بالنسبه لي شلت القروش ،
مشيت اشتريت الصابون و كيسين شعيريه و بيض و جبنه و طحنية .. رجعت البيت ، غسلتا ملابس انا و حبوبه ، و فرشت الملايات التانيه ، و قعدت اتكلم مع حبوبه لمن حسيت حسي اتنبح لاني بعلي صوتي عشان تسمعني ، لمن نمنا ....
صحيت الصباح ، عملتا حاجاتي كلها لي و لي حبوبه ، الساعه 10:30 طلعتت ، مشيت لخالتو صفيه وريتا اني طلعتا عشان تطل على حبوبة ..
مسكت طريقي و مشيت البيت الودتني ليهو خالتو صفيه ، المرة رحبت بي تمام و عاملتني كويس و صممت علي افطر ، انا رفضتا ، بديت معاهم بي نضافة البيت ، ماشاءالله سيراميك و قزاز و بيبان دعكتهم دعك ، لحد العصر النساوين ديل كترو الضيوف كترو و الشغله جاطت ..
جاتني بنت تقريبا في عمري ، فجأة جرتني من يدي من غير م تتكلم ، جاراني و انا ماشه ، طلعت بي فوق ، لحد ما وصلنا كان المكان المقصود غرفتا .. دخلتني و قفلت علي الباب و هي طلعت ... طبعا اترعبت و خفتا كداا و اساسا انا متوترة و بالي مع حبوبه ، استغربت ف تصرف البت دا نشف لي دمي ، من محلي م اتحركتا ، واقفه و حاسه جسمي دا كلو بينتح ... بعد شويه الباب فتح ،جات داخله البت و معاها بشكير .. مدتو لي و انا كتنحه فيها ، قالت لي امسكي ! قلت ليها لي انا ؟ قالت لي ايوة في زول غيرك هنا .. ومشت علي دولابها ، طلعت لي تقريبا بجامه ، قالت لي هاكي غيري ملابسك دي مبلوله ، حتمشي كدا كيف ، قلت ليها بس انا لسه ما خلصتا شغل ، قالت لي كفاك تعبتي من قبيل شايفاك شغاله ، انا كلمت امي م عندها مانع تمشي بعد دا .. قلت ليها جد ؟
قالت لي ايوة بس غيري ،حطلع انا اخدي راحتك .. فعلا طلعت لي من غرفتتا ، طلعت عبايتي المبلوله و ملابسي اتنشفت و لبستا البجامة الادتني ليها ، جاتني راجعه بي كييس، قلت ليها دا شنو قالت لي غداكي عارفه نوعك دا ما بياكل الا مع اهلو ، عشان كدا ختيت ليكي كدا ، قلت ليها لالالا م دايرة انا ، قاالت لي حزعل منك وبعزين انا زي اختك ولا ما بتعتبريني كدا ! ( ياخ انبسطتا اول مرة اقابل زول يعاملني كويس خصوصاً من الطبقه دي )
قلت ليها حاضر حاشيلو ، و مشيت اللبس عبايتي قالت لي مبلوله ، اكيد م حتلبسيها ، و طلعت لي عبايه من حقاتها ، قلت ليها بنتظرهم ينشفو عشان اخلي ليك حاجاتك ، قالت لي انتي هبله ؟ ديل حقاتك خلاص ، قلت ليها لالالالااا قالت في شنو ي بت مش اتفقنا انو نبقى صحبات ! خلاص م تكسري بخاطري ، يلا اللبسي قبل صحباتي وبنات اهلي يجو حيشغلوها لي ، قلت ليها حاضر ،، قالت لي اسمك جميله ؟ قلت ليها لا اسمي علياء ، قالت لي ظلموك كان يسموك جميله ، و انا لو عندي ربع ملامحك دي بفتري ،ما شاءالله ربنا يحفظك لأهلك .. لبست العبايه بي طرحتا و شلت ملابسي المبلوله ف كيس و نزلتتا ..
و انا ماشه ، نادتني المرة ، قالت لي دي الالف جنيه ،والباقي بعد تلاته يومين و شكرا ليكي ، قلت ليها خالتو صفيه مش قالت تديهم ليها ؟ قالت لي دا حقك انتي وانتي التستلميهو ، يلا نتلاقى بكرة م تتاخري ، قلت ليها تمام. ..طالعه وانا عايزة اطيييييييير من الفرحة ،مبسووووطه شديد .. اول حاجة فكرت فيها امشي الصيدليه اسد ديني ..
ماشه لحد وصلت الصيدليه ، عاينت من برا م شفت زول و تلفوني م معاي ، حاولت الذ الباب القزاز لقيتو مقفول ،انتظرتت شويه ماف زول جا ، رجعت البيت ..
من جيت داخلة حبوبه تعاين فيني مستغربه الملابس الحلوة واالغريبه ،
( في جانب رحاب)
* داير كم ؟
_انا ما بقوليكي كدا عشان تساليني داير كم
*عارفه حبيبي بس مافيها شي لو وقفت معاك ف النهايه كانت في بينا علاقه .
_قصدك شنو بي كانت ؟
*فعلا كانت يا ايمن اسي انا ااتزوجت وانت ربنا يديك بت الحلال
_خلاص نسيتيني ، بقيتي تحبيهو ؟
*لا يا ايمن انت عارف انت بالنسبه لي شنو
_للاسف بقيت ما عارف
*لا عارف والله عارف
_بتحلفي كدا ليه ؟ ما تحلفي لي كدا !
*طيب بس عشان تصدقني
_طيب بصدقك من غير م تقولي كدا انتي عارفاني م بقتنع
*طيب قصدي انت عارف بتعني لي شنو
_لا م عارف ، لو بتحبيني خلينا نتلاقا
*ما بقدر اليومين عندي مناسبة بت خالتي
_لو عايزة تثبتي لي حبك حتتصرفي
*حاضر يا ايمن ، عظان خاطري خليني اديك القروش
_لمن نتلاقى نتكلم في الموضوع داا
*حاضر ...
*في الحلقه الجاية*
_وشك مالو ؟
*مم مافي شي
_انتي في زول ضاربك يا علياء؟
*لالا
_ماتقولي لي لالا
*ما تدخل في حياتي لو سمحت
_لا حاتدخل ، اذا بتتعرضي للضرب وريني عشان اقدر اساعدك
*كل الحصل ات حلقتتا
_قالي ،دا اثر زول ضاربك كف
*عن ازنك ّ..
_عليا استني ...!
*م تجي وراي لو سمحتت
_عليا .....
يتبع....
أنت تقرأ
زوجة لسبعة أيام
General Fiction📝 بقلم: سحر سمير (حقيقية) .. في حاجات بتحصل من نقوم نلقاها قدامنا و بتحدد مسار حياتنا الجاية كلها ، حاجات انحنا ما اخترناها لكن اتفرضت علينا ، زي امك منو ؟ و ابوك منو ؟ اخوك منو ؟ اختك منو ؟ ... بس في حاجات تانيه برضو بتحدد مسار حياتنا و دي بتكون ا...