لاني احبُك شاركتها اياكَ (غزل )

البارت الاول

البارت الاول

"لا يـوجـد عـقـاب #أشـد مــن

أن تـحــب #شـخـصاً لـيس لـك

ولـن يـكـون لـك #يـومــا

*************************
- انتي شنو من بشر مدكليلي مستحيل اصدك شلون نخدعت بيج
- بس اسمعني داكلك والله مسويت شي
- ولج شلون مسويتي والج عين وتحلفين بالله جذب
- بس اهدأ خل افهمك شصار
_ مااريد افهم ولا اسمع منج اصلاً ماطايق اباوعلج وانتي قتلتي روح اكيد انتي موصاحية
_ اذا تحبني اسمعني فدوة اروحلك
_ ماكو كلام وياج ومااريد اشوفج
اطلعي روحي الاهلج بيتي يتعذرج
طلع وهو عصبي نار وميشوف دربة
كعدت على السرير ابجي منهارة واندب حظي ليش هيج صار وياي وشنو الذنب الاقترفتة معقول حياتي هيج صارت وين احلامي وين حبي وين عزي ودلالي اااااخخ كلبي تعب بعد مااتحمل شجاي يصير بية والله تعبتت
كعدت ابجي ومر شريط حياتي كدامي وبديت اتذكر قبل ثلاث سنوات
............. ................. .............
قبل

_ ماما حبيبتي كومي تأخرتي مظل وكت
_ مااااا عوفيني انام شوية الله عليج
_ ولج لاتحلفيني كومي بدلي تأخرتي الساعة ب٨
_ اااه صدك ماما ب ٨
_ اي كومي
_ بعد شسوي كايمة مظل وكت شلحك اكل لو ابدل خليني نايمة ح اغيب
_ ولج شو كيفتي تغيبين يومية غايبة كومي لا اجيب سراحية مي باردة اسبحج هسة الساعة ب٧ كومي
_ اووف منج سوسو فلا تخليني انام انوب متبطل سوالفهة لازم ازيد ساعة
_ بدل ماتلغين كومي حضري نفسج للمدرسة ولا عبالك صف خامس ادبي كاضيتهة اكل ونوم ولج اقري وشدي حيلج خل تفيدج الشهادة
_ شسوي امووت نفسي مو جاي اقرة قابل جاي العب
_ اي تقرين واضح
_ خل اكوم احسن لان اذا اظل يمج تاكلين راسي
رحت سبحت وبدلت متعودة يومية اسبح الصبح حتى اذا شتا احب هيج وتريكت شي خفيف ورحت للمدرسة
الجو حلو بداية شتا لا حارة ولا باردة
طلعت والجو حلو والشوارع فارغة خاصة شارعنة كلش هادئ عبالك مابيه احد بس الطلاب تطلع بهدوء ماعدا ااخوتي يهرجون الشارع من يطلعون شسوي تربية سعاد ..دخلت للمدرسة لكيتهم داخلين للصفوف اااوف
_ هااا اشو هم متأخرة وتالي وياج
_ شسوي ست قريت اخوية قبل لا اجي
_ شلون عذر يومية شكل زين ليش مقريتيه البارحة بليل
_ مو اني اقرة بليل وتوسلني الصبح اقريه خطية استخطيته
_ ادخلي وبعد لا تتأخرين
دخلت وكعدت برحلتي
جان دغني صديقتي زمن
_ هاا ولج شوكت انتي ادرسين اخوتج
_ ااششش ولي مني
_ هم نايمة واخذج الوقت مووو
_ ولج اسكتي لاتسمعج المدرسة
_ علساس انتي خايفة
_ مالي خلك الصبح سوسو وهسة هاي ام بوز
_ عززة ولج لاتسمعج
_ لعد عوفيني
كمل الدرس وطلعنة فرصة
_شعدنة اليوم
_ ليش انتي مشفتي الجدول
_ لا مشفتة بس قريت على اليعجبني
_ والله شكلج ماطلعين من الاعدادية ، اليوم عدنة رياضيات
_ اهووو هم راح يجينة ابو لاتكيت
_ ههه شعندج وياه اشو البنات ميتات عليه بس انتي تضوجين منة
_ لان ماعدهن ذوق ماادري شنو العاجبهن بي
_ تحجين صدك كلشي بيه حلو هم شكل وهم مدرس صدك مو ثابت يمنة بس يبقى الة هيبتة
_ هيبتة الجن مو علية مادري ليش مخلو مدرسة بمكانة بس هو رجال بنص النسوان
_ هههه وصاير مدافر عليه منين ميلتفت لو المدرسات لو الطالبات
_ هههههه ماعدهن شغل بس شكال استاذ سيف شحجة استاذ سيف ياالله ناس فارغة
،،،،،،،،،،
خل اعرفكم عن نفسي
اني غزل واسمي بحد ذاتة نغمة مع شكلي اصير اوكسترا 😂
لاتخافون مو مغرورة بلعكس بسيطة ومتواضعة😌
طولي ١٦٥ وزني ٦٠ حنطية كاسرة على البياض بس مو بيضة شعري بني واصل الجوة اكتافي دائماً اكصه مااحب يطول
عيوني جوزيات عاديات رموشي ثخان بس مو طوال وعيوني عبالك نعسانات يعني اشوفهن عاديات خشمي ناعم وشفايفي ممتلئة بس مو كلش
يعني معاني زينة بس امتلك جاذبية هي التخلي اليشوفني يكول حلوة
انتمي العائلة محافظة بس مو معقدة امي سبورتيه خاصة وياي والدي رجال بسيط بس يحب النظام والترتيب ويخاف الله منطينة راحتنا ومقوي شخصيتنة معلمنة منخاف من احد بس من الله ولا نكذب ولانظلم علمنة على الصلاة والصوم والحجاب ملتزم بس بنفاهة بلا تعقيد
والدي يعمل وكيل للمواد الغذائية والمشروبات الغازية يعني نكول عندة شركة صغيرة وضعنة المادي تمام والحمد لله
امي نبع الحنان ربت بيت بجدارة حنونة ولطيفة بس مرات تصير عصبية وتتحول الى شخص لا اعرفه 🤣
اني البنت الكبرى لاهلي وبعد معانات يلة ماما كدرت تخلف اخوتي احمد ونرجس وكرار احمد صف رابع ابتدائي ونرجس ثاني ابتدائي وكرار بعده مامسجل بالمدرسه فارق العمر بيني وبين اخوتي كبير لذلك اعتبر نفسي المدللة والوحيدة بلبيت
اعز صديقة على قلبي وهي موضع اسراري امي
اي بلي امي وصديقتي كلشي احجيلهة ماضم عليه شي
هي حنونة ومتفهمة علمتني ماضم لا صغيرة ولا كبيرة عليهة حتى اذا خطأت تعلمني اصحح خطئي
شخصيتي طيبة ومرحة بس عنودية كلش والاريدة اسويه طبعاً بحدود المعقول واليسمحون بيهه اهلي
احب اهتم بشكلي وارتب نفسي واحب الكل يشوفني حلوة ماادري يمكن اسمي مأثر على شخصيتي
لان اسمي غزل احب الغزل
قصة حب بابا وماما اثرت بشخصيتي اكيد مو للايجابي
قصتهم خلتني اعيش خيال وخلتني اعيش بعالم رومانسي كلما اذكر اسرح بعالمهم اني عاطفية كلش وسهل اتأثر خاصة اذا قصة كلهة مشاعر
سولفتلي ماما شلون تعرفت على بابا وشلون حبهة
شافهة بلسوك وية امهة واعجب بيهة هو كان عامل بسيط بس هذا الشي مامنعه ان يحب
بالبداية نظرات وابتسامات الى ان صار لقاء بعد ان عرف بيت اهل ماما باقي نهار كامل بشارعهم ينتظر ماما تطلع حتى يحاجيهة وبالصدفة طلعت ماما وكدر بس يحجي وياهة كلمتين وشافهم جدو ابو امي سحب امي وراد يضربهة لكن والدي لازم ايد جدو وكلة اضربني اني هي مالهة علاقة اني وكفتهة احجي وياهة
جدو تفاجئ بجراءة بابا فكلة شلون انت تجرء ووتهتك حرمة بيتي
بابا جاوبة اخسة اذا هتكت حرمتك اني غرضي شريف واليوم اهلي يمكم
ادكول امي بابا كلب الدنيا على اهلة وجابهم العصر يخطبوني وطبعاً امي ماكلة كتلة معدلة من ابوهة بحيث مزوركة
وماقبل جدو ينطيهة الهم
بس بابا لا بطل ولا مل سنتين وهو كل شهر داز مشية يخطبوهة ويدزلهة مراسيل بسر ان تنتظره ولا تمل وماصير بس اله
واخر شي جدو مل وتعب من بابا وانطاهة الة
وزوجو وصرت اني اول نور بحياتهم وثمرة حبهم فسماني بابا غزل يعبر عن غزلة وحبه الماما
قصتهم خلتني رومانسية وعاطفية هذا الشي اعتبرته بعدين من صفاتي السيئة
،،،،،،،،،،،،،،،،،،،،،،،،،،،،؛،،،،،،،،،،،،،،،،،،
_ غزل استعجلي ح يدوك الجرس
_ واذا دك خليني اجيب نستلة وعصير
_ اوف ام بطن وكت عصير ونساتل ماادري وين يروح الاكل نهار كله تاكلين وجسمج شحلاتة بس اني مسوية رجيم وجسمي بيه ومايسمن
_ قل اعوذ برب الفلق ح تحسدني
_ ولج استعجلي حيجي استاذ سيف
_ وميجي شسويلة
_ من ندخل وراه هسة يكول متقصدات يشوفني طولهن
_ لا عيني شنو متقصدات ميتة عليه يلة امشي بطلت مااشتري
بدة الدرس واجة الاستاذ واشوف البنات ذابت نفسهن عليه هاي التتمضحك وهاي التتموع وهاي الكامت تحجي مكلوبي عبالك انضرب حلكهة شرجي وطبعاً قبل الدرس الفرصة كلهة بس يعدلن ويرتبن بنفسهن
والله يمكن تخبلن لعد بالكلية شيسون
اما اني ولا على بالي لاسيف ولا خنجر 😂
كاعدة وافكر شوكت يكمل واروح اشتري لان جعت والمادة مملة واني منا اكره الرياضيات هسة صرت اكره الرياضيات واستاذ الرياضيات
ماحبيتة ماادري احس يتفيك ومعجب بنفسه وعبالة منين ميلتفت معجبات كاتلين نفسنة عليه😒
اني فاتحة الكتاب بس بالي مو يم الدرس سرحت مانتبهت شنو شرح ماحسيت الة صوت القلم يضرب برحلتي التفت شفت استاذ سيف واكف على راسي
_ وين سارحة ؟

ولحكايتي تتمة

في الحكاية احداث شيقة تابعوها لتعرفوا
ارجو التفاعل وقراءة ممتعة احبتي ❤