لاني احبُك شاركتها اياكَ (غزل )

بارت ١٨

سمعت صوت بجي
هذا صوت منوو؟
اقتربت على السياج هو ناصي واني مو كصيرة رفعت نفسي وكفت على اصابيع رجليه
شفت رغد كاعدة بالحديقة وتبجي
وتحجي بس ماافهم نص الحجي ماسمعته
بس مااحبك مااريدك انت ظالمني وتبجي
الباقي كلام مامفهوم
اجة هيثم دنك عليهة مدري شيحجي وياهة نوب رفعهة من كتوفهة وكومهة بحنية
اني خفت لايشوفني
رجعت للملابس وبالي يم رغد شبيهة ليش هيج تبجي
شسوالهة هيثم معقولة مأذيهة
بس هو حنين حتى من اجاهة عاملهة بلطف
سرحت ماادري شكد
ماحسيت الة على صوت هيثم
وتالي شوكت تخلص الصفنة وين سارح الغزال
_ يمة خرعتني والله وكفت كلبي
_ اسم الله على كلبج غزولتي صار ساعة اباوع عليج وانتي بغير عالم سارحة
_ هاي وين واكف وين اشوفك هم وره السياج وهم جوة الشجرة وضوة قليل
_ اي وشعندج طايحة على القميص نكت وشعرج يهفي وراج وليش هيج طالعة بطرمة
_ كلت بليل ماكو احد شمدريني ح تطلعلي
تعال فتر ليش تحاجيني من الحايط
_ لا مااجي انتي مشاكسة بس اذا تنطيني بوسة من السياج تسوين علية فضل
_ ههههه لااااا
اخذت السلة بتمايل ورفعت شعري بايدي ودخلت للبيت باوعتلة غمزلي
ضحكت ودخلت
بس بقت صورة رغد بالي
اريد اعرف شبيهة معقولة هيثم مأذيهة!
شوية واجتني رسالة من هيثم

"نظرت فأقصدتْ الفؤاد بطرفـهـا ثم انثنت عني فكدتُ أهيمُ
ويلاه إن نظرتْ وإن هي أعرضت وقع السهام ونزعهن أليمُ"
"ابن الرومي"
قريت الرسالة واني هايمة
شكد احب رومانسيتة
مستحيل هذا الانسان الشفاف يأذي احد
.....
بعد شهر الوضع كما هوو ماكو شي جديد غير الحب والاشتياق

جنت مشوقة الشوفته
استقبلته بشوق واحتواني بلهفة وحنان
_ انتي شو يومية ازيدين حلاوة يمكن مصنوعة من حلقوم مو طين
_ هههه وانت معجون بحليب
_ اني جنت ناوي اخذج تغيرين جو ونتعشة برة
بس من شفت هذا الشورت الكوبوي غيرت رأيي
_ صدوك ح طلعني زين وين نروح
_ كتلج غيرت رأي ماكو طلعة خل امتع عيني وحواسي
_ لااا عفية هسة انزعه
_ تنزعينة شنوو ماااا خل احجي مثلج مااا تنزعيه وماكو طلعه..هذا مشايفة شوكت جبتيه
_ ماما جابته
_ عفية سعاد تعرف شأحب
_ فدوة خل نطلع
_ اي بس مو هسة ...................
_ يلة مو وعدتني نطلع لو ضحكت علية
_ شلون اضحك على غزولتي يلة نطلع
طلعنة فترينة وتعشينة ورجعنة
_تمنيت بقوري ويانة مرة ثانية ناخذة ويانة
_باجر اطلعهم
_ ميخالف اني احب اخذة وياي
_ ان شاء الله..امتحاناتج قربت شدي حيلج حبي
_ لاتخاف مسيطرة
_ عفية بغزولتي
ثاني يوم راح هيثم وبليل اخذهم طلعهم وتعشوا برة
اني رحت لاهلي العصر
وبليل اجة هيثم رجعني للبيت بقة يمي شوية سولفلي على طلعتهم وراح
اني بديت ادرس الحد ما تأخر الوقت
بعدين اذكرت عندي ملابس برة بالحبل خفت لاتمطر الدنيا وطلعت اجيبهم
جان الوقت متأخر هادئ وحلوو حسيت احتاج هيج جوو
شهر الواحد جو بارد بس احسه منعش
ردت الم الملابس وشفت ملاعيب
بقوري بطرمة
عدلت الطرمة واخذت الغراض اوديهم بحديقتهم
اني بنهار ماادخل الحديقتهم بس مرات بليل من اعزل الطرمة اودي ملاعيب بقوري
وديتهم بالحديقة
بداية البيت استقبال خارجي بركن الحديقة بعدين حديقة ومقدمة البيت ركن مطبخ وركن غرفة هيثم وبالنص صالة وبعدين غرفة بقوري ومقابيلهة مغاسل نفس بيتي بس زايد عني غرفة والاستقبال
فباوعت على غرفة هيثم
شفت الضوة مفتوح من فتحة بردة الشباك
اخذني رجلية للشباك ماادري ليش بس
مااحسيت الة اني واكفة يم الشباك
لمت نفسي شعندي هناا وشسوي ردت ارجع اجة بأذني صوت رغد تحجي وية هيثم
تحجي عليه وتصيح بس مو بصوت عالي كان خافت
ماادري اخذني الفضول بلا ادراك وبلا وعي
واقتربت للفتحة الرفيعة الزغيرة الظاهرة من البردة
قربت نفسي وباوعت
بوقتهة مكدرت ادير عيني بقت عيني جامدة
لا دير ولا تتحرك ولا اني اتحرك اصنمت بمكاني
عيني مترمش بس مفتوحة
ومركزة على المنظر
يمكن استمر النظر دقيقة او اكثر
بس كانت كفيلة ان تجمد الدم بجسمي
وتحبس انفاسي
وتشل مقلة عيني عن الحركة
كوة جمعت قوتي وسحبت نفسي
وبديت امشي واتعثر عبالك واحد مبنج
وبلا انتباه ضربت برجلي ملاعيب بقوري وشتغل
ضوة وصوت عالي
اني بديت اركض رحت للبيت حتى ملابسي على الحبل
نسيتهم
دخلت سديت الباب وذبيت نفسي على السرير
تلفلفت بالبطانية
شوية وحسيت بفتحة الباب
وصوت هيثم بهدوء
_ غزل
اني غمضت عيوني وجمدت
حسيتة اقترب
رفع البطانية بهدوء
مد ايدة على شعري وباسني بخدي وراح
تاكدت طلع وسد الباب كعدت ابجي
وكلما اذكر الموقف اشتعل نار ناار ماشايفة منهة بحياتي
كعدت بلكاع وكمت ابجي احس وجع بكلبي
بصدري ماادري بطني بكل مكان بجسمي
رحت ركض للحمام
صرت جوة الدوش وفتحت المي بارد واني بملابسي
المي يجري على جسمي بارد واني احسه نار
نار تجويني
طلعت الغرفتي
ذبيت ملابسي وخليتهم بصطل الزبل
حسيت مااريدهم بعد
بدلت ودخلت بسريري
اختنكت
كمت ذبيت الجرجف ومخدة هيثم بلكاع
ونمت على السرير بلا جرجف
اختنكت اكثر و ضاق نفسي كمت اتصرف بلا وعي
اني ادري زوجته وكلشي يسوي وياهة
بس ادري غير واشوف غير
من شفت تخبلت
ربي دخيلك ارحمني من نار البصدري
من ذكرت ربي تذكرت
اني شفت شي حرام والنظرة الحرام سهم من ابليس
اي ابليس رماني بكلبي
رماني بايماني
كعدت على ركبي وبديت استغفر الله
استغفر وابجي
تندمت رحت ساعة السودة
شوداني الهم شنو الخلاني اشوف
ياريت ماطلعت
تندمت اغضبت الله
صدك الغيرة نار وغيرت المرأة كفر
مانمت لصبح كاعدة
بس اخذتني رجافة يمكن صخنت
صارت صلاة الصبح وماكدرت اصلي
ارجف وخجلانة من ربي
بس ضايجة من هيثم احس مااريدة
دزيت رسالة البنات وياي بلخط لا يجون مااروح
ونمت
كعدت ب١١ كوة كمت ارجف صخونة
قوة ماعندي ولا بيه اتحرك
كوة سويت كوب حليب
بس حتى اتقوة واخذ علاج
شربت حليب واخذت علاج
وكعدت اريد اوخر الصورة من بالي
مااكدر متقبل تطلع من عقلي
رجعت الغرفتي ونمت
حسيت على ايد هيثم بكعدني
فتحت عيوني شفتة يلامس بشعري وخدي وقلقان علية
_ ليش هيج حبيبتي انتي مريضة وماخابرتيني
مارايحة لدوام وضالة الوحدج ليش ماخابرتيني
كومي خل اخذج للطبيب
_ مااريد مابية شي
_ شلون مابيج وانتي مصخنة كابة نار كومي حبيبتي
خل اغيرلج ملابسج
راد يرفع ثوبي واجة بالي الصورة الشفتهة
بسرعة دفعتة بادية
_ وخر مني مابية شي عوفني
_ شبيج عيوني غزولة ليش ماتريديني
ويمسح وجهي بايده
قرب على خدي و باسني
جسمي كزبر منه
اجة بالي هو هم هيج يسوي الرغد
اكيد
مااريدة ولا اريد يلزمني
امحسيت على نفسي الة اصيح عليه
وخر مني لاتجيني
انت مقرف مو نظيف لاتلزمني بهاي ايدك لزمت رغد
رووح الرغد
انتم كلكم حيوانات همكم بس الفراش
رروح اشبع منهة
كومة صيحت بلا وعي حتى مااذكر شكلت
جنت مصخنة ومنا مغثوثة
لا دري شحجيت ولا شخربطت
بس ادري اصيح واغلط
وهو راد بس يهدئني يريد يفتهم
لزمني من اديه وحاول يحاوطني باديه حتى اهدى
بس حاوطني ماتحملت تقيئت
وكعت
ماحسيت الة اني بالمستشفى
فتحت عيوني معلكيلي مغذي
صخونتي كلش قوية
رفعت عيني شفت هيثم بعيد عني
مكتف اديه واكف شكله خايف عليه
بس مااتقرب الي ولا حاجاني
حاجاه الدكتور كلة مابيهة شي يخوف
بس مستبردة بردة قوية ويمكن عدهة نهيار عصبي
اذا تريد شوف دكتور هيج اختصاص يعاينهة
اني انطيك بس للاستبراد وحتى تنزل صخونتهة واذا تريد انطيك عنوان الدكتور
تشكر منه هيثم واخذ الراجيتة
راح يجيب علاج
شوية واجة جايب سستر انطتني علاج
وضربتني ابرة كالتة اذا تريد طلعهة
اقترب مني وكومني بلا اي كلام
مشيت كوة هو لازم ايدي ويمشي بلا مايباوعلي
صعدني بالسيارة
ومشة اني دايرة وجهي على الجامة اريد اذكر شحجيت
شخربطت قبل لا اتخربط مااجة بالي بس صياحي
باوعت لطريق هذا شارع اهلي
وصل الباب اهلي ونزل دك الباب
واجة فتح الباب اليمي ونزلني بهدوء
نزلت باوعتلة باستفهام
ماهتم اخذ ايدي ومشاني البيت اهلي
طلعت ماما تلكتني كانه تعرف مالي خلك
اخذتني دخلتني وهو راح
_ شبيج ماما غزولة ليش هيج صاير بحالج
وليش ماخابرتوني اجي وياج للمستشفى
_ مابية شي ماما مجرد استبراد
_ شنو مابيج شي شوفي وجهج مابيه قطرة دم
_ مابية ماما اخذيني الغرفتي
اخذتني نومتني بفراشي
ومخلت احد يجيني
ذبيت نفسي لليل يلة كعدت على صوت بابا يمسح بشعري
ويكعدني شافني مابية تخبل
راد ياخذني الطبيب
بس ماما كلتله هي هاي الصخونة هيج سوي
واخذت علاج شوية وتتحسن
رجعت نمت يمكن ساعة وكعدت
لكيت ماما شايلة جنطة ومبايلي بيدهة
_ منو جاب موبايلي
_ هيثم اجة جاب جنطة ملابس الج ومبايلج
_ شوكت اجة
_ هسة مصارلة هواي
_ سأل عني
_ اي هو كل شوية يخابر يسأل عنج
وهسة كتلة ادخل شوفهة كال لا خليهة مرتاحة
درت وجهي
_ شكو ماما صاير شي
_ لااا
_ اكعدي اكلي لكمة حتى تاخذين علاج
كومتني واخذتني يمهم بالمطبخ
اكلت شوية مالي نفس
بقيت بالمطبخ واخوتي يمي خايفين علية
ويسولفون وياي يردون يواسوني
اباوعلهم مبتسمة شلون يحبوني
ردت اغير ملابسي فتحت الجنطة الجابهة هيثم
وبتسمت اكبر واعرض شي بملابسي جايبة
اني ماعندي شي فضفاض بس هو اكبر الموجودات
جايبه حتى بالزعل يغار علية

ولحكايتي تتمة