زوجة لسبعة أيام

الجزء 03

طلعتت و انا محطمة كُلياً ، مستاءة

يمكن عشان كنت بعتبرهم عيلتي و اسرتي ماعارفه بس انا مخنوووووقه شديد ،، رجعت بنفس الطريقه كالعادة ، زحمة و مدافرة و حاجة تحرق الروح ،حمدلله بس ..

رجعت البيت لقيت خالتو صفية نايمة في السرير التاني و حبوبة كمان نايمة و بتآووى ، عرفتها دايرة الحمام ،، قلت ليها حبوبة

قوووومي نور عيوني انا ، قومي غاليتي انا قوومي يمة قومي اوديك الحمام .. فتحت عاينت لي ، عاينت لي كدااا زي فرحانه بي جيتي و ف نفس الوقت حزينة شديد ،

قومتها ، تكلت فيني .. خالتو صفية قالت لي. يا بتي حبوبتك تقيله عليك اقيفي اساعدك ،قلت ليها لالا انا كان علي اشيلا فوق راسي و أجري بيها .. قالت لي غريبه !

قلت ليها غريب الشيطان ، الغريب شنو ؟

قالت لي عودك رقيق بتجيبي القوة دي من وين ، طبعا انا حبوبتي سمعا بعيد ، بس سبحان الله سمعتاا ،، ادتا عين كداا ، و قلت ليها كان ممكن تدعي لي يا خالتو انه ربنا يقويني ، حيل الانسان مع الوقت ببرد لكن الا حيلي لي حبوبتي ما بيبرد ،و عمري م حسيت انها تقيلة علي زي ما انتو بتشوفوو ، انا حياتي بيها و ليهاا و افديها بي روحي ،، قالت لي والله انا ما قصدتا حاجة يا بتي بس كان قصدي اساعدك ..قلت ليها تسلمي ..

خمت توبا وقامت دايرة تمرق ..قلت ليها اقعدي اتغدي معانا .. قالت لي لا راجلي بكون منتظرني ،قلت ليها شكراً ليكي مرة تانيه ، بس قبل تمشي كنت دايرة منك طلب ،بس انتظريني اودي حبوبه الحمام و ارجع ليكي ، قالت لي سمح ...

شلتا حبوبه ، دخلتها الحمام ، و خلصتا و رجعتها سريراا رقدتها ..

قالت لي خير ! قلت ليها خير تعالي معاي قداام ، قالت لي ارح ، رغم ان حبوبا سمعها بعيد لكن برضو ، المهم سقتها لحد الباب ، و قلت ليها ، معليش بس عشان حبوبه م تلاحظ ، قالت لي م مشككله قولي طلبك ،، قلت ليها، زي ما انتي شايفه وضعي و البيت و حالي يعني ، شوفي بأختصار انا محتاجة لي شغل و قصدتك لأنك اقدم مني في الحلة ، وانا بشتغل شغل بيوت ، بطبخ بكنس معندي مشكله حاضنه برضو م عندي مشكله بيت مناسبه ، مطعم يغسل عدة ، م عندي مشكله ،، عاينت لي بأستغرااب ، قالت لي معقوله !

قلت ليها م معقوله ليه الشغل ما عيب ، قالت لي فعلاً بس انتي بت حلوة ماشاءالله و كونك تشتغلي شغل زي دا ، حتعرضي نفسكلتعديات و حاجات انتي في غنى عنها ، قلت ليها معليش هي دنيا ، وممر و ليست مستقر ،، قالت لي طيب ما بوديكي الا لناس يكونو كويسين ، و بشوف وبكلمك و في وحدة بعرفا بكلما ليكي و ان شاءالله ، بتتسهل ، قلت ليها ان شاءالله ..

انا استأذنك بعد دا ياخالتو لسه حعمل الغدا و حبوبه عندها علاجات .. قالت لي امشي امشي انا بمش كمان لراجلي ، يلااا

طلعت مني ، طوالي مشيت التُكل ( لانه ما تامي مطبخ) عندي عدس ، طلعتو شديتو و زبطتو طمام و قعطت جمبو سلطه ، جبتا صينيتي ختيتا و قعدتا ااكل في حبوبه و اكل معاها ..

بالجد يمكن م تصدقوني لو قلت ليكم هنا انا بلقى ساعدتي ، ياخ لمن تضحك انا بحس ان الدنيا دي ما شايلة فرحتي ،وبتنبسط اكتر لمن ادندن ليها و اغني ليهاا ، طبعا الا اعلى صوتي ، بس على حسب المكان لو هادي بتسمعني ، لدرجة مرات بشك ان السمع دا ليهو علاقه بي نفسيتا بالجد والله ..

المهم هي سعادتي و دنيتي و امي و ابوي و اختي و اخوي و كل حاجة ..

خلصنا الغدا ، مشيت عشان اديها حباية ، مسكت العلبة لقيت دي اخر حبة ، و الحبوب دي العلبة منها بي 650ج ..

اديتا ليها ، و راجعت باقي العلاجات لقيت ناقصه قطرة كمان ..

المهم بعد اديتا ادويتا ، شلت صينيتي غسلت عدتي ، و جيت رقدت جمبها في السرير ..

اتزكر من سنين فاتووو انا كنت نايمة قدامها و كانت محتوياني ، الليله هي راقدة قدامي و انا محتوياها ، سبحان الله على الدنيا و حاال الدنيا ...

( في جانب تاني )

_يا بت انتي في شنو مالك قالبه خلقتك ككدا

*في شنو يا امي ! مالك واقفه على الوحدة اي حاجه اسويها ما عاجباكم

_اتكلمي بأدب و وطي صوتك

*حاضر يا امي انا أسفه

_انتي ما مجبورة

*لا مجبورة

_جابرك شنو ! يمشي زيو ، زي الفاتو

*جابرني حال البلد ، الفقر و الغم الانحنا عايشين فيهو ، حمدلله من حظي السمح ابوي وضعو معقول اللي هو ماكلين و شاربين و لابسين ، الله اعلم ، بكرة بعد بكرة يجيني واحد لا ياكلني لا يشربني ..عرفتي الحابرني شنو ؟

_دا منطق اسي ، اسمعي يا بتي ربنا م خلق زول عشان ينوم جعان ، و كان همك الاكل و الشرب ،دا رزق و الله بجيبو

*المعيشه عامتاً يا امي ، يعني معقوله مافاهماني ،،دايرني افهمك حال بلدنا الزفت الواصله ليهو ! و ين القى واحد يعمل لي احسن عرس ، يلبسني احلى لبس ، يسفرني ، اولادي لمن يجو ، يجو يلقو ابسط حقوقهم متوفرة يا امي ما اعرس لي واحد كحيان يمرمطني باقي عمري و غنية ظلموني زاتا ما بتحلني ...

_طول ما انتي بتفكري بالطريقه دي ما حتعيش ، حتى لو ربنا تمما علي خير مهما راجلك صرف ليكي و اداكي حتحسي بالنقص

*للاسف يا امي زمنكم ما زي زمنا، ال

قيم و المبادئ حقتك دي في جيلنا و فترتنا الحالية دي ما بتعيييشك ، من حقي اركب عربيه علي الاقل ما اتشحطط في المواصلات ، هئ ولا صحذ هو وينو البنزين زاتو للعربات دي ،لكن اخير من العدم ، على الاقل يمرقني براا البلد دي ....

يتبع.....