لاني احبُك شاركتها اياكَ (غزل )

بارت٢٣

عذراً عن التأخير لسبب عطل في الشبكة

******************
""لا تستغرب حين يقتل الروح أعز من سكن فيها فالشمعة يحرقها الخيط الذي كان يسكن فيها ..""

*****************
غزل-احجيلي
ماما_ اني كاعدة اشتغل ودك الموبايل هيثم
جاوبته صوتة مو واضح ومو على بعضة
بس فهمت كال تعالي اني بالمستشفى

نخضيت عبالي بيج شي كال رغد تنزف
رحت اركض اخذت احمد واجرت سياره للمستشفى
لكيت هيثم يم صالة العمليات كاعد وحاط راسه باديه
منهار وحالته حالة
سالتة كال ماادري شصار
هيثم_ردت اخذ رغد للدكتورة لان شفت وضعهة تعبان وكوة تمشي ماقبلت
كوة قنعتهة واخذتهة
وكلت الغزل اتخلي الجهال يمهة هي ضاجت بس كلت من ارجع بس شوفني تنسة الزعل
وطلعت السياره بالباب..شفت رغد تأخرت دزيت باقر يصيحهة
اجة باقر يبجي ويصيح ماما بيهة دم غزل ضربتهة
طلعت من السيارة ركض ردت اطب بيت رغد
صاح باقر لا ماما هنا بيت غزل
استغربت شسوي يم غزل...
دخلت بسرعة وسمعت صوت رغد تصرخ
الحكولي وتصيح وخري مني
دخلت شفت رغد امددة وتنزف والكاع فايضة
وغزل فوك رغد وكامشه ايدهة
ورغد تصرخ كتلتني موتتني
اني ماادري نصعقت من الموقف
لو احد حاجيلي مستحيل اصدك  غزل بهيج موقف
بس شفتهة بعيوني
وبدة يضرب بعيونة شفتهة اني شفتهة
ماما_اني حاولت اهديه بس ماادري شاكله
بنتي وهو وزوجتة المن ادافع والوم منوو
سكتت وكمت ابجي
طلعو الطفل بشهر الخامس جبير
بس مكطع هو شافة وتخبل
هو حساس هيثم مايتحمل هيج منظر
ساعة يكول لا غزل مسوي هيج
ساعة يكول هي تغار ...وظل غركان بحيرته
بس منظر الطفل هد حيلة
ورغد شالوا رحمهة بالعملية نفجر
الدكتورة كالت مضروبة بظهرهة ضربة قوية
_ اني ابجي وية كل كلمة وية كل حرف روحي تتكطع
شلون اكله مو اني وشلون يصدك
والله مواني
_ ماما تصدكين بية
_ احجي وخل اشوف اصدك منوو
_ حجيتلهة كل الصار مانسيت ولا حدث
بقت صافنة
_ حجيج يحتاج دليل كلامج وية كلامهة والمنظر الشافه صعب يصدك
_ انتي مصدكتني بس كليلي
_ اني مصدكتج بس شلون هو يصدك
_ اذا انتي صدكتيني هو اكيد يصدكني هو حافظني مثلج
من احجي يعرف شبيه
_ اي هذا بالوضع العادي مو هسة هو منهار
فقد طفل مرتة الاولى حالتهة جانت خطرة وخمس بطالة دم يلة نقذوهة
ومرتة الثانية هي المتهمة وشاف بعينه انتي فوكاهة وهي جواج تصرخ
والدكتورة دكلة ضربة بظهرهة قوية
_ هي وكعت على بطنهة مو على ظهرهة
_ لعد شلون نضربت
_ ماادري ماما ماادري
_ مااصور جانت قاصدة تأذي نفسهة يجوز بس رادت توكع الطفل
_ ما ادري ماما ماادري .......

ثلاث ايام مر على الحادث واني التفكير والوم موتني
اتمنى امووت ولا هذا التفكير
افكر بهيثم اكثر ماافكر بروحي
احس بيه مجروح
متألم والمأذيني بعيد عني مااكدر اطيب جروحة
شلون اداويه وهو يشوفني جرحه
هو جرح واني بالنسبة الة صرت ملح
والجرح والملح لا يلتقيان....
عيونة موتني كلما اغمض اشوف نظرته حتى بالجفن حسيتهن مطبوعات
نظرة حزن خيبة امل انكسار حب مغدور
شلون ربي فرج عني
....اجة بابا من الديوانية
واني مااريدة يعرف
اكيد يلومني
ويجوز يصدكهم
هو كلي ممنوع تجين زعلانة
بيتي يتعذرج بزعلج
بس هسة اني بمصيبة شلون هسة شأسوي
وصيت ماما تبلغة وشوف ردت فعله
اني اعرف ردت فعله بس كلت خل اجرب
ماما حجتلة بالشافتة بعينهة وسمعتة بأذنهة
هي تخاف الله لا زودت ولا نقصت
سولفت من شافت هيثم وسولفت الحجيتة الهة
ثاني يوم ماشفت بابا
واجة دخل كبل الغرفتة
اجتني ماما
_ ابوج ماقبل يكول كلمتي ماتنكسر زعلانة مالج مكان بالبيت اذا تردين اطلكي
_ اطلك؟
_ اي هيج كال لو تطلك لو ترجع البيتهة وتحل القضية
_ شأحل تحجين صدك شأحل وشأسوي وهي التهمة راكبتني
_ يكول ماكو حل وانتي هنا امشي روحي البيتج وحلي امرج وشنو قرارج بلغينة
_ ماما تطردوني
_ اني مااطردج ولا ابوج بس انتي نسيتي شكالج ؟شرط قبولة بهيثم... كالج بيتي مفتوحلج بكل وكت الا بزعلج  يتعذرج
_ كعدت ونهد حيلي بوكتهة بس ردت اوافق بلا وعي ولا تفكير وافقت على شرط بابا كالي هو عقاب بوقتهة
ماحسيتة عقاب حسيته فرج  هسة يلة حسيت
_ ماما احنة نحبج انتي اول فرحة وشمعة بيتنة
نفديج بروحنة اني وابوج بس ابوج هسة ضايج من الصار
والصار مو شوية
وبعده مايعرف السالفة عدل
وكلمته ميصر تنكسر انتي زعلانة مدامج زعلانة مالج مكان هنا
روحي وشوفي الوضع تكدرين تحلين المسالة لو ترجعين ونطلكج
_ مستحيل اطلك مستحيل اموووت والله اموووت بس
اعوف هيثم
_ لعد ارجعي البيتج خابري هيثم
_ ماااا انتي خابريه
_ اني استحي شأكله
_ لعداني شأكول تعال اخذني بابا مايقبل ؟
بقيت افكر وزدت هم نوب طلعتلي سالفة الزعل خاف البية قليل
بليل اجة بابا وهم ماقبل اشوفة
ادري بيه ماخذ بالة علية
اي بابا وهيثم شلوون كسرة ياربي صدك مادوم الاحد
اجتني ماما كالت يكول ليش بعدهة ماراحت البيت زوجهة اني صدك نهاريت وكمت ابجي
اخذت الموبايل ودزيت الهيثم رسالة
"تعال اخذني مااكدر اظل "
اذكرت رسالتي من دزيتهة الة بذيج الليلة
هم جنت منهارة وابجي بس رسالتي سوتلي فرج واجاني هيثم هاي هم اسوي فرج؟
ساعة مرت وساعتين وماكو جواب ولا رد
مرت ثلاث ساعات واجت ماما كالت هيثم بالباب
فرحت صدك واجاني
لبست عباتي وطلعت
مشيتي مو مستقيمة بين خوف وبين خجل بس الغلب
الشوق
مشتاقة الهيثم
سلمت على ماما وصتني اصير قوية واثبت برائتي
الله شكد الحجي سهل اثبت برائتي شلون اثبتهة؟
طلعت لكيتة صاف سيارته
فتحت الباب وصعدت
لا حجيت ولا تنفست
اخذت نظرة خاطفة الة
جان ساكت وهادئ بلا كلام ولا حركات بس عينه
على طريق ويسوق
وصلنة نزلت
وهو نزل مشة فتح الباب مال البيت دخل
ودخلت وراه عبالك ميشوفني
مشيت من الطرمة ورحت البيتي فتحت الصالة ودخلت
نفس ما هو بس
شفت فراش بالصالة
اتقربت مخدة هيثم ودوشك
الظاهر يجي ينام هناا
بس مو بالغرفة ولا بفراشي وبلا بسريري
الظاهر كارهني وميريد شي مني
اي كارهني
ااااخ اصبر ياكلب بعد اصبر.. اكيد بعد اكو هموم
شلت افراشه ورحت الغرفتي
......
ماشفت هيثم بعد ماوصلني
كعدت على السرير  وحاولت انام
النوم احسن حل بهيج ظروف
تمددت بفراشي واحسه بارد
بارد من المشاعر والاحاسيس
التفتت الجهة هيثم تلمست مخدته
شلون ارجعك الي ...دليني شسوي وترجع مثل قبل
زعلك صعب وادري مترضة الة تعرف وتتأكد
شلون اخليك تعرف..ادخلك بعقلي
لو شأسوي ..اريدك امووت بلياك صدكني امووت
ارجعلي
مادري شوكت نمت بس حسيت بحركة بالغرفة
فتحت عيني هيثم
اخذ مخدة وفراش وراح بالصالة
سويت نفسي نايمة
مااريد ءأذيه وهو البيه مكفيه
بقيت احوس ماكدرت ارجع انام
مليت ومااكدر انام
رحت بهدوء اشوف هيثم
جان الضوة قليل وهو مدد بفراشة
ماادري نايم او كاعد
بقيت اتأمل شكله جسمه ملامحة
كلش مشتاقتلة تمنيت اذب نفسي عليه
وياخذني بحضنه
ويشاقيني ويغمرني بحنان صدره
كعدت يمة بلا حس
ومددت قريب عليه
بمجرد قربي منه حسيت بالطمئنان
غمضت عيوني ونمت
كعدت الصبح شفت نفسي نايمة بالكاع
ومغطاية وهيثم ماكو
كوة شلت جسمي مكسرة
ظهري مشنج
من الكاع
لميت الفراش ورحت غسلت
سويت جاي ولفة صغيرة جبن مالي شهية للاكل
بس حتى اكدر امشي
ناسيه وين موبايلي
رحت دورته لكيته بالغرفة
شفت ماما مخابرة هواي
خطية هسة اكيد قلقانة
خابرتهة
_ هلوو ماما
_ مدكليلي وين صرتي نشفتي دمي من خوفي عليج
_ نمت والموبايل مو يمي اعذريني ماما
_ قلقت عليج نوب خابرت هيثم سألته عنج
كال اني طالع وهي نايمة
شصار ؟
_ حليت المسألة وكشفت الحقيقة وهيثم رجعلي
والبارحة نمت يمة كل هذا صار من رجعت منكم البارحة بليل
_ شنو تتمسخرين علية اني نار شابة بية الراسي وانتي تقلدين علية
_ مااقلد عليج ماما اقلد على حظي كلما ارتاح واعيش كم يوم حلوو يطلع من عيني وادفع اضعافه
_ لا تيأسين وكلي امرج لله
لاتنسين ادعي وكلي امرج اله هو كفيل بيه
_ والنعم بالله
_ يلة اخذي راحتج واي شي يصير بلغيني ترة اني وابوج على اعصابنه وابوج  كلش قلق عليج
_ الله كريم ..مع السلامة
_ مع السلامة
.....نهيت الاتصال
وبديت انظف بالبيت
نظفت الحمام واخذت ملابس هيثم اغسلهن
اخذتهن الكلبي ونوب شميتهم
اااخ ياريحتك سحر
احسه تملي ريتي
وتدخل بشرايين كلبي
كملت غسل وطلعت اشرهن
دا اشر واجة بقوري
واكف بالحديقة ويباوعلي
أشرتلة تعال
مااجة ظل واكف ويباوعلي
نوب شوية واجاني
اجة ركض وحضني
اني روحي ردت فرحت اجاني
اخذتة الصدري وبوسته
_ حبيبي مشتاقتلك
_ اني هم مشتاقلج
_ تحبني؟
_ لا
_ بعدك زعلان مني
_ اي
_ اني ماسويت شي اني ماأذي احد واحبك مااكدر ماتحبني
_ اي احبج
_ فدوة اروحلك وحضنتة اااخ ياريحة الحبايب
داسولف وياه واشر
ماحسيت الة على صوت مرة تحجي
اقترب الصوت
ونفتح الباب الفاصل بينة
هاي ام رغد
يمة شكلهة عصبي هاد وتحجي
اني من شفتهة جمدت
بس انتبهت باقر يصيح اشردي غزل اشردي
ورحت ركض للبيت طبيت بالصالة وقفلتهة
وهي شسوت
كامت ادك بالباب حيل وتحجي تحجي
تغلط وتفشر اشكال الفشار
وتهز بالباب
عفية حيل مو مرة
عبالك رجال
نشفت دمي من الخوف والرهبة
اجة بالي اخابر خفت لا تدخل تأذيني
ردت اخابر ماما
لا مو ماما هاي تمووت ماما  وماما ولا تتحمل نوب لاتضربهة
طلعت رقم هيثم واني ارجف
دك ماشالة
دكيت مرة ثانية هم ماشالة
دكيت مرة ثالثة شالة وكوة يحجي
_ الووو
_ نعم
_ هيثم الحكلي هاي رااح تموتني
_ مني؟
_ ام رغد جاي تكسر بالباب
_ هاا هسة جاي
سديتة واني ارجف
اسمعهة تحجي وتغلط
نوب تضرب ب باقر دكلة تعلمهة تشرد
مثل ابوك تموتن على هاي ال....
مسويتلكم سحر هاي ام السحورة
ام الكليات الدايحة
كالت ميادة كالت مو راحة
بس بعديش موتت بنتي
واشكال الغلط والحجي
سديت اذاني
وكعدت ابجي
هي سكتت اشو ماكو
عبالي راحت
اشوية وصار الهبد
ماادري بيش تضرب الباب
تريد تفتحة
عزة دخيلك ربي هاي بس تلزمني امووت
يمة هو بس من شكلهة العصبي يصير بية شي
زاد الضرب
وكلما يزيد اكوم اصرخ
هيثم هيثم
وهي دكلي تصرخين تردين كوووا......ج
ولج اني دواج بس خل اطبلج
نوب خبلتني بحجيهة رعبتني
سمعت صوت هيثم يصيح
رحت اركض اشوفة من شباك الغرفة
دخل يركض ويصيح
بعد.كمت مااشوفة اجيت يم باب الصالة واسمعه يححي
يكلهة مو كتلج ممنوع توصلين يمهة
وهي تحجي وتصيح دكلة تخاف عليهة مو رادت تموت بنتي
وانت كل همك هاااي ام الشوارع الدايحة بواكة الزلم
يكلهة مااسمحلج تغلطين شنو هذا الغلط احترمي هي صير زوجتي
نوب تخبلت كامت تعارك وتغلط وحتى تضرب بيه
ودكلة مااروح الة اموتهة
اسمع دكلة عوفني ولك
رحت لشباك شفتة يجر بيهة من ايدهة
وهي تدفع وتحجي تريد ترجعلي
الحد ما دخلو من الباب الفاصل
ونسد الباب
اني تنفست بصوت عالي
وكعدت  شلوون هبطة من الصبح
راح حيلي  ونص عافيتي
مشايفة هيج مرة
لا مو مرة هاي رجال
اشو ماما اذا صرخ واحد بوجهة توكع شبيهة
شوف هاي كاسحة مو مرة
دخيل الله شسوت بية
لو لازمتني والله تموتني
سودة علية بقوري نضرب منوراي
بسلا أذتة
حتة حفيدهة ماسلم منهة
....بقيت خاتلة بالبيت لا طلعت
ولاسويت شي
حتى شباك مافتحت
ميتة خوف
فكرت اروح الاهلي اخاف لاتجيني من هيثم يروح
بس شلون اروح لازم اسوي حل
اذا رحت صعبة ارجع
خل اظل مااطلع الحد مااشوف حل
بقيت الحد العصر كلش
اني ماطالعة ولا سمعت شي
الحد ماسمعت دكة بابا الصالة بالبداية نخرعت
بعدين عرفت هاي الدكة
وكمت حاجيتة بلا ماافتح
_ بقوري انت وحدك
_ اي وحدي
اااااه طمأنيت فتحتلة
_ وين بيبيتك لا تجي علية تضربني
_ راحت بيبي
_ وين راحت
_بابا خلاهة بالسياره وكال العمو وديهة
_ هاا صدوك
_ اي
_ منو عمو؟
_ اجر سياره بابا وراحت
_ منو هسة يم امك يداريهة
_ بابا
_ هااا
_ تعال اطلع اشر الملابس ظلت برة
طلعت والكاهة مشمرة ملابس هيثم كلهة بالتراب
شلتهم مليانات تراب حسبي الله عليج مو مرة بلوة
اخذتهن وعدت غسلهن

بقور شكلك تعبان تعال اشوف خاف ضربتك
_  اي ضربتني بظهري وعضتني بايدي
_ وين العضة
_ هاي
_ عزززة هاي شمسوية بيك تعال اعقمهة الك
سودة علية انضربت منوراي
_ اني لو جبير مااخليهة اصير مثل بابا واجرهة
_ لا عيب لاتجرهة هاي صير بيبيتك
_ مااحبهة موتتني كتل
كلما شوفني تضربني ادكلي اغم ابن ابوك
_ ااااااوف
يلة انسة الصار لاتفكر
هسة راحت وبابا يمك العب واضحك وياه وهسة ينسيك
_ مايريد لانلعب ولا شي بس ضايج
_ ضايج ااااه ..ميخالف كم يوم ويرجعلك
اكلك شكلك ذبلان انت جاي تاكل
_ اي بس قليل
_ تعال اني اسويلك اكل شيجي بالك تاكل
_ بيتزا
_ يدلل البطل اليدافع عني ونقذني
التهيت وية باقر سويتلة بيتزا
همزين اجة يمي غير نفسيتي
وبقينة نسولف اني وياه
رجعنة مثل قبل اصدقاء
وهو ارتاح لان طفل وكل شوية يشوف لو صياح
لو عركة
_ من تكمل بيتزا جيب شهودة
_ خليهة مااريدهة تجي
_ لا حبيبي خطية خل تجي
اوكلهة وخاف تريد اسبحهة
_ اي سبحيهة لان ريحتهة موطيبة
_ هههه يلة كمل وروح جيبهة
......صار سبوع مشايفة هيثم بس بليل بوقت متأخر يجي
ينام بالهول واني اظل انتظره من يجي
اروح انام قريب عليه بس على ريحته
هذا القرب منطيني حافز ودافع للبقاء
الاسبوع صار ثنين والثنين تلاثة
وصار شهر على بعد هيثم
بعده اهلكني وسلب روحي
احس نفسي ضايعة وتعبانة
احس بالفراغ
ذبلت وذبلن عيوني
صرت شاحبة وباهتة
هو هم ضعف وتغير وشكلة تعب
واحسه بلا روح
متغير حتى وية اطفالة
اراقبة من الشباك او يحجيلي بقوري
اتمنيت ارجعه مثل قبل
تمنيت اصالحه
اخذة الحضني وانسيه
بس تبقى امنية
.......صارت زينة رغد وبدت  تكمل حياتهة
اما حياتي توقفت الى شعار اخر ...
بهاي الفترة اني عتنيت بشهودة وباقر
كل وقتهم يمي  مايرحون الا بوقت النوم الصبح يجوني
تعلقوا بية وزاد حبي الهم
وياهم انسه كلشي
همة على مداراتي الهم نشنشوو تفحت اخدودهم ونهار كله نظيفين
افرح من اشوفهم هيج
على الاقل ماشوف ابوهم اشوف اولاده واشم  ريحتة
بليل  اشتاق الهيثم اطلع الصور
واشم ملابسه يهيج بيه الحنين
ارسلتلة رسالة مشاعر

"اتدري ما الحنين …؟
اتعلم ما الشوق .الذي يغرق شوقا العينين ..؟
هل شعرت بقلب فارغ من الشوق حزين …؟
كل هذا يصيب قلبي عند غيابك …
لا اعرف من اكون دون احساس نبضاتك …
عشقي تلك العيون الهادئه كالبحر في سكونه  …
ابتاسمتك تكفي لذكراها سنين وللصور اعانق ….
هل اكتفي بغيابك عني والدمع صاحب لايفارق ….
ام ستعود يوم تسكن قلب ملئه حبك …
احبك وسابقى احبك ساعيش على ذكرك
انت ماض وحاضر وامل مسقبل لا يمل عشقك
احبك حتى تجف العروق ولا يبقى سوى حروف اسمك
احبك........

ولحكايتي تتمة

تصويت + متابعة
تحياتي 💞