انكسار ناي

ربعي

اليعجبه بكلبي يسكن لا يجرحة
والما عاجبه خل يتنحى
هاي الناس ثاري تسبب امراض
خيرهم صحبته تسوي قرحة
اريد ابتعد عنهم كبل ما اموت
مدام الله بعد منطيني صحة
اطكهم شلع حتى المستعز بي
الكتبته بمي ذهب هم امسحة
ربعي تربعوا فوك ويدبجون
اضربلك مثال انطيك لمحة
واحد كل دقيقة يريد تقرير
بيش الساعة نام ويمتة اصحى
وياهو المر عليك وياهو حاجاك
النصب روحة شرطي اليوم اسرحة
والثاني شغلته منيلك هاذ
وشلون شتريته شها الملحة
بيش منين ليش وانته شعليك
متفضل علي منطيني منحة
وواحد حاط روحة بسلعة البيت
كل شي تكلة عاطل كال اصلحة
ما قصر كبل من ايدة للجول
العليه عرفني يا مشعول صفحة
وواحد عود يتمنالك الخير
يقرالك دعاء صدرك يشرحة
اول ما يروح اهلك يصخنون
الحاسد من يجيك عيونه رمحة
طيب جنت كلبي وبابي مفتوح
بالبردة بعد ما اخلي فتحة
ولا تسألني هيج تصرف وهيج
ولا تنصحني هيج تصرف وهيج
النصيحة تمول قافل لا تنصحة
احطلها لحن خاطر تفهمون
احجيها انكليزي احجيها فصحى
بوجه واحد عشت معندي وجهين
هذا الكائن الما شاف فرحة
هذا اليبتسم من فشلة الناس
بتقاسيمة تعرفة شكثر ضحى
عوفوني رجاءا اني عاشور
دوروا عالفرح يم عيد الاضحى

منقول