لاني احبُك شاركتها اياكَ (غزل )

البارت الثالث

البارت الثالث

رفعت راسي وشفتة سبحان الله الخالقة ودنكت مستحية من نفسي عبالك برمة خوب مو مثل حالي
هو دار وجهة وشافني ورجع دخل للبيت ما مهتم
لعد شبية اني معت من شفته
دخلت للبيت
اضحك على روحي مو من طبعي اباوع على رجال ولا يعجبني احد شجاني ياالله مبين علية دامر بحالة تقشف عاطفي 😂
_ سوسوو لا دكليلي ماطابخة سعاااااد وينج سعاااااد
_ فلاتبطلين سوالفج العوجة ولج كم مرة كتلج لاتصيحين نوب بطرمة تصيح وتصيح سعاد عبالك اختهة مو امهة
_ اخترعت شفت الطباخ فارغ بسلا ماكو غدة وانتحر
_ اي مسويت
_ لا ااااااخ قلبي صغير لا يتحمل هذا الالم
ليش هيج سعاد ليش
_ ملحكت بيت وتنظيف واخوتج ونوب سويت كيكة الصديقتج شصير
_ اي ذبيهة براسي كولي كلة من غزل وفضيهة
وهسة شاكل
_ لاتبجين وصيت ابوج يجيبلنة غدة من برة
_ اي دكولي هيج من البداية هبطتيني نص حيلي راح
_ انتي همج بس نفسج وبطنج ولا يبين بيج هلكد تاكلين نوب تاكل حلويات بكد رحمة الله
_ صدوك على طاري الحلويات شفت ابن جيرانة بالباب صدقة لله يخبل
_ منيلة يخبل ولج عادي اخوتج احلى منه
_ لا الله عليج تشوفين ولدج احلى من هذا البرمة
_ منيلة برمة ولج اسمر ومدعبل وكوة يمشي
_ اسمر !
_ اي اسمر ويمكن عمرة اربع ثلاث سنوات
_ ههههههههههههه يا ثلاث سنوات اني احجي على الشاب
_ عزة العزاج قصدج ابوه
_ ابوووه 😲 طلع مزوج
_ اي مزوج وشلون مسميتة برمة متستحين اول تالي تباوعين على لزلم
_ شعلي اني هو خلة روحة بوجهي ومن كد الحلاة مكدرت ارفع عيني منة
_ ولج استحي
_ ديلة هسة اني شكلت بطلت حتى مااحجي من فشلتي طلع مزوج بسلا هاي السمرة مرتة
_ مالج دخل منو مرتة روحي بدلي
رايحة عيني سوسو بست خدهة ورحت الغرفتي وانة اضحك على نفسي شجاني من شفتة استخفيت
بدلت واجة بابا وتغدينة ورحت نمت ساعة وكعدتني امي احضر نفسي راح تجي زمن كملت وشفت اخوتي مكيفين بالكيكة ويصفكون ونافخين نفاخ كعدت لعبت وياهم وضحكنة وطكينة النفاخ وامي تحجي علينة ماظل نفاخ للحفلة
شوية واجت زمن فرحانة لان مهتمين
_ والله حسيت نفسي طفلة
_ لاتكيفين بس ناكل الكيكة نكتلج لاتتعودين على الدلال
_ ههههه ميخالف اكتلوني اهم شي احتفل
_ ترة جنة محضرين نفاخ بس كلة طكيتة على اخوتي
_ خبيثة مو بيدج
كملنة الاحتفال واكلنة الكيك وكلش زمن تعجبت بكيك امي
_ شعبالج امي نادرة بكلشي وشسوي يطلع طيب
_ لعد ماطلعتي على امج نادرة اشو بس تضحكين وتاكلين
_ هو اني نادرة بالاكل ،، تعاي نروح بغرفتي ونسولف
_الله شكد حلوة ومرتبة غرفتج اكيد ترتيب امج
_ الغرفة ترتيبي بس الغراض ماما اجيبهن
غرفتي عبارة عن سرير وكنتور وميز مراية وميز قراءة نفس الون والموديل لون وردي فاتح ومرسوم عليه ورد لونة وردي طوخ
وبنص الغرفةشباك عليه بردة بيضة ودانتيل وردي مكشكش حواليهة ورد ناعم
ماعندي تلفزيون بابا ميقبل ولا حاسبة بس من اريد استخدم موبايل ماما
_ صدوك كلش حلوة غرفتج
_ تستاهليهة كدامج
_ ههههه دسكتي لا اجيب ملابسي واجي اعيش يمج
_ لا حبي اشاقة وياج خوما صدكتي هو اختي ومااريدهة يمي
_ عبالي صرتي كريمة علية..اكلج صدوك من اجيتكم شفت شاب باب البيت المقابيلكم ديشتغل ذول جيرانكم تعرفونهم
_ تقصدين البرمة
_ يابرمة اكلج رجال
_ اي هو عبالك برمة
_ هاي انتي تحجين لو غيرج اول تالي واحد يعجيج هو استاذ سيف احلى من هذا وازغر وماعاجبج
_ هسة الة تعكرين مزاجي بطاري سيف عندي هذا البرمة احلى منة
_ ههههه الظاهر تخبلتي وشعرفتي منه
_ كلشي ماعرفت ولا اريد اعرف شعندي وياه رجال مزوج
_ اااه مزوج ههههههه والله بوري غزولة
_ ولي شنو بوري قابل شنو حبيته انتي شكد بطرانة
اني لا احب ولا اريد احب
_ ليش
_ اولاً لان بابا اكيد يرفض وبس احصل وجع الكلب ثانياً اريد اعيش بحرية هاي الفترة من عمري اكمل اعدادية وادخل كلية واشوف المجتمع يلة نوب افكر بزواج فهمتي
_ خل نشوف 😏
_ اشو ماعاجبج حجيي مو صوجج صوجي اني مسويتلج اعتبار ..وبعد ماتكافشنة وسولفنة راحت الاهلهة واني كفيت البيت وية ماما ورحت اقرأ
ثاني يوم نفس كل مرة حضرت نفسي وطلعت باوعت الباب جيرانة وانا اضحك كلت بلكي طالع بالباب عاد واحد يصبح على وجه حلوو بس حرامات ماكو
رحت للمدرسة واول درس المغثة بوجهي صار
_ شعجب اول درس رياضيات كل مرة اخر درس
_ مادري اني اول مشفتة كلت هسة غزل تضوج
_ اي والله ضجت
بدة الاستاذ يشرح الدرس واني منتبه على شرحهة بس اباوع لو على السبورة لو على الدفتر ماحسيت الة صاحني
_ غزل
_ نعم استاذ
_ كومي حلي هاي المعادلة
باوعتلة مستغربة هو قليل يكوم بنات اكثر شي يسوي امتحان يومي اني كمت مااهتميت كتبلي على الصبورة
حليتهة ورحت كعدت
_ شبسرعة رحتي كعدتي غير تنتظرين اشوف حلج
_ حلي صحيح
_ متأكدة
_ نعم استاذ اتأكد وشوف
_ زين يعني منتبهة للدرس
باوعتلة 😐
سيف: قبل لا يخلص الدرس حابب اتعرف عليكم اني كل مرة درسي اخر حصة لان عندي دوام بغير مدرسة بس اليوم غيرت الدرس الصبح لان عندي شغل شنو هواياتكم وشتتمنون صيرون
كلهة بدت تحجي بسرة ماشاء الله كلهة طلعت رومانسية ويحبن الشعر والكتب وحيصيرن دكتورات وشاعرات هجم بيت الجذب🖐🖐
وصل الي السره كال وانتي غزل
_ مامفكرة شأصير شيطلع معدلي اتأقلم وياه
_ اه معقولة تدرسين وماعندج هدف
_ اكيد عندي هدف مو بشرط يكون شنو تطلع شهادتي
_ شلون يعني
_ يعني اغلب البنات رادوا شهادات عالية اني اذا اريد شهادة عالية لو احققهة لو اما احطة بالي بعدين ادرس الموضوع اشوف نفسي عندي قابلية احقق هلشي اذا ماعندي قابلية ماافكر
_ بس لازم تخلين بالج هدف
_ بالي انجح واطلع معدل زين وشينقبل معدلي قابلة معندي اشكال
_ معقولة
_ وليش لا
_ زين واذا نقبلتي شي ميعجبج
_ استاذ خلنحجي حجي واقع احنة بالعراق مو بغير مكان يعني تتعين عكس اختصاصك
_ ههههههه اكيد زين شنو هوايتج
_ هواي هوايات وحسب المزاج
_ مثل شنو !
_ اكيد مو شعر 😏
_ ههههههه
_ وشبيج وية الشعر
كعدت لان شفتة لح وياي بالاسئلة ومااحب احد ياخذ علية نظرة محلوة
هو باوعلي ابتسم وبدة يسئل بالوراي بس بلا اهتمام
كمل الدرس
_ ولج طلعت روحي همزين كملواني حاطة راسي علرحلة بملل
_ ليش بالعكس درس مريح واستاذ سيف ديخلي المادة خفيفة علينة حتى نفهم
اكلج صدك شعندة وياج احسه مهتم بيج
-_ رفعت راسي بعصبية شعندة وياي اكيد تخبلتي يعاملني حالي حالجن وبعدين تعرفيني مااطيقة
_ علكيفج حبي والله موقصدي بس ردت اسألج ياكلمة ردي المكانج وااه وسدت حلكهة بايدهة
اني تنرفزت بس تصرفت طبيعي
قبل الدرس الاخير رحت اشتري طبعاً اني مااشتري الة قبل لايدك الجرس او من يدك حتى ماكو زدحام واكيد يومية محصلة رزالة من المدرسات بسبب التأخير
_ ولج غزل مظل وقت للشراية خل نرجع
_ انتي ارجعي اني ماارجع الة اشتري
رحت وشفت استاذ سيف طلع من الادارة وتوجه النة
_ غزل
اني توترت بس سويت نفسي مااسمع
_ ديصيحلج استاذ سيف
_ امشي لاتلتفتين
_غزل غزل
_ ولج حتسمع كل المدرسة جاوبيه وكفت باوعت شفت كل الطالبات بصفوف التفت عليه نعم استاذ
_ شنو مسمعتيني
_ لا شكو استاذ
اريد احجي وياج
_ تفضل
باوع الزمن
_ اني رايحة غزل للصف كدامج
لزمت ايد زمن
_ ماحاجة نروح سوه ..تفضل استاذ
_ هو بتسم ودنك ..ردت اكلج مستواج بالشهري متدني لازم شدين حيلج وراج متحانات اصعب من الشهري
_ تسلم استاذ ان شاء الله اشد حيلي
_ خاف تحتاجين مساعدة اني حاضر اكدر انطيج درس اضافي بالفرصة انتي واذا زمن تحب وباوعلي ومبتسم
_ شكراً استاذ اذا احتاج اكلك ..بعد اذنك تأخرت على الدرس
رحت اركض للصف بس كلش متوترة ومتنرفزة وصلت لصف قبل لا ادخل التفت وراي شفتة بعدة واكف يباوعلي ومبتسم اني باوعتلة بعدم اهتمام ودخلت
وحصلت رزالة معدلة من المدرسة نوب لو مشترية مجان ضجت هم ماشتريت وهم استاذ سيف الغثيث شلون يوم
خلصت المدرسة والطريق كلة تقنع بية زمن ان اتعامل بلطف وية استاذ سيف
_ شوفي زمن لا استاذ سيف ولا غيره هذا طبعي مع كل رجال ماما معلمتني هيج وبعدين ليش اصرف بلطف هو استاذ واني طالبة ولازم هيج يكون التعامل اما اذا بقيتي تلحين ثقي اخلي علاقتي وياج سطحية مجرد زميلة دراسة
_ لا حبي عليمن اتصرفي براحتج اني كم غزولة عندي كلشي ولا صداقتنة اصلاً غثيث وماينجرع ولاتنطيه وجه
_ عفية بالحبابة

افترقنة ودخلت الشارعنة ومن بعيد شفتة يلالي بشمس عبالك حبات ليلوو😂
ظليت مدنكة واباوع منجوة ليجوة طول غصن ريحان جسم ممشوق بس مو معضل بس كلش وسيم وابيض ثلج ابيض من حياتي 😁 ولحية سودة خفيفة على وجهة الابيض وعيونه السود طالع ولا بالاحلام
جان واكف وية ابنه عمره تقريباً ثلاث سنوات ولا عبالك ابنه صح ابنه معانيه حلوة بس هو شكل وابنه شكل ثاني
جان رفع راسه وباوعلي ......

ولحكايتي تتمة