لاني احبُك شاركتها اياكَ (غزل )

البارت الخامس

البارت الخامس

هاا خيرج ليش هيج مبوزة خوما اكوشي
_ ماكوشي
_ شنو ماكو شي شوفي حالج
_ اني بتليت بهذا سيف بلوة
_ عزة ولج شصار شسوالج
_ مسوالي شحدة
_ لعد شبيج
_ اليوم داافتر بساحة اني وزمن شفتة واكف يم باب الادارة وباوعلي نوب دخل
قبل لايدك الجرس لصف اجة لساحة كبل علية حاولت اسرع خطواتي بس ملحكت
_ اي يمعزاية شراد
_ اصبري ياماما داحجي
كلي غزل اريد احجي وياج كتلة بخصوص شنو استاذ
كلي مستواج برياضيات موزين ومطلوب مني اقدم درجاتكم ومأخرهن علمودج اريد اعيدلج الامتحان بس كون تنجحين يهمني تنجحين
باوعتلة كتلة مااعيد وخلي درجاتي مثل ماهية حالي حال اي طالبة هذي درجاتهة وعفتة ومشيت
_ اي وشدعواج مغثوثة
_مغثوثة لان جنابه سواني مهزلة بصف من دخلت مجانت اكو مدرسة ولبنات شافنة من يحجي وياي وبدة استهزائهن وكلامهن وشعندة مهتم وليش يحاجيج بس انتي وتعرفين اني مااتحمل صح رديتهن وصيحت وسكتتهن بس بداخلي كلش ضايجة لان خلاني بهيج موقف
_ اكو بنات راسبات وياج لو بس انتي
_ اي اكو
_ هم شفتيه مهتم بدرجاتهن
_ لا
_ شعندة هذا نوب لانحصلنة حجاية منوراه
لاتهتمين انتي ممسوية شي خطأ روحي حبيبة بدلي وصلي وتغدي ويصير خير
_ اني حشتكي عليه يم المديرة
_ شنو تخبلتي تشتكين شدكولين راد يعيدلي الامتحان الرجال الحد هسة مابدر منة شي حتة نشتكي عليه لو اكو كلمة وحدة منة موزينة جان خليت ابوج يلعب بيه لعب بس الرجال الحد هسة مؤدب وحجيه وياج ماخارج عن كونه استاذ ويحاجي طالبه بس مع هذا لازم نبهة منريد هيج اهتمام
_ الله كريم
_ وانتي تعالي يمصخمة ليش هيج مستواج برياضيات شجاج مدكليلي
_ اهوووو خل اولي ابدل الكاهة منج من سيف
_ شوف السان شطولة بس عليه ماطلعة بدراسة
_ ماما فدوة عوفيني روحي طالعة
رحت كبل نمت حتى مابدلت ولا صليت ولا تغديت نقهرت من حجي البنات علية صح هنة متقصدات يقهرني ويعرفن معندي شي وياه بس مااحب احد يحجي علية ظليت للعصر كعدت ميتة جوع رحت بدلت وغسلت وصليت فتت للمطبخ لكيت رغد ام باقر يمنة هي وماما كاعدات على ميز الطعام ويسولفن وكدامهن جاي وكعك وكليجة ماما يومية سويلنة شكل كعك كليجة نمنمات
_ السلام عليكم شلونج ام باقر
_ وعليكم السلام حبيبتي الحمد لله شنو هاي كله نوم لعد شوكت تلحكين تدرسين
(بكلبي كلت هو عوزي بس رغد علية )
_ والله اجتي غزولة تعبانة سودة علية نامت بلا اكل وهم مقهورة
_ خير شبيهة مقهورة
استلمت درجاتهة وطلعت موشي برياضيات
هذا الحجي اغمز الامي اكح اريدهة تسكت بس شيسكتهة ست الحبايب طلعت كبل وكتت كل السوالف بخصوص الرياضيات مسولفت عن سيف
لو مسولفة جان زفيتهة
_ لو اعرف جان درستهة بس صارلي هواي تاركة والمواد متغيرة بس هيثم كلش شاطر برياضيات درس ابن اخوه من جنة يمهم طلع هندسة
_ ماشاء الله وشفايتلي لو بس تنجح مااريد هندسة
_ اذا تردون هيثم يدرسهة
_ لا عيني نزاحم ابو باقر وناخذ وقتة
_ عيني شتحجين عيوني الج انتي اكثر من اختي شجازي منج وحامي كلة غدة وعشة عليج
من غير المحنة والطيب والله ابو بقوري يكول مشايف هيج جار طيب
_ انتم الاطيب حبيبتي احنة اخوات وياريت تشوفين ابو باقر على فراغة يدرسهة
_ اي تدللين
اني بقيت صافنة بداخلي فرحت بس خفت
خفت لا اطلع موزينة وماافتهم واتفشل كدامه
بقيت ساكتة كلشي محجيت صبيت غدة وكعدت بطرف المائدة اكل
كملت دخلت للغرفة اقرأ مطلعت الة ورة المغرب صليت وطلعت اشوف بابا اجة
سلمت عليه ولكيت ماما تسولفلة على مستواي برياضيات ضاج ونقهر وكلتلة على ابو باقر يدرسني بالبداية مقبل نوب ماما قنعتة كلتلة هو مهندس وكلش شاطر برياضيات قبل بابا بس لازم اخلي واحد من اخوتي ويانة يحضر درس
اني فرحت بس مشاركت بالحديث بقيت ساكتة
ثاني يوم من رجعت من الدوام كالت باليل يجي ابو باقر
يومين بالاسبوع يجي بليل ساعة يدرسج
اني ستغربت شبلعجل راح يدرسني
_ اجتي ام باقر خلت باقر يمنة وراحت تلقح هي وزوجهة دكول ابو باقر كال من اليوم نبدأ الدرس لان الامتحانات نصف السنة مبقالهة شي يادوب تلحك
_ ان شاء الله
_ شبيج وجهج نخطف لونة
_ ها لا بس خفت لا اطلع موزينة بدرس وافشل كدامة
_ هو انتي موزينة بعد فشلت الثانية
_ شكراً سوسو على التشجيع
_ ياتشجيع ولج هو درجاتج يفيد بيهن تشجيع
عدت الساعات عاديةالحد ما اجة اليل طبعاً خليت ماما سوي كيك وعصير طبيعي كتلهة عيب فوك مجاي ومعطل مشاغلة
اجة اليل لبست نفنوف محجبات الردان والصدر بيجي والجوة سماكي طوخ اني احب السماكي كلش واطراف الثوب بيجي وبي ليلو منثور ولبست شال بيجي وبيه سماكي طلعت مرتبة
رحت يم ماما بالمطبخ احضر الكيك
_ اشو محضرة هواي مواعين كيك
_ اي هميلة يكفي مو تجي ام باقر وياه
_ ام باقر تجي!
_ اي كالت اجي وياه
_ هلة بيهة ورحت
شوية واجو ادخلت علينة سلمت بس ظلت تباوعلي
_ ههه اشو كاشخة غزل
_ لا مكاشخة نفنوف بسيط
_ لا مو اكول انتي بالبيت عبالي تطلعين بثوب دشداشة
_ والله معندي دشاديش اني بلبيت كلة تراكات وثياب قصيرة مو مال اطلع بيهن وبعدين هذا نفنوف محجبات لان مستور لبستة
_ ها اي حبيبتي بالعافية حلوو
شوية وصاحني بابا اروح للاستقبال اني ارتبكت اول مرة راح اشوفة رحت للاستقبال جان تجي وياي ام باقر
دخلت
_ السلام عليكم
_ وعليكم السلام
جاوب ابو باقر وبابا ..بس هو مدنك مرفع راسة
_ تعالي بابا هنا اكعدي على هذا الكرسي
طبعاً حضرنة ميز وكراسي ثنين بالاستقبال بعيد عن القنفات حتى يظل ثابت من يدرسني ابو باقر
_ هههه ابو باقر اني حظل يمكم حتى ادرس اريد اذكر المعلومات وهم حتى يطلع الطفل لبطني ذكي
ابتسم الهة ودنك
وغير مكانة راح للميز وكعد
اني بقيت واكفة
_ بابا ادري واكفة شسوين روحي اكعدي يم ابو باقر هو مثل اخوج الجبير
_ حاضر بابا
_ خليت الكتاب ودفتر واقلام على الميز وكعدت
صار مقابيلي والميز مو جبير يعني مسافة قليلة موهواي بينة
اني كلبي مثل الطبل صار اول مرة رجل يردسني
واكعد وياه هيج مسافة
بدة يدرسني وزوجتة كاعدة وراي وتباوعلة هههه تراقبة وماما هم كاعدة وبابا ترخص وراح لان يكعد من الفجر ولازم ينام
بقة يدرسني واني احاول انتبه لان وضع جديد علية وماماخذة راحتي اخجل ومنا امي وزوجتة يراقبن ومابطلن سوالف احس عقلي مشتت كوة اجمع افكاري
اما ابو باقر فمرفع عينة علية مدنك ويدرس بس خطفات بسيطة يباوعلي من يشرح
طلب مني احل مسئلة
ارتبكت وخفت احل خطأ وافشل كدام زوجته
حليت الاعرفه باوع على الحل
وكتب بلا ميتكلم ( خطأ ارجو الانتباه )
صدوك بذيج الساعة كلش كبر بعيني ماراد يحرجني كدام زوجتة فكتب حتى انتبه
عاد مرة ثانية الشرح وهلمرة نتبهت كلش زين
امتحني وجاوبت
باوع للورقة ابتسم وكتب (عفية )
طرت من الفرح بس اذكرت اني مراقبة فثكلت ماشريت حلكي
كملنة الدرس
وراد يكوم
_ يلة ام بقوري خلنروح للبيت
_ لا ابو بقوري مو هسة مو ام احمد محضرة كيك ومنتظرتك تكمل
_ تسلمين ام احمد غير مرة تاخرنة
_ لا ابو باقر بعد وكت متطلع الة تشرب عصير وتاكل كيك تعبت من التدريس ربي يفرح قلبك بعائلتك تعبناك
_ لا ماكو تعب انتم اهلنة وبنتكم اختي الزغيرة
_ تسلم ربي يبارك بيك ..كومي غزولة ماما جيبي الكيك والعصائر
طفرت مثل الغزال جبتهن وزعت بالاول زوجتة قريبة علية نوب قدمت الة اخذة وكال شكراً
حتى مجاوبتة رحت وكعدت عالقنفة جان امي تأشرلي اطلع 😑
طلعت واني ادردم هسة مخلتني كاعدة
نص ساعة وراحوا
واني بقيت اراجع بدرس النطانياه وكلشوية اقرة (عفية) واضحك وهم اذكر نظرات زوجتة شلون مكابلتة خلتة حتى ميرفع راسه 😂 والله مبين صاكرتة
بس شكد مؤدب وياهة ومن تحجي شلون ينتبه الهة ويبتسم حتلو حجت حجاية عادية يقابلهة بابتسامة حلوو هيج احترام واهتمام
رحت نمت كوة بقيت بس افكر جبرت نفسي ونمت
اتكررت جيات ابو باقر وزوجتة وياه ونفس الشي مصار شي جديد يبقى مدنك وينطيني درس
واني احاول اكون منتبهة على الدرس وهم اذا شافني مامنتبهة يكتب انتبهي او ركزي
اني شوية اصحصح وانتبه
الى ان بيوم مو عد الدرس جان .......

ولحكايتي تتمة