زوجة لسبعة أيام

الجزء 35

كنت بقوليكي ممكن اخلي غرفتك لبكرة ؟

_اي ااي عادي ( م مركزة معاي)

طوالي خشيت الحمام لبست عبايتي و انا طالعه لقيتا مقربة التلفون و بتتكلم ( بتسجل) قالت نص ساعه وتعاال ههههههههه

.. جيت مارقه ماظه بجمبها ، قالت لي دا شنو انتي لسة هنا ؟

قلت ليها اي هدا ياداب طالعه !

قالت لي طيب طيب امشي .. قلت ليها تمام ، و طلعتا ، جريت على الشارع واقفه يمكن ساعه الا ربع عشان اركب لي حاجة توصلني ان شاءالله نص المسافة ..

بقيت بتمشي برااي رايحه جاية ، و بعداك انتبهتا اني جواا الحلة يعني ما شارع رئيسي ، طوالي اتحركتا على الشارع و بتكلم براي زي المجنونة ..

لمن وصلت الشارع واقفه واقفه لمن جا بص

بس ركبتو ، و نزلتا كملتا بي ركشه ..

( في جانب عبير)

*تصدقي يا امي انا ما عارفه مالي ، لكن والله بالي دا طوالي بقى مشغول بالبت الاسمها علياء ديك تتزكريها !

_علياء .... علياء .. !

*يا امي اابت الحكيت ليكي قصتا ياخ ، سمح البت السندتيها لمن رغدة دفرتا و امس كنا بنتكلم انا واحمد ....

_اهاااااا ايوة عرفتها ..

*بس ياها ..

_طيب في حاجة جدت عليها ولا شنو ؟

*لا ما عارفه والله بس كدا صعبانه علي بفكر فيها خصوصا لمن يجي الليل ، يا امي قاعزه ف بيت ما بينقعد والله و دايرا اساعداا ..

_طيب يا بتي مش احمد قال محتاج ليها عشان رحاب و مشيتو ليها و وافقت !

*فعلاً بس احمد ما حيقعدا معاهو يا امي و بيني و بينك رحاب طاردة انا خايفه عليها براكي عارفه رحاب ، غايتو من اسي وريتك ذا امي لو حصات اي حاجة خلذنا ناخد في البت دي ثواب نجيبا نقعدا معانا هناا عليك الله يا امي ..

_شوفي يا بتي ، انا ما مرة كعبه ولا قاسبة ، لكن كمان يا بتي حرص و م تخون ، البت دي معرفة متين ! برضو مهما كان انحنا ما بنعرفا ، و بالمنطق كدا ، بت زي دي مقطوعه من شجرة !

*لا عندها حبوبتها قاعده معاها و امها وابوها متوفين وهي وحيدة !

_طيب اعمامها وين ! خالتها خيلانها اولاد اهلها ، ديل كلهم مافي معقول لكن ! على كلاً يا عبير انا ما بقوليكي ابقي كعبه ولا اعملي حسابك منها ، بس انا بتكلم بي منطق و عقل و نخلي العاطفة دي براهاا ..

*انا عارفه ان معاكي حق بس يا امي كمان انحنا كبشر لينا نظرة في بعض ، و الله يا امي البت مسكينه تحننك ياخ لو قعدتي معاها يوم كامل كلامها زا ممكن تعدي على اصابعك ، بيتها زاتو يحننك ، والمسؤلية حقت حبوبتها ، يا امي بغض النظر عن اهلها وين . خلينا نعاين هي ويين ! ربنا بيوقف الناس لبعض و يمكن ربنا ختانا في سكتها لخير و انا بتمني تجي تشوفي بعينك وقتها حتفهميني انا بتكلم في شنو !

_انا ما قلت ليكي ما تساعديها ، لا ساعديها بس ما تتعمقي معاها وخلي في مسافه ، ف النهاية هي غريبه ، يعني ممكن تديها قروش ، ممكن تودي ليها اكل كدا ...

*امي دا كلام شنو ! انتي ما فاهماني ، البت دي م شحاته يا امي البت دي من النوع العندو عزة نفس و كرامة ، ما الزوله التمد يدها ، يا ماما انحنا في زمن كان ممكن البت دب تمشي في سكة غلط و تطلع قروش من غير م تمشي تخدم و تتهان في بيوت الناس ، و م تنسي ان م عندها ولي يسألها ، دا لو فعلا هي بت كعبه ، الغلط ساهل يا امي فهمتيني ؟

_لكن حيرتيني معاكي !

*ما حيرتك ولا حاجة ، لازم يوم نمشي ليها بالغداا و براكي حتشوفي ..

_عبير قومي سوي لينا جبنة صدعتي بي الله يهديكي ..

*يا امي بونسك ياخ بكرة اعرس اخلي ليكي البيت خفيف و تتزكريني وتعرفي قيمة ونستي دي ..

_يا لطيف منك بت كلامها زي الدراب ، ياخ عرفناك حتعرسي خلاص الرووووووب منك ..

*حبيبتي يااخ انتي الله يخليك لينا يا رب ..

_امين عبورتي ، م تختي لي سكر خالص ..

*لكن القهوة دي مُرة شديد !

_ااي بس جيبيها كدااا ..

*طيب ..

وصلت البيت ، لقيت سلمى واقفه لي برا ..

*هلا سلمى ازيك ؟

_حمدلله كويسه

*واقفة من بدري ؟ّ

_يعني ما شديد .. اااايواه يا علياء قبل انسى في مرة جات كانت برضو منتظراكي و لمن اتاخرتي مشت و قالت بتجيكي مرة تانية !

*غريبه ، طيب ما قالت ليكي هي منو ولا عايزة شنو ؟

_ما حبيت اتطفل بس ما غريبة علي ، غايتو تشبه لي وحدة من صحبات ماما الكوار ديل .

*م مشكلم لو عاوزاني في حاجة مهمة بتجي راجعه ، خلينا ندخل انا ..تعالي

_ انا بس حبيت اطل عليكي و ماشه

*حتمشي طوالي كدا ! لازم تدخلي ..

_صراحه ما عايزة اضايقك يا علياء ..

*سلمى ، ادخلي ادخلي و لزي الباب خليني اشوف حبوبة دي ..

_طيب ..

( في جانب رحاب )

* ايمن انااااا..

_ما ايمن ولا حاجة يا رحاب انا بحبك وانتي بتحبيني يبقى تسمعي كلامي عشان ما اسوي حاجة انا ما داير اسويها ..

*البحب ما بيأذي يا ايمن ..

_والبحب ما بيفارق يا رحاب ، حتى بعد خليتيني و عرستي انا حبي ليكي ما قلّ ولا فكرتا اخليكي ، زي ما انتي ما عملتي ..

*ايمن نكون واضحين ولا نقعد نلف و ندور لبعض ..

_قولي العندك ..

*الحياة دي بقت عبارة عن مصلحة ، و انت ما متواصل معاي عشان بتحبني ولا عشان سواد عيوني ، مافي راجل بيحب ليهو مرة راجل ، و

لا في راجل حيعرس ليهو وحدة هبشا واجل قبلو ، ولا في راجل حيعرس وحدة قبلت انه يهبشا قبل ما يتزوجا !! ...

يتبع.....