لاني احبُك شاركتها اياكَ (غزل )

بارت ١٧

مر على زواجنة شهرين
ستئنفت الاجازة و داومت بالكلية مرحلة ثانية
علاقتي بهيثم قوت اكثر وحبنة كبر اكثر
تعايشت وجود رغد
واحاول اسيطر على غيرتي
مرات اضعف،، بس اذكر اني دخيلة عليهة
لازم اتحمل ..والخاطر هيثم كلشي مستعدة اتحمل
هيثم انسان راقي حساس ورومانسي
مثقف جداً بس  يحجي وية الكل كل واحد على مقدار فكره بسيط  ومتواضع
نظيف كلش ويحب النظافة والترتيب
والحمد لله حارزة النظافة والترتيب ومتفوقة بيهن
غامرني بالحب وغامرتة
كل جياتة بس نكضي الوقت غزل وحب

_ هااا حبيبي اجيت
_ ااي اجيت وطبخت التمن
_ ااه صدوك
_ شعبالج مو بس رومانسي حتى طباخ
_ هههههه فديتك يااحلى طباخ
شلونك اشتاقيتلك وبوسته
_ هسة من شفتج صرت زين
ليش اليوم متأخرة
_ اي تأخرنة اكثر من نص ساعة البنات الويانة عدهم محاضرات وتأخر الخط
_ هذا الخط يومية متأخر راح اشوفلج غيره
_ لا هسة عوفة بعد كورس نص السنة اذا بقى يتأخر نغيره
_ اي مظل شي للكورس شدي حيلج مو ترسبين ومحمود يذبهة براسي
_ لعد جذب منو ميخليني ادرس غيرك
_ اني شعلي اني رجال اسوي اشعار وابوس بس انتي تعوفين كلشي وذبين روحج علية
_ هسة صرت اني ذابة روحي وانت مو لزكة
_ اي خليني لازك واقري ليش تعوفين قرايتج لو تريدين حجة حتى محمود يعاركني
_ شكد غثيث
طلعت الاكل من الثلاجة
_ لا بس طبخت تمن
_ راح احضر السفره
......
_ ههههه همزين تمنك معجن جان خبصتني النهار كله بيه
_ اصلاً ماعندج ذوق هذا تمن صحي حتى مانتعب المعدة
_ هااا اي صحيح ماعندي ذوق اهم شي الصحة

..كملنة اكل ولميت السفره وسبحت
_ غزل عوفي المطبخ تعالي بسرعة
_ هسة حبيبي اني بالحمام
_ خوش لعد اني جايج ......
خلص الوقت بين هيثم ودراسه
بليل راح يشوف عائلتة ربع ساعة
اني صح احاول اسيطر على غيرتي بس مرات
اخلي بالي من يروح شكد ويرجع كم من الوقت
يتعدة الربع ساعة لو لا
اني من يجيني ربع ساعة ماتتعدة دقيقة
ظليت اشتغل وعيني على الساعة تأخر
هاي ليش تأخر
طلعت للطرمة باوعت ماشفتة لا بحديقتي ولا بحديقتهم
وين صار راح يصير ساعة من راح
اني بصراحة غرت وضجت كلش
رجع
_ هلوو غزولة
_ هلة
_ شبيج مبوزة
_ ماكو شي
_ اني رايح للحمام جيبيلي تراكي الازرك
وراح بلا كلام
_ ظليت صافنة معقولة سوة شي هناك
شنو القصة اكيد لا ..حاولت امشي الموضوع واقنع نفسي
طلعت اجيب التراك على الحبل
واجة بعيني حبل رغد شارة ملابس نوم الهة وخاولي
مبللات هستوهن مغسولات
اني من شفتهن تخبلت
مظل براسي عقل
مادري حسيت نار بصدري
_ غزل وينج حبيبتي
_ هاا
_ وين التراك صار ساعة اصيح
_ هاك
كمل وطلع
اني سويت نفسي اشتغل بالمطبخ
اجة من وره وحاوطني باديه وخلة راسه بركبتي
_ اني مو كتلج الكاج بالغرفة شسوين بالمطبخ
_ عندي شغل
_ شبيهة غزالتي مبوزة
_مابيه بس تعبانة
_ تعالي وياي واني اعرف اسحب منج التعب
_ مااكدر عندي شغل
_ شغل شنو اكو شي اهم مني
وشالني وهو يكلي مشتاقلج
_ اني ماتحملت دفعتة ونزلت
وخر مني مااريدك روح الرغد كمل اشتياقك اني مااريدك
_ هاي شبيج حبيبتي شجاج
_ اسأل نفسك
_ شسأل مامسوي شي عفتج شحلاتج شجاج
هاا خاف لان تأخرت
_رفعت حاجبي اي استاذ هيثم وليش تأخرت
_ رغد كالت شهودة مالهة خلك وظليت يمهة جانت نايمة ومن كعدت وشافتني ظلت تلعب وياي مابيهة شي ماكدرت اعوفهة
_ اني ماامنعك من اطفالك وهمة يمي اكثر ما يم امهم
بس تروح وتتاخر مااقبل جيبهم وتعال ولا تتأخر
_ هذا كله لان تاخرت عليج كولي مشتاقتلك ومستعجلة وفضيهة بلا زعل
_ لاااا مو لان تأخرت
_ لعد شنو
_لان جنابك ماصبرت الباجر من تروحلهة بيومي رحت نمت وياهة واني من تجيني ربع ساعة لو شاسوي ماتتقربلي دكلي مو يومج
_ انتي شجاي تخربطين
_ اني اخربط فهمني ليش تاخرت ساعة وليش اجيت سبحت
_ كتلج شهودة كالوا مالهة خلك وبقيت يمهة الحد ماكعدت
وسبحت لان من اجيت بالحديقة شفت بقوري شامر طوبته بالشجرة كالوا نزلهة فظليت احرك بيهة الحد ماوكعت ودمرت تراب و ورق من الشجرة ياست غزل لا كلش عندج ثقة بيه
_ ثقة اي عندي ثقة بيك بس بيهة لا
تعال شوف شنو هاي اذا منمت يمهة هاي شنوو
_ شنو
_ شوف ملابسهة على الحبل والخاولي قبل شوية شرتهن
_ اااخ منجن يالنسوان فلا تكعدن راحة
وراح للغرفة
_ اشو رحت مطلعت عذر للملابس
_ ماعندي حجي احجيه ولا اريد ابرر
كتلج الصار تردين اصدكين تردين لا بكيفج
_ هيج يعني مااهمك
_ غزل انتي تعرفين شكد احبج
بس مال تتهمين هاي مااقبلهة
المفروض تعرفيني وتميزين مو كبل هجمتي علية تتهمين
لعبة تافهة من رغد هزتج هز
وين الحب والثقة لو بس كلام
_ يعني شنو
_ يعني انتي ماعندج ثقة بيه
اني الاسويه وياج اسويه وياهة ماكو وحدة تتعدة حدهة
يومج بس الج ويومهة بس الهة
فلا تخلين حركات تافهة تهزج
لان هيج اكوم اضوج اني موطفل وتحاسبيني
شنو طفل لو بلا مشاعر
معقولة هيج شوفيني وين مالكة فراش اذب روحي
_ لااا مو هيج بس الموقف خلاني ماافكر
_ اني مااريد الانسانه الاحبهة ماتفكر اريد اثق بيه بكد حبهة
حب بلا ثقة بلا فايدة
_ خليك بمكاني بهيج موقف شسوي
_ مااسوي شي لان موقف تافه
طفي الضوة اريد انام
_ لاتنام وتعوفني
_ عندي شغل الصبح طفي الضوة
_ مااا
_ خليج اني اطفيه
طفاه ونام اني بقيت كاعدة افكر
شلون سوت حركة خلتني اتخبل على هيثم
حركة بسيطة هزتني وكلبت كياني
اني ضعيفة مااتحمل
ويجوز صدك ماعندي ثقة بهيثم لو عندي ثقة جان اول شي سمعت منة وبعدين احكم
اول مرة نزاعل
اول مرة مايلفني بحضنه وينام
خل اراضيه
بدلت واجيت حضنته وهو داير وجهة
ابتعد
_ هاي شبيك حبيبي لا تزعل مااكدر انام وانت بعيد
غطة راسه وماحجة
اني بقيت حاظنتة وهو داير وجهة  بصعوبة نمت
لان تعبانة
كعدت الصبح لكيته كاعد ومتريك
ومبدل يريد يروح
_ ااااوف هذا شلون صباح اول مرة مااكعد على همساته ولا شقاه وضحكة مبين كلش زعلان
ردت احاجيه لكيته طالع
طلعت وراه بطرمة شفته دخل على بيت رغد
شعنده من الصبح ...تقربت على الباب البيناتنة سمعت صوت رغد
هيثم_ هاي ملابسج شسوي على الحبل
رغد - غسلتهم وهسة اجيت ادخلهم وانت اجيت
هيثم- وشعندج غاسلتهن
رغد- وصخات
هيثم- ملابس داخلية وثياب مولائقة بعد ماتنشر بطرمة وحركات جهال بطليهة
رغد - مادكل الغزل هم لاتشر لو بس علية
هيثم- شو شكلج وكلتي كول الغزل اني احاجيج الج اسمعي الكلام وانتي شفتي غزل شارة ملابس ؟
رغد- اي وراك كلشي سوي
_ ههههه استغفر الله ربي ثبت علينة العقل والدين
وين اسوي وراي وهي تطلع قبلي للدوام واجي قبلهة
اسمعي رغد خليني محترمج كافي ترة تعبت صدكي تعبت وانتي تعرفين شنو المتعبني صيري عاقلة مرة وحدة الخاطر جهالج ادري اني مو مهم  بس الخاطرهم ..اني رايح
_ سمعت خطواته رحت اركض بلا صوت للبيت
كلبي نكسر على هيثم ليش يكول تعبان نوب اني الغبية تعبتة وضوجتة
راح وهو ضايج شلون اتحمل الباجر يلة اشوفه واراضيه
عدلت البيت قبل لااروح وشفت تراك هيثم النزعة من جان يم رغد صدك كله تراب
شجاني شبيه تخبلت عليه البارحه......
خلص دوامي واني ضايجة وافكر
من رجعت خابرت ماما وسولفتلهة
كامت تحجي علية وتوصيني مااغار من رغد
ليش دائماً احس اكو شي تعرفة ماما المفروض مااغار
ادري اني ازغر واحلى بس اكو شي ثاني اتمنى اعرفه
نهيت المكالمة من ماما
رحت صليت ونمت حتى بلا غدة
كعدت على صوت باب الصالة يندك
فتحته لكيت بقوري وشهودة
_ تعالوا ياحبيبوني
_ غزل ماردت شهد تجي وياي بس هي تبجي وبابا كال اخذهة
_ بابا موجود
_ اي
_ وانت ليش متريد شهودة تجي وياك
_ وكحة وتبجي وتهوس البيت
_ ميخالف حبيبي هي طفلة زغيرونة حتى بعدهة متحجي
حتلو تهوس اني انظف وراهة
_ يعني ماضربيهة
_ لا حبيبي شلون اضربهة
_ ماما تضربهة
_ تضربهة ؟!
_ اي ومن تريد تضربني اشرد اني سريع هههه ومتلحك بيه
بس هاي ثولة متركض
_ لادكول ثولة حبيبي عيب تغلط وهي زغيرونة من تكبر تركض وياك
شتريد اسويلك اكل لو كيك
_ انتي شتاكلين اكل وياج
_ ااوي فديتك ياروحي
تعالي شهودة
شلتهة ابوس بيهة هي حليوة حنطية وعيونهة صفر
بقوري اسمر معسل بس عيونة استنساخ عيون هيثم
احبهم ثنينهم بس بقوري احسه معجون بكلبي
حمست لحم مثروم وطماطة وفلفل وكعدت  اكل اني وياهم
وحسيت صوت ماما باب الصالة
طفرت بسرعة
_ ماما هلوو بيج حبيبتي
_ هلوو حبيبتي اجيتج بلا مااخابر
_ لا ماما شنو تخابرين هذا بيتج
_ جنت طالعة مكدرت ارجع للبيت كلبي يمج كلت امر اشوفج
_ حبيبتي كلبي نشرح بشوفتج بس ليش ماجبتي نرجوسة حمودي كروري مشتاقتلهم
_ طلعت اني واحمد ومن كملت كتله روح للبيت اني رايحة الغزولة هو ظل يبجي راد يجيج
_ فدوة حبيبي ليش مجبتيهم
_ ماما عدهم دروس احمد اول متوسط دروسه هواي ونرجوسة خامس بعد تعرفين شلون صعب
_ كم مرة كتلج دزيهم ادرسهم
_ لا اني ادرسهم انتي يادوب تلحكين دوام وبيت ورجال
تعال بقوري ليش مااجيت تسلم علية حبيبي
باقر_ ماما كالت ماسلم عليج من اشوفج
سعاد_ ياا حرامات جبت جبس وحلويات لعد هسة المن انطيهم ..غزل شهودة تاكل حلويات وجبس
غزل- اي ماما تاكل واني هماتين
سعاد- انتي من يومج تفقدين على النمنمات
باقر - اني هم احب المنمنات
غزل _ ههههه حبيبي نمنمات مو منمنات
اذا تريد بوس خد خالة سعاد واخذ منمنات
باقر_ اني احبهة خالة سعاد بس ماما متقبل
سعاد _ اني هم احبك بقوري تعال بحضني خل ابوسك
واشوفك شجبتلك
غزل- اخذ نمنماتك وتعال اكعد هنا فتحتلك التلفزيون
سعاد_ مريت على مجمع قريب مفتح جديد
_ اي شفتة من رحت للدوام مبين بضاعته حلوة
_ اي حلوة وعجبتني كم حاجة الج نازكة
_ انتي كلما تطلعين اجيبيلي متنسين اني زوجت
_ واذا زوجتي اظل احسبج حالج حال اخوتج بكلشي
_ اني اذا اظل على دلالج انتي وبابا مااكبر بعد خمسين سنة الله يحفظكم الي
_ جبتلج حاجات البسيهم من يجيج هيثم هسة من يشوفج ينسه الزعل
_ ااخ ماما شتاقيتلة مااتحمل زعلة
_ لعد ليش ازعليه
_ هو زعل اني مازعلته ..شسوي ماتحملت غرت متت غيرة
_ هو انتي مال شرج ليش اني مااعرفج من اختج تغارين
مونوب شريجة
_ لا والله ماما اتناساهة واتحمل بس هي هيج سوت حركة خبلتني
_ خليج قوية اني صح جنت مقابلة على زواجج من هيثم بسبب مرتة بس هيثم متلكين منة لو دورين العالم يحبج ويخاف عليج من كلشي لاضيعنة منج بدلعج الزايد
_ الله كريم احاول اصير احسن
_ يلة اني رايحة اخوتج وحدهم
_ بعد وكت ماما
_ لا حبيبتي كافي اهم شي شفتج
....راحت ماما كضيت الوكت دراسه
اراجع الفاتني بالاجازة
بليل صار موعد جيت هيثم الربع ساعة
سبحت ولبست نفنوف كصيف فوك الركبة
ونثرت شعري وخليت مكياج خفيف
ودزيتلة رسالة
سهله وحك عيناك تنساني انتـــــــــــه
بس كلبي ينسه شلون وانته السكنته

شوية وسمعت الباب نفتح
تلكيته دخل سلم باوعلي  دنك وفات للغرفة
لحكته
_ وكفت مقابيله
جريمة القتل شنو عقابهة؟
_ حسب الجريمة والمحكمة
_ بمحكمة الغرام رفعت جريمة
_ اي و منو القاتل ومنو المقتول
_ انت القاتل وقلبي القتيل
_ ليش ما العكس
_تخوصرت .. ليش اني هجرت حبيبي ونمت داير ظهري وعفت حبيبي مكسور الخاطر
لو دخلت ومابوسته وحضنته ؟
_ هاا اذا هيج اني المجرم
_ اريد اعاقبك
_ عاقبي  ولاصيرين رحيمة اني مجرم
_ عقابك تبقى سجين قلبي وعيوني للابد
مع التقبيل المميت
_ على هذا العقاب الكل يصير مجرمين
تعالي وفتح اديه عاقبيني واني مستسلم مااقاوم.......
.......
خلصت الربع ساعة ورجع هيثم البيته
فرحت كلش من رجعنة مثل قبل واحسن ونسينة الزعل
طلعت ملابس هيثم ارتبهم شفت كم قطعة
تحتاج غسل غسلتهن وطلعت بالطرمة اشرهن
لابسة تراك وشعري مفتوح تعلمت كل الوقت شعري مفتوح
لان هيثم ميقبل اشيلة
طلعت واتلفت خاف يطلع ويشوفني بالتراك وهو ميقبل هيج اطلع
داشر وسمعت صوت بجي ....

ولحكايتي تتمة