لاني احبُك شاركتها اياكَ (غزل )

بارت ٢٤

مساء الكاردينيا🌼

          ******************
بعد مدة من الدقائق او علها ساعات
بعد متفرق عندي لا دقيقة ولا ساعه
احس العلم حولي توقف من فارقت هيثم ....
رد
"عندما تتلاقى ارواحنا اما ترسم حبا واما ترسم بعدا
لكنها عندما ترسم الوجهين معا ذالك مؤلم حقا
كنت اعتقد اني ملكت قلبا
كنت اعتقد اني وثقت فيك حبا
كنت ارسم وجهك بين سطور الصدق والشعر رسما
كنت ابحث عن كلمات منك لاينطق قلبي منها عشقا
كنت وكنت وكنت الى ان وصلت لرحيلك عني غصبا
نعم احبك ولكني لا اعشق ان كون على قلبك حجرا
اعشقك لكن لابد من فراقك
فوداعاً ...وداعاً"
عيوني من شافن رده رغم الاذه البيه
بس مكدرن يضمن الاشتياق لتلك الاحرف والكلمات
اتمنيت افتح صدري واخبي كلماتك
اشتاق لكل حرف منك حتى وان كان مؤلم
.....
المتني كلمة وداع بس بقلبي يبقى امل اللقاء
انتظرت يجي ينام
حتى اشوفة تأخر وماكو
اذا مااشوفة مااكدر
هلنظرة الخاطفة وهو نايم هي طاقتي وقوتي ...
مدة من الزمن
وحسيت بحركته فتح باب الصالة
غمضت عيوني حتى لايشوفني كاعدة ويطلع
لان من يشوفني يروح ميظل بنفس المكان
اقترب من السرير اخذ المخدة
اني فتحت شوية عيوني
ماتحملت بسرعة لزمت ايده
هو بقى مادهة ماسحبهة
_ هيثم
بلارد
كمت واقتربت واني لازمة ايده
هيثم  كافي تعبت والله تعبت
رفع عينة بعيني
ااااخ ياالله صار شهر.. لا دهر
مشايفة هاي العيون
بس متغيرات ذبلانات حزينات
حتة حمر يمكن باجي
عيونة هامت بعيوني
_هيثم والله تعبت مااكدر على فراكك
موتني ولا تهجرني
نهت بحسره و جر ايده وطلع بلا كلام
ولا اخذ فراشه
وطلع من البيت اباوعلة
رااح مااكدر ارجعه
نهاريت وكمت ابجي منظر عيونة اشتياق وانكسار وحزن
حاله مثل حالي
هيثم يحبني بس مجروح
شلون اطيب جراحه
يصور حب حياته اذاه
واني محافظة عليه بماي العيون .....
تذكرت شي واحد يساعدني ويكفلني
ويفتحلي ابواب الفرج
غفلت عنه واخذني الحزن بعيد
ونسيت لا فرج الا فرجه
تنسد كل الابواب الا بابه
فرشت سجادتي وناجيت ربي
الهي إني وكلتك أمري فأنت خير وكيل و دبر  لي أمري فإني لا أُحسن التدبير واستودعتك همي فبشرني  ...

سيفتحُ الله باباً كنت تحسبهُ
من شدة اليأس لم يُخلق بمفتاحِ

يا من عدا ثم اعتدى ثم أقترف
ثم انتهى ثم استحى ثم اعترف

أبشر بقول الله في آياته
إِن ينتهوا يغفر لهم ما قد سلف

..........
فتحت عيوني شنو هذا
شفت شي على وجهي مديت ايدي
نايمة والحرم على وجهي
شوكت نمت اذكر جنت ابجي وادعي ربي
مااذكر شوكت نمت
كمت مكسرة كل عظمة بية تون
اي اثر الهيثم ماكو الظاهر مارجع هنا مانام
اخذت نفس
اذا ماكو شي جديد وماكو فرج اني ارجع الاهلي
خاف بابا يطلكني شلون ارجع
على الاقل باقية على انفاسة بالبيت
بس هو مايريدني
بلكت الله يفرجهة
....
اجة باقر جاب شهودة دخلهة
_ خليهة يمج لاتجي
_ ليش
_ اريد العب بالبايسكل وتضوجني
يلة روح اني الهيهة
كامت تبجي تريد تلعب وية باقر
تعالي افرجج صور شهودة وهي تاكل وتلعب وتركص
كامت تضحك هاي البنية تموت على الصور
يمكن تطلع مصورة لو عارضة ازياء
بكد متحب الصور والحركات
كعدت يمي صورتهة كامت تبجي تريد تباوع فديوات
فتحت الفديوات الهة
واني سويت جاي اشرب كلش مصدعة
لان نمت ابجي وبلكاع بلا فراش
احس راسي يريد ينفجر
اخذت الجاي ورحت يم شهد
كاعدة على جهة وتتفرج قللت صوت الجهاز لان مااتحمل صوت
وهي على كل  فيديو تأشرلي
عود تاكل لوتلعب
فديو طلع صاحت اوووو ( هي جبيرة بس السانهة ثكيل )
_ اوااه بيج واااه
_ ماما وااه
_ ماما شجابهة بالموبايل
_تعالي خل اشوف.. ماقبلت تنطيه عفتهة
نوب كامت تبجي تريدني اعلي صوت المبايل عليته وراحت
كعدت
طلعت فديوات نوب طلعت غيرهن
وتسوي واااه وتسوي نفسهة تبجي
انتبهتلهة وسمعت صوت بالفديو حجي
صوت رغد تحجي
اني ماعندي بالمبايل بس فديوات شهودة وباقر حتة الي ماكو
طفرت اخذتة منهة كامت تبجي
وبديت اباوع على الفديو
وانصدمت واني اشوف
خليت ايدي على حلكي
عيوني بدن يجرن بلا توقف
رجلي رجفن ماشالني
كعدت على ركبي وبديت ابجي
بصوت عالي
ابجي بحركة
وسجدت لله
اسجد لك يامن وحدك تستحق السجد
"من تقرب مني شبرا تقربت منه ذراعا "
....
رفعت راسي شهد تراقبني بتعجب وساكتة
_ شهودة صيحلي بقوري بسرعة
_ مااا
_ اذا صحتيه انطيج نمنم
_ ااي
راحت تركض
اني ماادري شصار بجمسي احساس ماينوصف
ظليت انتظر شهودة
اجتي وباقر وياهة
_ بقوري وين بابا
_ هسة اجة بالبيت
_ روح صيحة حبيبي بسرعة
_ اااي
شوية واجة بقوري
_ هااا وين بابا
_ يرش مي للزرع بالحديقة
كتلة غزل تريدك مجاوب
نوب كتلة مرة ثانية سكت و كال عندي شغل
خوش حبيبي
لبست شالي ورحت
دخلت الحديقتهم واكف يرش مي للزرع
يمة شكد مشتاقتلة شوفتة ترد الروح
اتقربت يمة
_ شلونك هيثم
_ هلوو خير شكو
_ اريدك احجي وياك
_ ماعندي كلام وياج
_ بس اني عندي ...صارلي شهر  متحمله بعدك وهجرج
وساكته اصور الي حق تنطيني من وقتك عشر دقايق
_ احجي
_ مو هنا تعال وياي للبيت
اخذ نفس.. واجة وياي
وصة باقر ياخذ اختة ويروح البيتهم 
امشي وياه واني احس بثقة
بلا انكسار ولا خوف
احس  بالنصر
رمقت السماء بطرف عيني شكراً لك يامن انت اهلٌ للشكر
دخل بصالة
_ تعال هنا بغرفتنة
_ لا هنا عوفيني
_ ترة الغرف مجانت بس الي جنة ثنينة مشتركين بيهة
لو نسيت ايامنة بيهة
_ نهت قوي.. شتردين تخليني اضعف كدامج
_ اي انت ضعيف كدامي بس جاي تكابر
_ متوهمة وكام
_ اقتربت منة خليت عيني بعينة حاول يبعدني
اقتربت وحطيت اديه على  صدره و وجهي
مقابيل وجهةو انفاسي من انفاسه
مامتوهمة اعرف انت كدامي ضعيف وية الكل قوي الة
وياي تغرك بعيوني وتهيم بشفايفي
وبسته بوسة حب و وله وشوك وجنون  وانتصار
كلشي عبرت عنة بوستي
قبلت الاشتياق
مقاوم استسلم الي وعيونة غارت وية عيوني
اخذني بحضنه قوي حسيت كل عظامي تكسرت
بس ماتالمت بل انتعشت ورد نفسي
ابعدني عنة
_ ليش تلعبين باعصابي
_ لان احبك
_ شنو عبالج بستيني اسامحج؟
_ اي تسامحني
_ قطب حواجبة.. الظاهر متعرفيني كتلج قبل
مستحيل اسامح المسيئ ..خاصة اذا كانت الاساءة بيهة هدر روح
_ رجعت اقتربت منة بصوت ناصي..بس اني ماأسأت
ليش تعاقبني
_ شلون ما اسأتي و الصار ذاك اليوم شنو معناه
والشفتة بعيني شنو معناه
_ اسئلك هيثم انت بعدك تحبني
_ لا ضيعين الموضوع الحب مالة علاقة بالسويتيه
_ قاطعته بس جاوبني ماطالبة منك تسامح
انت بعدك تحبني
_ خلة عينة بعيني ودنك ..اي .بسس
_ خليت اصابيعي على شفايفة بلا بسس ادري ماتسامح وادري مجروح وادري تشوفني مجرمة
بس اني اكلك لااا اني مو هيج اني مستحيل أذي احد
حتلو احبك
ماالومك ولا ازعل عليك عيونك خدعتك بذاك اليوم
وانت مذهول من الموقف
مااستخدمت ذكاء هيثم ولا نباهتة
_ شنوو هذا الكلام
_ تفضل هيثم
_ شسوي بموبايلج ؟
_ افتحة وافتح الفيديو يمك وشوف
_ فتحة وكعد
.......
اذا نرجع قبل شهر بساعة الحادث
كنت اصور الشهد فيديو وهي اسوي حركات
ودخلت رغد فجأة اني نسيت الموبايل وبااثناءالكلام
وكع مني
نص التصوير بلا صورة لان الموبايل بالكاع على وجهة والكامرة تصور السكف
بعدين اخذتة شهد وتحرك بية اكو صورة بس مخربطة
ومتحركة هواي فمبينة رغد من صعدت على الجرباية
واني احجي وياهة الباقي بلا صورة بس كل الكلام واضح
وضوح تام من بداية الفديو الحد ماصار الحادث واجة هيثم
وطلعوا واني اسكت بشهد ودست الزر العريض بالشاشة خرجت من الفديو بلا انتباه
الله انقذني بهذا الفيديو
فترة شهر اعاني
واتالم ومنكسرة
وفرجي موجود  بموبايلي وماادري بيه 
_ هيثم ظل ساكت
طفة الموبايل وخلاه بجيبه
دنك وخلة راسه باديه
ويحرك بشعره بحركات ليورة بانفعال
توقعت يحجي يكول شي
بس هو كام بلا كلام 
بس وجهة تحول من الابيض الى الاحمر عبالك نار
مشة بحركة سريعة
وطلع باوعتلة شفتة راح للبيت
بعد مااتحمل اريد اروح واشوفة شيسوي
لازم اشوف واسمع
فرحت وراه اسحب
شفتة دخل للبيت انتظرت شوية
ومشيت وراه ومن باب الصالة مديت راسي
ماكو احد بس اسمع صوته  يحجي  بالغرفة
دخلت قريب على باب الغرفة واتسمع
اجة بقوري من غرفتة شافني قبل لايوصل
اشرتلة بايدي روح ولا تحجي
ماردت يشوف اهله يتعاركون
هو يسمع كلامي رجع الغرفته
ورجعت اسمع ...
هيثم_ يعني هسة انتي دكولين غزل هي ضربتج
رغد_ اي هي الضربتني
_ ليش ضربتج
_ اتغار لان حامل
_ اي سولفيلي بالتفصيل ليش رحتي وشلون تعاركتن وليش هجمت عليج
_ ليش تسأل صار شهر هسة اذكرت لو فرت راسك هاي المجرمة
_ جنتي تعبانة وفاقدة طفل ردتج ترتاحين واسألج ..هسة صحتج تمام ماكو داعي للتأجيل
_ مااريد اذكر نفسيتي بعدهة تعبانة
هيثم_ ميخالف احجي
انطيني شهد منج خليهة يمي واحجي
حتة اعرف اصرف وية غزل
رغد_ يعني اطلكهة؟
هيثم_ اذا حجيج صحيح اي اطلكهة احجي
رغد_ باقر كال غزل ضاجت لان عرفت اني حامل
كلت خطية خل اروح اشوفهة
هيثم_ انتي كلتي خطية؟
رغد_ اي صح اخذتك مني بس الخاطر ام احمد كلت اروح اشوفهة
هيثم_ وماكلتي الخاطر امهة مااذب عليهة بلاوي
مصار سنة مزوجين اشكال التهم ذبيتي براسهة حتة كلتي شفت رجال طالع من بيتهة
غزل _ اني شهكت وحطيت ايدي على حلكي
عززة العزاج حتى ذابة علية رجال وماادري ...خل اسكت واسمع شذابة بعد
رغد_ لا هذا وحد ..بس استخطيتهة لان عاكر ميصير
عدهة ونقهرت مني
هيثم_ عاقر ؟ عوفج من هاي كملي
رغد_ اي رحت تلكتني ليش تجين بيتي وامشي اطلعي برة
وحجي مااذكره كتلهة اجيت اشوفج ليش ضايجة
جان تصير عصبية وفقدت اعصابهة انتي جاية تشمتين بيه
وضربتني باثنين اديهة على ظهري
مو شوفتك الزراك  بظهري بوقت الحادث؟
اني وكعت وطاحت علية ضرب ابطني
وانت اجيت وشفتهة شلون فوكاية وتضرب
هيثم _ ممممم خوش سيناريو
رغد ليش؟
رغد_ شنو ليش
هيثم_ ليش هيج سووين بيه ؟
رغد_ شمسوية فوك ماراح طفلي ورحمي بسبب هاي مرتك
نوب تلومني
هيثم _ كافي  رغد كافي شبعت من جذبج اكتفيت
حياتي وياج كلهة جذبة وخداع
ماكو اي شي بحياتج حقيقة
تعبت منج ولج ارحميني لاا انتي الطالعة من حياتي ومرتاح
ولا انتي العايفتني اعيش
ولج تحملتج صار شكد؟ هااا شكد من كملت اعدادية الهاي الساعة كم سنة ؟
انطيني يوم واحد لاا هواي يوم انطيني ساعة وحدة عشتهة وياج بسعادة شنوو القدمتي الي شنو السويتي الي
واني مثل الشمعة احرك روحي حتى اضويج
احجي شسويتيلي؟
رغد_ ليش هيج تحجي تريد تفر السالفة علية
شتريد اقدملك الة اتعرة مثل هاي الدايحة ام الولد
مظل ولد بنفسهة من امير السيف والله يعلم شكم واحد بالكلية وتجي تضحك عليك تلبس وتصلخ
هيثم_ وججج كافي جذب كافي ولاجيبين طاريهة على السانج لان توصخين اسمهة انتي اكثر الناس تعرفين بشرفهة واخلاقهة فلا تحاولين تتهمين باطل
رغد _ وخر ايدك من شعري تخبلت ملخت شعري
هيثم_ والله لو ما اكول مرة ومااحب امد ايدي على مرة
الة اوديج لهلج بجنازة
وقليل بحقج جنازة
لمي ملابسج بس انتي اوديج لاهلج
رغد_ شنووو توديني لاهلي ذيج تروح اني مااروح
فوك عملتهة توديني اني حقك مخبلتك ام السحورة
هيثم_ وج بعدج تجذبين على نفسج
انتي شمرتي روحج من الجرباية وانتي قتلتي ابنج
شنو من بشر كليلي بشر لو شيطان
مستحيل بعد تكونين الي زوجة ولو هو انتي بالاصل مو زوجة بس روحي و ورقة طلاكج تجي وراج
رغد_ ماروح لو تموتني مااطلع وخلي جذبهة يفيدك
والله الة اخلي اخوتي يثرموك فوك مالفيناك انت واخوك
هيج سوي بية
هيثم_ مانة علية ههه بشنو بلة مانة علية
وهي هاي هم حياة الجنت عايشهة بيتكم
اني شفت المر بيتكم المررررر تعرفين شنو المر
نوب بلوني بيج عللتيني ومرضتيني
حرمتيني من احلى ايام عمري
واذا على العيشة ترة انتم جنتوا عايشين علية اني واخوي
نسيتي خالي وعمامي يدزون مصرف النة وين يروح
مو بجيب ابوج ؟ هاا ماتحجين
رغد_ مااطلع الة تطلع ذيج وطلكهة
هيثم_ شسويلج حتى تفهمين اني شفت الفديو انتي اذيتي نفسج انتي كطعتي طفلج قطع ولججج قطع شفتة قطع الله اكبر عليج شنو من بشر
رغد_ يافيديو؟
هيثم_ هذا الهمج يافيديو وابنج ماهمج ؟
اخر شي وبعد ماعندي حجي وياج الضربة البظهرج منين ؟
رغد_ كتلك...
هيثم_ ماكلتي احجي لا امووتج وديني امووتج فقدتيني اعصابي وطلعتيني عن طوري
رغد_ اووكف هيثم تخبلت اول تالي تضربني اااخ خنكتني
هيثم_ اااحجي
رغد_ ااااني بس وخر خل احجي ..اااني خليت دبة المي
على كاونتر وكعدت جواهة وكعتهة على ظهري
هيثم_ صاحية انتي صاحية؟
رغد_ لا مخبلة اني كتلك مااخليك تزوج وزوجت كتلك مااخلي احد يشاركني بيك
هيثم_ بعدج اجذبين على نفسج بهذا الحجي ترة كمت من اسمعه نفسي تلعب
ادري بيج ماتحبيني بس ليش ماتخليني اعيش حياتي واشوف سعادتي ..مامقصر وياج ولا حارمج من شي ليش حارمتني من كلشي
رغد_ اي مااحبك ولا اخلي احد ياخذك هاي اني اعتبرني كابوس بحياتك
هيثم_ والله مااخليج بحياتي
.....
رغم السمعتة شلني وصطرني
بس جمعت ذهني وطفرت البيتي ركض
خفت يطلع ويشوفني
ماارريد ءأذيه من يشوفني يخجل
اكول ليش ميسولفلي  ثار مشوفتة الويل
عمة بعيني شلون جنت اغار ومااخليه يرتاح
يومية سالفة
جنت اغار من وهم وسراب
وضيعت اجمل ايام وية حبيبي
كمت ابجي مقهورة عليه
شصار بحالة فرفحت روحة
عساهة بعافيتج رغد
اول مرة هيج اشوفة عصبي ويصيح

باقر_ غزل غزل
_هاااحبيبي ليش تبجي ؟
_بابا كال اظل يمج اني وشهد
_ بابا وين؟
_ راح...

ولحكايتي تتمة
تصويت + متابعة
تحياتي 💕