: نتي عارفا انني منقدرش نستاقل من خدمة المافيا حيت انا رئيسها، ولكن بنتي معندهاش دخل
فتيحة: مخاصش يكون عندها دخل، مبغيتش تولي بنتي متابعة من قبل الشرطة
عادل(عنقها): معندك مناش تخافي مادام انا هنا نتوما فعينيا
فتيحة: لهلا يخطيك علينا
راه قلت ليكم محادثة شيقة، بحال داكشي ديال لهمود، لمهم مسلسل درامي و صافي... ركب عادل فلوطو حيت فتيحة غتمشي بوحدها باش زعما متعيقش سارة، ساعة لي دا شي داه و لي زلق جا على عين قفاه، و صافي سارة عرفات بلي الواليد مفيوزي و الواليدا مخبيا عليها بحجة ان باباها المحترم عندو ضرف، كين ضروف ضروف ضروف....
زادت فتيحة خلفة مع الطريق، و غير تحرك عادل بلوطو و هي تبعو سارة بالموطور، فينما مشا لمهم توصل عليه، او عرفتي معنا ان باباها يكون مفيوزي راه شي حاجة سوبركول راه فانتاستك راه كريت، لمهم زغب عادل الله مشا لمقر العمل لي كينضم فيه اجتماعاتو مع العصابة، و دخل عاد سارة نزلات من لموطور و بقات شحال و هي كتشوف فالفيلا لي قدامها، ايهالواليد نتا عيش هنا و حنا باركين فديك الخربة، ولكن مشي مشكيل قلب سارة بيض و ضغيا كتسمح... اخدت نفسا عميقا جدا جداقبل ما ترجل و تمشي تحل باب الفيلا كيف العجاجة و الدجاجة
سارة(كتغوت): باااابااااا يااا باااااباااا
خرجو شي رجال باغين يوقفوها ساعة معاكن، كيتصرفو مع قردة، بركات تنقز فيهم بالواحد بالواحة و باقا كتغوت حتى سمعات صوت عادل كيغوت
عادل: اش طاري هنا
دارت شافت فيه ببرود، و سرعان ما تحولت نظرة البرود لعين قطة بريئة
سارة: يا بابا يا حبيبي فين غبرتي عليا هاد السنين كاملة
عادل(مصدوم): سارة...