زوجة لسبعة أيام

الجزء 14

كالعادة ، صحيت الصباح ، انجزتا اموري

و مشيت لخالتو صفيه وصيتا علي حبوبة و ختيت ليها المفتاح واتوكلتا طلعتا ، مشيت دغري على البيت ، 11 طق كنت قدام الباب ، سامعه صوت الونسة والحريم ..

خبطتا الباب ، لقيتو فاتح مع هبشتي بس فتح ، دخلتا ، و انا عندي حتت الاستحاء دي خصوصاً في البيوت ، بعاين جاي و جاي بتلفت ، لمن لقيت ام البت الامس ياها ست البيت و معرفه خالتو صفيه اسمها ( حنان ، عشان نختصر المسمى) ..

من شافتني ، ناولي دا و جيبي دا ، بعداك حتى سألتني من الاكل و صممت علي اكل ، ختت لي في المطبخ ، اكلت بس عشان شعيرية ، جريت البمبر و قعدتا ، باكل كدا جات وحدة شابه كدا عاينت فيني من فوق لي تحت بي قرف و مشت ..ّ

خلصتا و غسلتا صحني و ختيتو ، طلعت برا ، قعدوني في طشت كبير ملان عده

طلعت عبايتي و طرحتي و قعدتا ، كل ما اقول خلصتا يردموها لي تاني ، جاتني البت الامس ، سبحان الله جات باستني عشان يدي في العده م حقدر اسلم ، لمن خلعتني ، وعاينت ليهاا ، قالت لي اززززززيك علوشة ، قلت ليها كويسه ، قالت لي واااي غسلتي كل داا ، طوالي قالت لامها ، ليه كدا يا ماما حرام تغسل دا كلو خليها تقوم لكن ، و بعدين صحباتك ديل متلمين كدا عشان الونسه ليه ما بساعدوك هم، امها قالت ليها يا بت عيب وطي صوتك و تعالي اتكلمي معاي من قريب ، قلت ليها دا شغلي و انا جاية عشانو ( حسيت انها مدلعه و كدا يعني ليها كلمة مسموعه كدا ، بس استغربت من تعلقا بي ، قالت لي لا لكن ما قدر دا حرام ، دي عدة مناسبه يا علوشة ، قومي معاي ، بقيت بعاين في امها و بتها بتشد فيني عشان تقومني من البمبر ، لقيت امها خاته يدينها في وسطها ،و قالت لي قومي معاها ، ارتاحي شويه و تعالي بعدين اخر حاجة بديك جلابية الحاج اكويها لي ،بتعرفي تكوي مش ؟ قلت ليهاا ااي ، قالت لي تمام بناديك ، قلت ليها سمح منتظراك ، و طوالي جرتني و مشت بي ..

( في جانب تاني رحاب واحمد )

*الو رحاب

_هاه حبيبي

*طمنيني عنك !

_انا كويسه حمدلله

*كيف الجو عندك ؟

_ياهو قاعدة مع البنات

*خلاص لمن تزهجي اتصلي لي اجي ارجعك

_قلت ليك مافي داعي يا احمد

*لا يا روح احمد ما بخلي مرتي تتجرجر براها في المواصلات و انا في ..

_صدقني انا بتصرف

*رحاب ، سمعتيني قلتا شنو ؟

_خلاص تمام (''في سرها'' افففف اتفكا منو كيف اسي يا رب، يا رررررربي القاها منو ولا من ايمن ، اسوووي شنو ، اسوي شنووو ! )

*يلا زي م اتفقنا ، سلام

_سلام ....

اما انا ساقتني البت دي زي امس ، ودتني غرفتا و بتتونس معاي ، طبعا خجلانه اسألها من اسمها منو باقيه لي بايخه .. فجاه بتعاين فيني ، و قالت لي ، بتعملي شنو انتي لجسمك ما شاءالله ، قلت ليها بعمل شنو كيف ؟ قالت لي واااي من الاستهبال ماف بت ما بتمسح لونك دا دايرة تقنعيني انو ساي كدا ! قلت ليها امسح شنو انا كداا ، قالت لي وواي منك انتي من نوع البنات الما بحبو يقولو بعملو شنووو ، اكععب نوع نوعك دا يا علوووشة كذاااااابة لقيتك ، طبعا من جواي اتأثرتا و كلمة كذابة دي ما بريدا بتحرق لي روحي ، و من غير م احس لقيت نفسي مشيت مسكت المصحف وقلت ليها والله ما بسوي شي ،، اتخلعت فيني و انا زاتي حسيت اني قلبت الهزار جد ، قالت لي صدقتك انا بس كنت بشغلا ليكي ساي و قصدت اقوليكي لونك سمح الله يحفظك وانتي زاتك سمحه .. قلت ليها شكراا .. قالت لي دقايق اسي بجي

بقيت قاعدة قبلي ... شويه كدا و الباب فتح جات داخله و شايله كيس ، ختتو لي جمبي محل قاعده ، و بعاين فيها ، قالت لي ما تعايني كدا طبعا الكيس دا حقك !

عاينت ليها غلبني ارد لانها بتصمم علي كلامها، و ف نفس اللحظه دي سامعه صوت جوطه واغاني في غرفه جمبنا واغرب شي هي سايبة كل داا ، و شاغله نفسها بي انا .. قالت لي مالك ؟ قلت ليها دا شنو ؟

قالت لي دي حاجات بسيطه حبيت اهديكي ليها بما اننا بنلبس نفس المقاس ، قلت ليها طيب لو ما اخدتها حتزعلي ؟ قالت لي النبي (ص) قبل الهدية ، انتي حترفضيها ؟

قلت ليها عليه الصلاة و السلام ، لا ما حأرفضا شكراااً ، قالت لي م بيناتنا شكر ، بس انا بعد دا لازم امشي لي صحباتي وبنات اهلي بايخه هم في بيتي و م اقعد معاهم !

قلت ليها العروسه اختك ؟ قالت لي لا بت خالتي امي وامها بنات خالات ، قلت ليها ربنا يتمم على خير ، امشي ليهم انتي ، انا حأتم شغلي و ارجع البيت ، قالت لي لا طبعا لازم تقعدي يا علوشه ، قلت ليها حبوبه قاعده براها ، قالت لي حبوبتك ! قلت ليها ايوة لازم اطلع عشان كدااا ، قالت لي سمح وامك وينا ؟ سكتا مسافه رغم اني متصالحه مع وضعي لكن زي الكأنه دي اول مرة يجيلو لي فيها خبر امي ميته .. قلت ليها امي ربنا يتولاها ب رحمته .. عاينت لي كدااا للحظه حسيت انها عايزة تسالني اكتر و تعرفني اكتر .. فجأة حضنتني و قالت لي انا اسفه لو عارفه الاجابه حتألمك كدا ما كان سالتك ، بس من اول لحظه سفتك بتشتغلي شغل زي دا في حين ان الفي عمرك لسه بيقرو و يتع

لمو صعبتي علي ...

يتبع .....