لاني احبُك شاركتها اياكَ (غزل )

البارت التاسع

البارت التاسع

ولج اني اااحبج من الطفولة جنت انتظركم باالعطلة يوم يوم بس حتى اشوفج اني فتحت عيني واسمعهم غزل الك وصلت مرحلة كمت احسج ملكي
تذكرين مجنت اخلي احد يلعب وياج
حتى البنات مااخليهن يلعبن وياج خاف يضوجنج
ومن تملين من العابي اخذج بالبايسكل افتر بيج جنت اتعب بس فرحان طاير وانتي مجلبة بية واحاضنتني حتى متوكعين
واروح للمحل واشتريلج بكل مصروفي وارجعج فرحانة
وادائماً اتصنع اني قوي وجبير كدامج حتى تحسين بية ...
وكلما اكبر حبج يكبر بكلبي
كمت ماانام اذا موصورتج بخيالي
جانت عدنة صورة عائلية انتي بصف سادس بتدائي كصيت صورتج وكبرتهة مخليهة بكنتوري اصبح وامسي عليهة
نوب كلسنة من تجين اشوفج كبرانة وحليانة
جنت امووت من الغيرة خاف تحبين غيري
وهاي جيتج من شفتج عقلي وكف معقولة غزولة هيج صايرة جبيرة وحلووة كمت اخاف كلساع اكل الامي تخطبج و ورة منخلص كلية نزوج وهي وعمتي حجن
لان اني الح ومصر انتي الي ...
بس ردت فعلج صدمتني
طلعت ولا بالج وكل هذا وهم بخيالي
_اني من سمعته يحجي بحركة وحتى دمعت عيونة تأذيت هو يحجي واني ابجي وياه
شكدجرحته ولا متوقعة واحد هيج يحبني وبهطريقة وحتى حافظ طفولتي
امير ارجوك لا تسوي هيج دصعب الامر علية وعليك و موقصدي اجرحك ولا قصدي ءاذيك بس هي مسألة مشاعر واني اي مشاعر مااملك الك غير الاخوة
_ اني مو ااااخوووج شجلبتي اخوي اخوي
اكلج احبج دكليلي اخوج
_ لعد شكلك تريدني اجذب واكلك احبك مااكدر
_ انتي تحبين احد جاوبي اذا بالج احد اني انسحب بلكل هدوء
_ لثانية ردت اكله اي احب بس فكرت خاف يكول العمامي وتوصل البابا بسرعة جاوبت ..اكيد لا اني افكر بس بدراسة مابالي غير شي
_ لعد ليش متنطيني فرص اتقرب وننخطب وشوفي مشاعرج اتجاهي وكدامنة اربع سنوات يجوز اكدر اخليج تحبيني
_ لا مستحيل لا
_ ليش لا ؟ اني مااكدر اتركج بسهولة تدرين من اجيت للحديقة وشفتج شلون مسترخية ومغمضة عيونج وشعرج نازل على وجناتج عبالك حرير عرفت اني كدامج ضعيف متحملت اتمنيت اخذج بحظني واحجيلج مشاعري
_ انت شتحجي امير تخبلت شنو هذا الحجي ..كمت بعصبية محسيت الة جرني من ايدي الة بقوة وحظني صح هو ازغر مني بسنة بس جسمه بكدي مرتين اني جسمي ناعم وهو خشن بس بحلاة
حضني بكل قوة وقرب شفايفة عليه راد يبوسني
اني جريت ايدي بكل قوة دفعتة بصدرة وضربتة بقوتي راشدي
_ مستحيل انت صاحي اكيد تخبلت
ورحت اركض الغرفتنة دخلت وسديت الباب بهدوء
باوعت نايمين كلهم
رحت لفراشي دخلت وتغطيت حتى راسي رغم الجو صيف وحار بس اخذتني الرجافة اول مرة يتقرب مني رجل بهلقرب وبهيج موقف كان موقف سخيف خلاني اضوج من امير على هذا التصرف
بقيت بالفراش تقريباً ساعة والرجفة بعدهة بجسمي كلما اذكر الصار
من الهبطة حسيت اريد اروح للحمام بس خايفة
طلعت بعد اضطريت
اباوع وامشي مثل الواحد يريد يبوك امشي واتلفت
دخلت للحمام وطلعت
اجة بالي كلت وين هسة رحت للمطبخ كلت بلة طلعلي شسوي
شنو يطلعلي غير الم البيت عليه بالعياط
باوعت من شباك المطبخ عالحديقة شفتة كاعد ومرتاج على الكرسي ومخلي ايديه جوة راسه ويباوع لنجوم
نقهرت عليه مااريد ءأذي احد بس موبيدي هو واهلة دخلوه بهيج دوامة اكبر من عمره مابيدي شي اساعده
اصلاً كلبي مو ملكي مستحيل ابادل احد مشاعر هي بالاصل مو ملكي
رجعت للغرفة وحاولت انام وقررت اسولف الماما عالصار لازم اكلهة اخاف يصير غيرشي حتى هي تصرف
كوة نمت وكعدت على هوسة اخوتي فوك راسي
_ صباح الخير ماما
_ صباح الخير حبيبتي
_ شلون صارت نرجوسة ؟
_ الحمدلله متتوجع بس تحوس واخاف تأذي ايدهة
_ اكيد تحوس ماما هاي لايلزمهة كسر ولا غيرشي
_ خليهة قابلة بحوستهة وبوكاحتهة اهم شي سالمة
كومي ماما لمي الفراشات وروحي تريكي وشوفي نسوان عمامج خاف يحتاجنج بشي
_ اي ماما كايمة
عدلت الغرفة وطلعت صار بوجهي أمير جان كاعد بالصالة بس شافني خجل وكام طلع
اني رحت للمطبخ سويتلي لفة واني وكافة وكوب جاي رادن يسولي ريوك ومقبلت لان الوقت متأخر وديسون غدة
كعدت عالمائدة والبنات اجن يمي
وعماتي يطبخن
صار الغدة وتغدينة ومااجة أمير
امة خابرتة كلهة يم صديق
للعصر يلة اجة
اني كاعدة اني والبنات نسولف هو دخل سلم بلا ميباوعلي
اني نقهرت ردتة يرجع يحجي ويشاقي وياي مثل قبل مااريد تخرب علاقتنة بس بعد شيرجعهة
التهيت وية البنات بعد فترة امي صاحتلي اشوف اخوتي دورتهم ملكيتهم
كلت خاف صعدوا لسطح للحمامات اكو حمام بالسطح مشكل حلوو واخوتي كاظين كل وقتهم يم الحمام يوكلوهن ويطيروهن
صعدت بس بلا مااصيح
استحي هنا اصيح مو مثل بيتنة هارجتهم هرج
هنا ثكيلة 😁
فوك غرفة أمير هو و واحد من اولاد عمي والباقين ثنينهم بغرفة بصفهم يعني كل ثنين بغرفة ومقابيلهة غرفة اهلة وجوة غرفة عمي وغرفة للبنات
قبل لا اوصل سمعت كلام بغرفة امير
مفهمت بس اجت باذني كلمة غزل
تقربت بس مو كلش وتفاجأة
هذا صوت سمر بس تحجي علكيف وتحجي علية
تقربت حتى اسمع
جان اسمعهة دكلة
_ لاتفكر بيهة والله ولا تستاهلك انت وين وهي وين
_ سمر لاتحجين على غزل
_ مو احجي عليهة بس دشوفهة متناسبك تتمضحك للرايح ولجاي وشايفة نفسهة حتى طبعهة مو مثل طبعك
_ مو اكلح لاتحجين عليهة هي مو تتمضحك بس هي دوم مبتسمة بكد ماطيبة ورقيقة
_ رقيقة شنو يمعود تصنع حتى توكع الولد
_ ولج شنو توكع الولد شومتعرفين تحجين
_ هاي شبيك عصبت اني شعلي انتبه التصرفهة وانت تعرف وبعدين المعلوماتك هي تحب واحد
_ شنووو تحب؟ منوووو هذا
_ اي تحب ونهار كلة تسمع اشعار وتصفن دكول امووت عليه
_ منو هذا ااااحجييي
_ متقبل دكول بس هي تحبه..لاضوج تروحلك فدوة ميت وحدة تتمناك
_ اطلعي برة مااريد اسمع شي
اني رغم نصدمت وحطيت ايدي على حلكي من السمعته بس مردتهم يعرفون سمعتهمم
نزلت بدون صوت بس بسرعة سويت الدرج تلث شبخات ورحت الغرفتنة وسديت الباب
كمت الهث بصوت عالي من شبخت الدرج ومن السمعته
معقولة بنت عمي هيج تطعن بيه
واني ما مأذيته وكتلهة الج مااريدة
بس شلون حيلة تريدة يكرهني
اني صدك مااريدة يحبني بس مااريدة يكرهني
ولاياخذ موقف مني
لازم ا وضحلة الامور بلا ميحس
شوية وسمعت صوت واحدينزل من الدرج فتحت الباب شوية وباوعت شفت امير نزل بس كلش عصبي
ونوب نزلت سمر
اني سويت نفسي ارتب بالغرفة دخلت للغرفة
_ هاا غزل شسوين
_ ماسوي شي بس ارتب بملابس اخوتي مهوسيهن
_ اشو مو علبعضج
_ هاا لا ماكو شي بس اشتاقيت البابا مامتعودة هلكد افاركة .."وصدك مشتاقة يعني مو جذبة "
_ خطية حقج ..تعالي نطلع للحديقة يم البنات
_ اي مختنكة اريد اشم هوة
طلعت يم البنات يحجن بس بالي مويمهن اباوع السمر شلون تصرف طبيعي وتبين هي تحبني لعد ليش هيج طعنتيني واني ما مأذيتج ..شلون دوخة اجتني هسة لازم ابين الامير اني ماعندي شي وية احد واكل لامي نروح الخوالي بعد مااريد ابقة هنا احس ختنكت
صار المغرب دخلنة للبيت التهن بالمطبخ واني رحت للغرفة صليت سمعت صوت الباب البرة نفتحت باوعت شفت امير صعد الغرفتة طلعت مشفت احد يعني محد نتبهلة دخل
اجت بالي فكرة
_ سمر تعالي اريدج
_ هاا غزل اي اجيتج شكو
_ لا ماكو شي بس احس مختنكة تعالي نصعد فوك يم الحمامات مدام اخوتج وية عمو وامير طالع
_ اي يلة اني هم مختنكة
صعدنة وتقصدت اروح يم شباك غرفة امير كتلهة هنا نكعد مدام ماكو احد
_ اي اني هذا جزئي المفضل هههه
_ اي اعرفج ههههه
كعدنة شوية وبدينة نسولف
_ اكلج تذكرين بالمنتزه من كعدنة نسولف وسألتيني هم احب ، وقطعن حديثنة عماتي وحادث نرجوسة
_ هاا اي صدك انتي مجاوبتي
_ اي اني صحيح عاطفية بس حالياً ماعندي شي ولا افكر احب اريد اظل حرة لان الحب وجع قلب وسلبان راحة مثل ماكال الشاعر
وعش خالياً ، فالحب راحتـه عنـاءُ
ًوأولـهُ سـقـمً واخــرهُ قـتـلُ
و اريد اتفرغ بس للدراسة ومن اكمل دراسة واتوظف عود الله كريم
اما حالياً ابد ماافكر انتي تعرفين بظيم الحب شلوون يأذي
_ اوووف شتحجين سلبان راحةمثل مكلتيو لو بيدي فلاا احب
_ ليش متصارحين امير بحبج ترة هو انسان متفهم وخلوق اني لو مااشوفة مثل اخوية جان حبيته لان احسه رجل عليه الاعتماد
_ هاي شنو غزل بسلا حطيتي عينج عليه وغيرتي رأيج
_ لا ماغيرت رأيي امير ماعندي مشاعر اتجاهة غير مشاعر اخوة بس داكلج مدى اعجابي بشخصيته لاتخافين مااخذة منج
_ ههههه هسة ارتاحيت شكد جنت خايفة توافقين عليه
_ لا لاتخافين كتلج ماافكر باي احد الة اكمل دراسة وانتي هم السنة الجاية رابع اعدادي شدي حيلج لاضيعين دراستج
_ والله اذا ازوج اضرب المدرسة بس خل يوافق
_ لا ولج حرامات الدراسة مهمة مستقبلج هذا حصلي شهادة تقوي بيهة تلحكين عالزواج
_ خل اشوف تاليتهة شنو وية امير
_ الله كريم
شو ماشفتج صليتي كومي ننزل وروحي صلي
_ والله اصلي يوم واكطع عشرة ههههه
_ لا لا تحجين صدك اني تعلمت من والدي ماكو شي اهم من الصلاة وصارت جزء مني مااكدر بلياهة كلنة هيج
كومي كافي سوالف روحي صلي
_ ان شاء الله
نزلت للغرفة لكيت ماما ونرجوسة
_ هاا ماما شبيهة نرجوسة
_ تعبتني تركض مثل الاولاد ولا عبالك بنت واخاف توكع على ايدهة
_ اي صح حركة كل شوية الزمهة اكعدهة يمي وتنهزم اني مني تعبت الله يساعدج ماما
صدوك ماما شوكت نروح البيت جدو ؟
_ بعد وكت ناخذ بعد سبوع هنا
_ لا ماما هواي خل نروح
_ ليش شكو ؟
_ ماكو شي بس اشتاقيتلهم
_ اووف واني هم مشتاقتلهم كلبي مفرفح على شوفة امي بس بعدنة مصارلنة سبوع هنا عيب من عمامج فرحانين بجهال خوما اخذهم واروح الاهلي ميصير
_ ماما مشتاقة البابا؟
_ هذا شلون سؤال ولج حموت من الاشتياق بس يجي باجر ان شاء الله
_ صدوك ماما والله مشتاقتلة شوف الحب ميتحمل فراكج
_ لا كلبة على نرجوسة مكدر يجي البارحة واليوم عندة شغل مهم يخلصة ويجي باجر
_ ياالله شلون فرحت حياتي بلا بابا مو حياة
_ الله يحفظة الكم
بقيت بالغرفة مطلعت افكر بالصار واكول شلون اعرف امير سمعنة ياريت سمعنة لان ارتاحيت هم بررت موقفي اني معندي شي وهم خليتة يعرف سمر تحبه
صح متستاهل بس خطية يجوز هيج سوت بكد متحبة الحب كلشي يسوي
طلعت تعشيت ومر الوقت عادي
ثاني يوم اجة بابا حبيبي شكد مشتاقتلة
وهو هماتين كلش مشتاق ومقهور على نرجوسه
بقة يومين يمنة التهينة بهليومين وياه أمير اشوفة
بس اجنب احجي وياه كلما اشوفة اذكر
الموقف السخيف من لزمني واضوج
بس هو جان بس يتحجج حتى يحاجيني
او يتقرب مني واني اجنبه
راح بابا وقنعت ماما نروح البيت جدو
فاتفقنة ثاني يوم نروح وبدينة نجمع باغراضنة
عمامي مقبلوا واصروا نبقة بس ماما كلتلهم مشتاقة البيبي
فعافونة بس ضاجوا خاصة امير
بليل الكل نام وطلعت للمطبخ
جنت مصدعة وادور على بندول بلكت يخف الصداع
محسيت الة احد دخل للمطبخ
_ منووو؟
_ اني شبيج خوافة
_ لا ظلمة مشفت منوو ليش اخاف
_ شعندج بهليل
_ معندي شي طلعت ادور على علاج راسي يوجعني
_ واكو واحد يدور بهظلمة
_ ردت افتح ذاك الكلوب لان ضواه قليل مردت اكعد احد ملحكت بسرعة دخلت انت
شبيك تحقق انت شعندك كاعد
_ جنت بصالة منتظرج تتطلعين
_ هاا شنو وشعندك منتظرني
_ بس احجي وياج كلمتين
_ تفضل اسمعك
_ موهنا خل نطلع للحديقة
_ ليش بالحديقة ماعدنة كلام خاص عندك شي احجي هنا
_ شبيج تخافين مني معقولة
_ باوعتلة صفح انت شدكول حقي اخاف لو لا؟
_ اااااه فدوة الطلوج لاذكريني هو اريد احجي وياج كلمتين انطيني مجال باجر رايحة وتخلصين من جهرتي
_ ماشي
طلعنة بالحديقة
وكفت احجي امير شتريد
_ اكعدي ونحجي شبيج مستعجلة
_ هسة الوقت متأخر لا احد يطلع ويشوفنة ويصور غير شي
_ لاتخافين محد يطلع وحتى اذا طلعوا ميكولون شي
_ شكد واثق من نفسك
_ وهذا الشي بشنو مضوجج
_ ليش اضوج شعلية بيك
_ غزل اني اعتذر عن تصرفي بذيج اليلة ماادري فقدت
محسيت بنفسي
بقيت ساكتة ومدنكة
_ لاعبالج اني هيج ثقي اول مرة اتقرب والزم ايد بنت لاعبالج متعود
_ خلاص امير انسه مااريد اذكر
_ كرهتيني لان هيج سويت ؟
_ مكارهتك بس كرهت الموقف
_ اني حاس باحساسج من فاقدة مشاعر اتجاه المقابل او مستحيل تعيدين توجيه مشاعرج اتجاه شخص
_شتقصد
_اقصد انتي متحبيني حب حبيب بس مشاعرج وياي اخوية
واني كذلك
_ كذلك بشنو وضح
_ هيج مشاعري اتجاه سمر مستحيل تكون حب متتعدة كونهة اخوية
_ يعني انت تعرف بسمر تحبك
_ جنت شاك بس قبل يومين تيقنت
_ شلون عرفت ؟
_ هاي مااكدر اجاوبج عليهة
غزل اني مااجبرج علية لان اني مااريد املكج اني اريدج تحبيني اريد قلبج فاذا محصلت عليه مااجبرج
راح انطي خبر ينسون سالفة زواجي منج
بس اريدج توعديني انه من يكون قلبج مستعد ينفتحلي
اعطيني اشارة والباقي اني اكمله
وعديني
_ اوعدك ..اني مااعرف شأكلك الصراحة موقفك خجلني
واسفة لان سببتلك الم اني موقصدي ولابيدي
_ اعرف غزل الحب مو كوة هي مشاعر مو بالايد
بس اني اوعدج للموت راح أبقى احبج ومستحيل انساج
بلكت من اصير دكتور تحبيني
_ ههههه وشعليه
_ يجوز شوفيني غير شخصية وغير شكل
_ لا بلعكس انت شخصيتك حلوة وحتى عبالك اكبر من عمرك والشهادة مزيدك جمال
_ هاي شنو يمعودة غزل كمتي تتغزلين مو جاي اقنع نفسي تهدأ مو تهيج
_ لا دخيلك خليك هادئ وحباب اني رايحة تصبح على خير
_ تصبحين على خير غزل راح اشتاقلج
_ واني هماتين ح شتاقلكم كلكم

والحكايتي تتمة