لاني احبُك شاركتها اياكَ (غزل )

بارت ١٣

بارت ١٣
بابا_ غزززل
باوعت الماما بتسائل
ماما_ روحي شوفي ابوج شيريد
غزل_ تعالي وياي
ماما_ وج روحي واني اجي وراج قابل شيسويلج متعرفين ابوج
رحت وراه دخل  الغرفته وكعد على السرير
_دخلي وسدي الباب
_ سديت الباب وظليت واكفة
_ تعالي غزل اكعدي كبالي
_ كعدت واني اراقب كل حركة من بابا
صرت مقابيله كاعد ومدنك يفر بسبحته
ظل ساكت فترة وبعدين اخذ نفس ورفع راسة
_ غززل احجيلي بصراحة شكو بينج وبين هيثم
_ هااا بابا
_ لا تخافين احجي
_ مااخاف بابا لان ماعندي شي
_ شلون ماعندج شي وهاي ثاني مرة يخطبج وبالالحاح
وحجة حجي هواي بحيث تأكدت بينكم شي
اني مخلي ثقتي بيج اريد اشوف شلون محافظة على ثقتي
احجي اريد اعرف كلشي وارتاح
_ بابا ثق مستعدة احلفلك بكل معتقد نعتقدة اني وانت مصاير شي بينة لاحاجين ولا ملتقين ولا اكو اتصال
ثق بابا قبل لا اخاف على سمعتي اني اخاف ربي
ماسوي شي خطأ
_ لعد شلون هيج اجة خطبج بلا سابق علاقة وشلون هيج يحجي وياي بالمشاعر وقنعني وافهمني ان سعادتكم بهذا الزواج وهواي كلام مااكدر احجي شلوون ؟
_ عزة هذا شحاجي و ورطني ..بابا انت علمتني الصراحة ومااخاف فانا ح حجيلك وانت بكيفك شلون متريد عاقبني
اني صارت عندي مشاعر الهيثم مااكدر اكلك لا
بس ثق بس نظرات مصاير غير شي
لا هو ولا اني
محد متعدي حدوده ولا حتى بادرة منة كلمة حب او غير شي
واني مشايفتة صار اكثر من سنة وشفتة خطف صدفة ولا اكو اتصال ولاشي
انت انسان واعي وتعرف وخصوصاً اني تعرفني اكثر شخص اذا اكذب بسرعة تكشفني
ثق بابا وداعتك ممسوية شي ينزل راسك ولا اسوي اموت قبل لاتجيك حجاية مني
بس هي مشاعر مو بيد احد شي خارج عن ارادتي وارادتة
انت تعرف ومار بهذا الشي
_ والله كبرتي وصارتلج جرءة هيج تحجين وبكل ثقة
شنو متخافين من ردت فعلي وانتي هيج تحجين
_ لا مااخاف اخاف من الكل بس منك مااخاف شسوي بية اني قابلة انت ابوية وحبيبي مااخاف منك انت اماني
اني احجي لان واثقة متصرف بتهور مثل باقي الاباء عندي ثقة بقراراتك وانت شتقرر قابلة تريد تزوجني الاي شخص  تريد تبطلني بكيفك بس اهم شي لاتزعل مني موتني ولاتزعل مني
_ ياابة  غزل شلون اموتج اكو واحد يموت روحة
بابا اني قابل اريد اعذبج لو استلذ باذيتج بس اني
اعرف بمصلحتج واني رفضتة اول مرة لان ميفيدج
_ شنو عيبه اريد اعرف
_ عيبه مزوج وعنده اطفال
_ وغيره شكو عيوب
_ مابيه عيوب وانتي تعرفين شكد اعزه ومأمن بيه بس زواج منج صعب متتحملين هيج حياة
_ دنكت وكمت ابجي
_ غزل اني كبرتج وتعبت عليج وربيتج غير كل البنات
علمتج عالثقة والصراحة والدلال صرتي غير شكل مميزة بكلشي وترفة شلون ازوجج هيج زواجة واشوف كل تعبي يتبخر
_ اني بقيت ابجي بزايد
_ ااااااااخخ استغفر الله
انتي ترديه ومقتنعة بمشاعرج؟
_ تأملت شوية وبعدين هزيت راسي اي
_ روحي الغرفتج وفكري عدل
رحت فتحت الباب لكيت ماما كاعدة باب الغرفة وحاطة ايدهة على خدهة
رحت الغرفتي وقفلت الباب
بقيت لليل افكر
بكلشي  افكر بقراري
وبحياتي
كلما افكر كلشي بداخلي يصيح وافقي وصري على
رأيج هوهذا حبج لا تتخلين عنه
الثاني يوم اني مطلعت من الغرفة بس رحت للحمام
عافوني براحتي محد صاحلي او اجاني حتى ماما  مااجت
للعصر اجة بابا وصاحلي بغرفته
رحت ولكيت ماما يمة
_ غززل فكرتي بالموضوع البارحة ؟
_ اي
_ فكرتي بكلامي ؟
_ اي
_ اني راح اخلي القرار يمج وابري ذمتي مااريد اظلمج
ولا اكون سبب بأذيت مشاعرج وتبقين العمر كله من تذكريني تذكرين حرمتج من الشخص التحبيه
فانتي شنو قرارج بهيثم  تقبلين لو لا ؟
_ سكتت شوية وجاوبت
من بعد قبولك اني موافقة
_ نهت  واخذ نفس اني اخلي قرار الج لان تأكدت مابيناتكم علاقة لو اكو علاقة جان هسة مصرف وياج تصرف اندمج على ساعة الصرتي بيهة ...بنتي
شوفي  هذا قراراج وحدج مو بعدين تتندمين
وتلومين احد وشوفي غزل انتي بنتي وظلين للمات بنتي وبيتي مفتوحلج بكل وقت بشرط
ابد متجين الهذا البيت زعلانة
بيتي يستقبلج بكل الاوقات الا بزعلج ممنوع تجين زعلانة
هذا اعتبريه عقاب الج
_ دنكت على ايده بستهة وبجيت لاتزعل بابا اهم شي رضاك والله كلشي مااريد
_ مسد على شعري وكام طلع من الغرفة بلا ميحجي
ووامي ساكتة
شكد كرهت سكوتهة تمنيت تحجي ترزل حتلو تضربني بسلا تسكت
ذبيت روحي بحظنهة
_ ماما فدوة لاتزعلين مني اني مااكدر على زعلج فدوة
_ مازعلانة بس ضايجة
_ لاضوجين حبيبتي انتي
_ شلون مااضوج واشوف بنتي تحطم حياتهة
_ ثقي مااحطم حياتي واثقة من نفسي هو هذا اليسعدني
_ شريد اني اريدج سعيدة هو هذا مناي
وخلي بالج دووم هو مزوج راح تدخلين حياة شراكة مو عبالج بس الج شنوالج الهة
وشعندج عدهة
شراكة حتى بضحكة والسالفة والغزل والفراش
كل هذا تشاركج بيه رغد
خلي الله بين عيونج ولا تفرقين الرجال عن عياله
_ سرحت بكلامهة هزيت راسي ورحت
مر الوقت بين ترتيب وتنظيف وية ماما
_ روحي نظفي الاستقبال خاف بيه تراب
_ اي
نظفت ورجعت لكيتهة تحضر جاي وصينية التقديم
_ اشو جاي منو ح يجينة وشعجب جاي؟
_ ابوج دز على ابو باقر
_ هاا ليش ؟
_ يكلة انتي موافقة
_ صدوك ماما
_ اي مو هذا الرتيه
دز عليه يتفقون
_ والله مااصدك صارت صدك
_ الله كريم ان شاء الله متتندمين
_ ماما شتتوقعين رغد اسوي
_ ماسوي شي
_ انت تعرفين اشياء عن رغد ومسولفيلي شضامة
_ ماما شي ميخصج لا تتعلمين صيرين فضولية
_ شنو فضولية غير حياتي مرتبطة على هواي اشياء تخصهة
_ لا تفكرين حياتج مستقلة عن حياة رغد
وهي اذا ماقابلة اكيد ابوج مينطيج
_ هااا
_ اي لعد شتتوقعين
شوية واجة هيثم ودخلوا للاستقبال
_ ماما فدوة اني اريد اسمع كلامهم
خل اروح اتصنت
_ ولج شو عقلج لاكف
_ فدوة ماما مااخليهم يحسون
_ واذا ابوج شافج
_ لا ميشوفني ارجع بسرعة
_ روحي
رحت وسمعتهم يحجون بس فاتني حجي
بابا_ ابو باقر اني كتلك بقراري قبل بس اني مااظلم احد
اني عرفت بنتي تميل الك
بس عندي ثقة بيكم ثنينكم مخنتوني
بس شسوي اذا اكو ارادة بينكم
هيثم_ ابو احمد مستحيل اسوي اخونك بس فهمتك بالصار
_ اي بلي..سكت واخذ نفس ..اني اوافق على زواجكم
بس بشرط
_ انت حدد واني انفذ
_ اطلك رغد
اني حطيت ايدي على حلكي لا  مااقبل تطلك خطية ليش هيج بابا شرط
_ شنووو؟ ابو احمد شلون اطلك رغد
_ هذا شرطي
_ رجائاً ابو احمد فكر بشرطك اشرط غيره عقار باسم غزل
مهر اي شي غير الطلاق
_ غزل مو بضاعة وابيعهة بعقار او مهر
هاي قطعة من كلبي لذلك اشرط اطلك رغد
_ واطفالي ؟
_ مافكرت باطفالك من تريد تزوج
_ اني مفكر بيهم وهمة اهم شي بحياتي بس اذا ازوج
نفسي اني وياهم ماكو شي يتغير واني فهمتك ليش اريد
ازوج حتى قبل لا اخطب غزل فهمتك بطبيعة العلاقة بيني وبين رغد
_ هذا اخر كلام عندي طلك انطيك مرة غير شي ماكو كلام
_ لا ابو احمد لا مااكدر اطلك وابهذل اطفالي
شنو ذنبهم
_ الله وياك مالك شي يمنة
اني مثل الواحد جان طاير وفجئة وكفن جناحاتة
وطاح على راسة
هيج حالي
سمعت خطوات تمشي يم باب الاستقبال
بعدين صووت بابا صاح
_ ااابو باقرر
.........................
صوت بابا صاح
_ ابو باقر
تعال اكعد
انت مصر ماطلك
_ اي ابو احمد اكيد مصر
_ ليش واني اعرف بوضعك اكثر من غيري ليش ماطلك؟
_ اطفالي مااريدهم يبعدون عني ولا اريد ابعدهم عن امهم
اني كل حياتي الهم فاذا سعادتي على حساب حياتهم مااريدهة
_ انت لو قابل اطلك مجان انطيتك مرة
_ شنو يعني ؟
_ يعني اني اريد رجال يحافظ على بنتي وميرخصهة كدام نزوة ..وانت رجال كدهة ..رغم علاقتك بمرتك بس متنازلت عنهة راح اطيك بنتي واني مطمئن
_ تسلم ابو احمد والله مااعرف شاحجي الفرحة عكدت لساني
_ لادكول شي بس بعد عندي شرط وهلمرة مو اختبار
_ كول اي شي اكدرلة اعتبرة تنفذ
_ قبل لا انطي خبر العمامهة اريد اسمع موافقة ام باقر
اذا ام باقر ماقابلة ماكو زواج
_ اكيد لازم بموافقتهة
_ خوش هسة يتأجل اي كلام  الى موافقة ام باقر
_ وقت كم يوم واجي اني وياهة عليكم
_ هلة بيكم
ظلوا يحجون واني رحت بسرعة لايشوفني بابا
دخلت للمطبخ ماكو ماما
رحت الغرفتهة لكيتهة
ماما
_ هاي شبيج مخطوف لونج
_ اي ماما نخطف لوني من السمعته
_ شسمعتي
وحجيت الماما كلشي
_ اشو ساكتة ماما
_ شحجي قابل
_ اي شي
_ ابوج اعرف
_ اكلج ماما والله حرت شكو بعلاقة هيثم ورغد
_ كلشي ماكو حالهم حال اي ثنين مزوجين
_ لا اكو شي
_ اكو ولة ماكو انتي متدخلين بينهم
وبلا مدورين مشاكل اني اريدج اصلحين علاقتهم مو تخربيهة
شوفي غزل اذا حرضتي هيثم على رغد اظل غضبانة عليج الى يوم الدين
_ شكو ماما ليش هيج عصبتي علية اكيد ماادخل بعلاقتهم شنو انتي متعرفيني من شوكت اخرب
_ خاف الغيرة تخبلج
_ لاتخافين اني اخاف الله مااغضبه وحتى احاول انساهة
.....
مرت ايام واني انتظر يجي اشو تأخر
موكال كم يوم واجي اخطب هاي مرت اسبوعين وماكو
اسأل ماما مجاوب ادري بيهم كلشي يعرفون
بس ميحجولي
الى ان ماما صاحتلي
وصتني احضر نفسي بعد يومين الخطبة والعقد
واني تخبلت من الفرحة مامصدكة
شلون وافقت رغد شنو الصار ماادري مثل
الاطرش بزفة
بس المهم راح انخطب واصير الهيثم
هاي احلى فرحة
سالت على عمامي
كالت يجون بيوم الخطبة بس همة بلا نسوان لان خطبة زلم وعمامي مقابلين على الزواج  بس لان بابا الجبير محد اعترض راح يجون بس شكل ميدخلون
قبل يوم الخطبة جنت مخبوصة اني وماما رتبنة البيت والاستقبال وطلعنة شترينة كم حاجة وجبت الي نفنوف
للعقد
ماما رادت ابيض بس اني ردت وردي فاتح قصير ربع ردن
ودلع بيه ليلوو ناعم فضي
وكعب فضي
_ انتي طويلة شسوين بالكعب
_ لا ماما اني مو طويلة طولي يخبل
_ وج اصيرين بطول هيثم لا تجيبين كعب
_ لا ماما عجبني اريدة
_ شسويلج اخذيه ياعنوديه
بعد يوم متعب ذبيت نفسي بفراشي
واني ممصدكة صدك الردته صار باجر اصير مرته
شيجيب باجر واصبر شلوون
سارحة بخيالي ودك الموبايل
باوعت لرقم غريب بلا اسم
عفته مجاوبت
دك مرة ثانية
مجاوبت
نوب وصلت رسالة
(اني امير افتحي خط)
عززة هذا منين اخذ رقمي وشيريد
بسلا يسويلي مشكلة ..دك الموبايل بقيت حايرة اجاوب لا
بعدين كلت خل اشوفة شيريد
_ الووو
_ الووغزل
بصوت تعبان
_ هلوو امير
_ صدك راح تنخطبين
_ مثل ماسمعت
_ السمعته تردين تزوجين واحد مزوج واكبر منج بهواي ؟
_ اي
_ ليش ولج ليش
_ شنو اليش هذا نصيب
_ نصيب لو تحبيه ؟
_ ماكو فرق
_ تحبيه ؟
_ اي
_ من سألتج بالحديقة يمنة جنتي تحبيه
_ لا
_ شنو بيه احسن مني بشنو عجبج عمره جبير لو احلى مني لو عنده شهادة  لو شنو فهميني راح تخبل
_ علكيفك امير لاصيح ولا تعصب ماكو اي شي بيه احسن منك
انت احسن شاب شفته بس انت تعرف ليش رفضتك
اتمنى ماتضوج مني ونظل اصدقاء مثل قبل
انتبه الدراستك صعبة وانساني ماافيدك
اكو احسن مني يتمننك اني اتعبك ماافيدك
_ اني مشتري هذا التعب واريدة مااريد ارتاح اني قابل بتعبج
_ كافي امير والله جاي تعذبني
_ اني اكدر امنعج من هذا الزواج و اكدر اخربه
بس مااريدج تنجبرين علية اريد قلبج بس ماحضيت بيه..
مااكلج اتمنالج السعادة،، مااكدر اتمنالج السعادة
اتمنى تتعذبين مثلي
وسده بوجهي
شوف حظي لازم ماافرح
لازم ينكسر كلبي وهلمرة كسره امير
كلش جرحني ..جرحني حزنه وعذابه 
'ان لم تكن قادرا على احتواء من تحب فلا تزرع في قلبه نبضا لا يعرف كيف يهدأ'
.......
ثاني يوم اجوي عمامي قبل الظهر
سلمت عليهم بس وجهم ثكيل علية
اني ضجت بس متوقعة زعلهم عليه
التهينة بالغدة اني وماما
بيت هيثم هم هوسة يمهم خطار احمد كال بابهم سيارات
..للعصر اجت المشية
عمام هيثم ثنين مو ابو رغد غيره واولاد عمه ثنين
واصدقائه
طبعاً المشية شكلية واغلب الكاعدين مراضين
فالحجي بين بابا وهيثم
همة متفقين على كلشي بس هذا روتيني كدام الموجودين
هيثم راد مؤخري غالي بابا مقبل بس هو اصر
تمت المشية  وجابوا سيد يعقد
صاحولي بالصالة السيد وبابا وهيثم
لبست كلة ابيض كلشي لابسه ابيض
هاي سوالف ماما وحتى خلت على وجهي قطعة شفافة بيضة غطت وجهي بيهة كالت هاي عاداتنة
ولبست عباتي ورحت
كعدت بصف بابا وهيثم مقابيلي والسيد بجانب هيثم
جنت مرتبكة كلش
حجة السيد آيات عن الزواج وبعدين صيغة العقد
وكلي ارد وراه
بابا لزم ايدي وابتسملي
جاوبت وحسيت بااحساس حلوو
بعد ماكو خوف صرت الة وهو الي
كملنة العقد وطلعوا مكدرت اشوفة 
.....شوية و
اجاني اتصال
بس شفت الرقم عرفته
_ الووو
_ اااااخ شكد مشتاق الصوتج
_ نهتتت ودمعة عيني
_ ليش تنهتين بعد خلص صرتي مرتي
_ مامصدكة
_ بليل اجيج وصدكي
_ ح تجي بليل ؟
_ اي طبعاً اشوف مرتي
_ ههههه بعدني مامتعودة على هاي الكلمة
_ اعودج لاتخافين
_ يلة اروح ماما صيحلي
_ روحي غزولة اكمل حجي باليل
_ ااي مع السلامة
_ مع السلامة
حضنت المبايل وبوسته شكد احبك
......
اجة اليل وتحضرت
لبست نفنوف الوردي وكعب
وفتحت شعري ونثرتة هو سرح واطرافة بيهن لفة خفيفة وهاي الفترة طولتة وصل الخصري
ماما كالت لا تسرحيه هيج احلى يلوكلج
تمكيجت شي خفيف
ماما جابتلي جادر مفتوح ابيض وبيه ورد زغار وردي
كالت حطي عليج وبعدين نزعيه لا كبل ترحين هيج لبسته
اجة بابا صاحلي من شافني ابتسم
وباسني بخدي
_ هاي شطالعة غزولتي ترة اني اغار عليج
_ بست خده انت الاصل بس انت وماما ساكنين بالكلب
_ اي بس احنا والكاعد بالاستقبال شنو ؟
_ هههه لاتخجلهة محمود عوفهة فرحانة
_ الله يسعدج بابا
تعالي اوصلج للاستقبال
رحت وية بابا قبل لا اوصل بابا رجع كال ابقوا شوية وحدكم بس اليوم لان اول مرة ثاني مرة الة احد وياكم
راح بابا
دخلت للاستقبال
جان كاعد هيثم ومدنك ويهز برجله متوتر
جان كلش طالع حلوو كاشخ وعطره مالي المكان
رفع راسه شافني ابتسم وكام
اني من شفتة مدري شجاني بقيت بس اضحك
نوب علة صوت ضحكي اريد اسكت مااكدر
هو على ضحكي يضحك
كوه سيطرت على نفسي اقتربت منه
غزل_ مجاي استوعب حقيقة الصار لو حلم
هيثم_ حقيقة واذا حلم خلينة نحلم لا تكعدينة
لزم اديه
_ اني دنكت بخجل
_ رفع وجهي بايده وصارت عيني بعينه
ضعت بعيونة وتهت وكال 
_ ليت الذي خلق العــــيون الســــــودا خــلق القلـــوب الخــــافقات حديدا،،، لولا نواعــســهـــــا ولولا ســـحـــــرها ما ودّ مـــالك قـــلبه لـــــو صـــــيدا،، عَـــــوذْ فــــــؤادك من نبال لحـاضها أو مـتْ كمـــا شاء الغرام شهيدا.ايلياابو ماضي
_ هسة انت عوذت فؤادك لو صرت شهيد
_ شهيد من سنتين اني شهيد
عيونج اوقعني قتيلا
مد ايده بجيبة وطلع علبة صغيرة فتحهة
_ هذي هدية بسيطة الملاكي
مدالية ذهب منقوشة ملاكي
تسمحيلي البسهة الج
_ هزيت راسي اي
ذبيت الجادر وبقى يباوعلي بهيام
باوعلي بشوق وحب واعجاب اقترب مني 
صار وراية حتى يلبسهة الي رفعت شعري حسيت برجفة ايده وهو يلامس بشرتي لبسهة وهمس مبروك علية انتي احلى ملاك
درت عليه 
رفع خصلات الشعر من خدي ومرر ابهامة على خدي
غمضت عيوني و سرت بجسمي القشعريرة
_ سيدتي يا ناعسة العينين اسمحي لي اقبلكِ بالخد والقد
دنكت واني مغمضة
رفع وجهي وباسني بين عيوني
وبخدي
شكد اني سعيد الحظ بيج 
اخذ ايدي وكعد وكعدني بصفه
_  تدرين حبنه عجيب
_ هههه اي ادري
_ هسة اذا اكول احبهة وتحبني من سنتين بس لا مسولف وياهة ولا حاجي وحتة مكتلهة احبج  منو تتوقعين يصدك
_ مو مهم منو يصدك المهم اني احبك وانت تحبني وهياتك
خطيبي
_ لا مو خطيب اني زوجج شرعاً
_ هههه اي اني هسة حرم هيثم
اكلك صدوك شأخبار رغد
_ الحمد لله ..ودنك
غزل من اني يمج لا تسألين على شي ومااريد نحجي
بس عني وعنج تمام ؟
_ تمام
_ تدرين غزل من قريت رسالتج اني كنت منجن
واجتي بوقت خلتني احسم امري
_ ليش منجن
_ لان عرفت متقدم سيف الخطبتج اني تخبلت يومين مااعرف قراري
لا اكدر اعترض ولا اكدر اسوي شي لان مااعرف بعدج تحبيني او لا ..وشفت ابوج موافق على سيف
تخبلت اكثر صح ارتاحيت من رفضتي بس ظليت خايف لاترحين من ايدي
الى ان قريت رسالتج وعرفت بعدج على نفس مشاعرج اتجاهي
بعد حسمت امري واجيت الابوج
_ صح شنو كلت البابا بالمرة الثانية؟ امره عجيب عرف بية احبك بس ردت فعله مو قوية
_ اني فهمته كلشي
_ شلون يعني
_ شعليج الج الصافي صرتي الي
_ شو كلة الغاز شكوو انت واهلي
_ هههه ماكو الغاز بس تفاصيل مالهة اهمية
اي كليلي جنتي ليش ضوجين من سيف ورفضتيه
_ هاا منو كلك اضوج
_انتي مرة كتيلي...ليش ضوجين؟
_ انسى مااريد اذكره
_ ليش شمسوي؟
_ لا والله ممسوي الولد مؤدب بس اني مااريد اذكر
_ براحتج
_ انت ليش مخابرتني بعد الرسالة
_ اني وعدت نفسي مااحجي وياج الة صيرين حلالي
اريد وياج كلشي بالحلال ومااريد اخون امانة ابوج
_ الحمد لله تم كلشي بالحلال
_ شنو التم بعدني هسة اني اشفت
_ ههههه هذهو بعد ششوف انت بيتك واني بيت اهلي ونظل واحد يحب الثاني
_ هههه لا هاهية حلتهة ست غزل ..اذا مااحطج بحضني مااحس بشي تم
_خجلت ودنكت
_ اااخ لليخجل نوب خدود لو حلقوم يصيرن
_ لاتخجلني فدوة
_ اني اروحلج فدوة ..يصير ابوس خدج
_ هههه لا ميصير مرة وحدة كافي
جرني من ايدي بلطف وقربني على صدره
دقات قلبه وقرب انفاسه سلبن كل قوة مني
مقاومت ولا تحركت بس غمضت عيوني
وباسني بخدي وبعيوني وهمس
انتي حلمي الصار حقيقة احبج غزل
دنك على ركبتي باسهة وشمني
ااااخ ياريحة الجنة اكيد ريحتج من الجنة
جنتي انتي
بعدني عنه وباوعلي
كلشي بيج احبه احب ضحكتج وزعلج وخوفج
وطنكورتج وحتى من تعصبين على احمد
فتحت عيني
_ شمدريك اعصب على احمد
_ كلشي عنج اعرفة
_ شلون
_ مو الة اعيش وياج اكدر اعرف كلشي من بعيد
_ شنو مخلي علية كامرة
_ ههههه حتى فطاريتج احبهة
_ من شوكت حبيتني
_ قبل لا انتي تحبيني
_ شنو من شوكت ؟
_ اني من شفتج اجيتي من المدرسة لابسة صدريتج الرصاصي وحجاب ابيض تمشين مدنكة وشايل كتب بايدج والجنطة لابستهة على كتفج من شفتج اتأملتج كلش عجبني منظرج اوحيتيلي بالامل
بيومة جنت ضايج بس من شفتج نسيت ضوجتي وكأنه هم ونزاح مني بس بلا نظرة غريزية هيج مجرد منظر شدني بلا مشاعر ولا شي
_ اي اذكر اول يوم او ثاني يوم من شيلتكم بيتكم الجديد
_ اي صحيح
بعدهة ثاني يوم حسيت برغبة اشوفج مرة ثانية بنفس الوقت اخذت باقر وطلعت باقر يلعب يمي من شفتج هم نفس الاحساس حسيت براحة وتفائل  من اقتربتي وباوعتيلي
ضجت من نفسي ودخلت
_ هههه قصدك سديت الباب بوجهي
_ ههههه اي مو قصدت بوجهج بس ضجت لان باوعتلج
ابد مو عادتي اباوع على بنية شكد يشتغلن وياي بنات وبالعمل بنات ابد ماباوعت الوحدة غير نظرة زميلة
وحتى اجنب احتك باي مرة
بس انتي ماادري حالة فريدة
_ يعني تفهمني حبيتني من ذاك اليوم
_ لا موحب بس ارتياح
_ اي كمل
_ من اجيت ادرسج اول يوم كان شكلج يختلف
وانتي قريبة علية مسافة بينة قليلة
حاولت ابد ماانتبهلج بس عيونج غلبني
اكو شي بعيونج غريب
_شنوو
_ مااعرف شنو اخذني اسير
غزل اني احس اعرفج من زمان
مستحيل من سنتين احس اعرفج من سنين
_ شوكت من جنت ابطن ماما
_ ههههه تقلدين علية لان اكبر منج
_ اي انت جدو اصيحلك جدو
_ من صيرين يمي تنسين عمري
_ شلون بلة انساه
_ تعالي يمي واني انسيج كلشي
_خلينة بموضوعنة شوكت حبيتني
_ ماادري
_ هااا
_ ههههه اي ماادري اني جنت انتبه لعيونج علية
ومن اشرح تسرحين وبس تباوعيلي
ميزت نظراتج الي بديت اصير حازم وياج وجدي
بس من اشوف عيونج ادوخ
الى ان الله يحفظة ابو شهاب البطل جابلي رسوماتج
_ ههههه الخبيث
_ لا بالعكس امووت عليه ..من شفت رسوماتج كلشي توضح كدامي
عرفت بيج تحبيني  وعرفت احبج
_ لو ادري بيك تحبني جان خطفتك
_ ههههه همزين لعد متعرفين
بعدنة نحجي وبابا وكف بابا الاستقبال وتنحنح
احنة فاتحين الباب بس تنحنح مراد يفاجئنة
جنة واحد لازم ايد الثاني اني ردت اوخر ايدي هو مقبل بقى لازمهة شكد عيب من بابا
بابا_ هاا يابة كلت خل اشوفكم خاف اخذكم الوكت وابو باقر عنده مشاغل
هيثم_ تسلم ابو احمد اي عندي شغل
اقترب مني وهمس بدة يغار محمود
_ اني ضحكت وكمت خليت الجادر علية
بابا_ المن لابستةبابا شنو لابستة مني مو جنتي ذابته
غزل_ هااا لا بابا مو وكع مني ومانتبهت
هيثم ضحك ودنك

ولحكايتي تتمة

اذا اعجبتك القصة اترك تعليق او تصويت