لاني احبُك شاركتها اياكَ (غزل )

البارت الرابع

البارت الرابع
رفع راسة شافني ورجع دخل البيتهم
هههههه هذا شبي كلما يشوفني يدخل للبيت بسلا شكلي يخرع
دخلت واني اضحك تلكتني نبع الحنان باستقبال حار
_ خيرج شو دخلتي شارة حلكج ضحكينة وياج
_ هلوو ماما ماكو شي حرام اضحك
_ لا مو حرام بس اكيد اكو سبب
_ ههههه هذا جيرانة كلما يشوفني يدخل ويطبك الباب
_ وشعليج بيه يلة فوتي
_ حاضر ماما
_ اليوم دكولين ماما اكيد عندج سوالف كملي غدة وصلاة وتعالي احجيلي
_ ههههه اموت واعرف هاي الحاسة السادسة ماتعطل
رحت بدلت وصليت واجيت اتغدة كملت وسولفت الامي على استاذ سيف
_ ليش مهتم بيج
_ يعني انتي تشوفينة مهتم
_ اي شي واضح الاستاذ مهتم بيج مودكولين بس وياج هيج
_ اي ماما بس وياي
_ احجيلي كلشي
_ ماما ثقي كلشي حجيتلج والله ماعندي شي وياه
_ ليش تحلفين انتي تربية ايدي واعرفج وحافظتج اذا ضمين شي واني اعرف انتي ماعندج شي
_ وهسة شصرف وياه
_ لاتصرفين شي هو ماكو شي حتى تصرفين ظلي طبيعية وابقي نفس تصرفج حدية ولاتنطين مجال
اذا بقة هيج وياج انقلج الغير مدرسة
_ لا ماما عفية شنو تنقليني
_ طبعاً انقلج اذا هيج ظل لعد شتردين تجيج حجاية منوراه
_ اووف ماما والله راح تشغلين بالي عفية لاهيج تحجين
_ ماما لازم هيج احجي وياج اخاف عليج وانتي فطيرة عبالج الناس كلهة طيبة
_ لا ماما اني مو فطيرة بس مامهتمة بس بوقت المواقف حتشوفين بنتج لبوة مثل امهة
_ ديلة يالبوة كومي نامي ساعة واكعدي اقري وحسني مستواج المتتدني لا اخلي محمود يحسنه الج
_ اااه اشو صار تهديد
_ طبعاً اهددج اريدج تنجحين وتفرحيني مو نوب مستواج متدني هو مظل شي بس هسنة والسادس ونخلص تبقى الكلية سهلة
_ الله كريم ..صدك هم تعرفتي على جيرانة
_ لا بعدني بس الصبح اجة ابنهم راد صوندة مي وابوج جان موجود هو اخذهة وراح الهم سلم على الرجال ورحب بيه وكلة شتحتاجون احنة موجودين
وعزمهم على العشة يمنة
_ صدوك حيتعشون يمنة
_ اي
_ اشو مامخبوصة
_ ابوج مقبل اسوي شي بس حلويات ومقبلات وحيجيب مشاوي مشكلة من السوك
_ يمة الحب يمة يخاف عليج
_ لعد ليش ميخاف علية ..يلة كومي بلا لغوة نامي ساعة واكعدي اقري
رحت افكر باحادث اليوم ومن وصلت الجيرانة ضحكت ونمت
كعدتني ماما بعد ساعة حتى ادرس سويت جاي وكعدت ادرس ساعتين حسيت نفسي تعبت بعد مااستوعب رحت الامي بالمطبخ لكيتهة مخبوصة بديت اساعدهة اني كلشي اعرف اسوي ماما بالعطل اتعلمني واساعدهة بس بالدوام ممنوع اسوي شي بس ادرس فساعدتهة بالمقبلات مسوية هواي اشكال وحلويات ماما مرتبة و تحب تهتم بهيج اشياء
صار المغرب رحت غيرت ملابسي لبست تراك سماكي بهاري وعدلت شعري وحطيت عطر ...اجت جيرانة استقبلناهة اني وماما من باب المطبخ مطلعنة بطرمة لان الرجال يدخلوه للاستقبال ..
الزلم بالاستقبال والمرة يمنة
ماما مخصصة غرفة للضيوف النساء مرتبتهة مع جلسة عربيه وبردة موالمة للجلسة فد شي حلو مرتب
والاستقبال تخم راقي كلة ذوق ماما
من دخلت المرة سلمنة عليهة هي باوعتلي وصفنت وسلمت وهي مستغربة
_ تفضلي عيني هنا اكعدي
_ شكراً لج ام احمد ..معرفتيني منو هاي الحلووة
_ عيني هذي بنتي البكر غزل
_ ماشاء الله شنو هلحسن وانتي زغيرة معبالي بنتج هيج جبيرة
_ لايمعودة منيلي كبرت وعجزت
_ لا والله بعدج ماشاء الله
_ تسلمين عمري اني معرفت ام منو اصيحلج
_ ام باقر
_ الله يحفظة الكم بس هذا عدكم
_ اي وبطريق ان شاء الله هم اكو
_ ماشاء الله حامل
_ اي بداية حملي
_ دكومين بسلامة
بعد مسلمنة كمنا اني وماما وقدمنة الضيافة
هي بقت بس تباوع لي بالاول ماعرفت افسر نظراتهة بعدين عرفت !
_ ماما غزل كومي حطي الحلويات بصينيه وديهة للاستقبال
_ حاضر ماما ( ماكو سوسو كدام الخطار اصير ثكيلة 😂)
جان تفز ام باقر هيج حتروحين للاستقبال؟!
باوعتلهة ماما باستغراب لان كلش فزت منتبهت على نفسهة
_ لا عمري ام باقر شلون هيج تروح غزولة حتى لاولاد عمهة وعماتهة متطلع وهمة ازغر منهة شلون هسة تروح للاستقبال ونوب بلا حجاب
_ اي اكيد ونعم من تربيتكم ماقصدت بس عبالي نست
_ لا عمري مانست
روحي غزولة مامة دكي الباب هسة يطلعلج بابا
اني طلعت واني اضحك طلعت الاخت تغار مني هههه
اخذت الصينية دكيت الباب دكتين محد طلع دكيت مرة ثالثة هم محد طلع تنرفزت دكيت الرابعة اعلى جان سمعت صوت رجولي بيه ونة بس لايكة كلش وية الصوت من يحجي عبالك بخشمه بس منطيته جاذبيه كلش حلو
_ ابو احمد برة هو والاولاد
اني خجلت لان دكيت حيل حطيت الصينية باب الاستقبال ورجعت جان يجي بابا بوجهي هاا بابا غزولة
_ ماكوشي بابا بس جبت الحلويات اخذهم
_ عاشت ايدج بابا
ودخل للاستقبال
رجعت كعدت يم ام باقر شوية وكمت اكمل دروسي بعد فترة طلعت لكيتهم رايحين كمت انظف وارتب البيت وية ماما لان خطية اليوم تعبت
_ ها ماما شلونهة ام باقر
_ وردة خوش مرة حجيهة حلو ومرتب ومبين عليهة حبابة
_ هي كالت خريجة معهد بس مامعتنية بشكلهة
_ شعليج بشكلهة اخلاقهة كافي هي يجوز متحب المظاهر
_ شعليهة المظاهر بالترتيب واحد يرتب النفسه
_ ماما لاتحكمين عالشكل خطأ
_ لا ماما مااحكم بس انطيت رأيي بمظهرهة الخارجي
_ حبيبتي ماما لا تتعلمين تحجين على احد وراه هي لو موجودة تحجين هيج اكيد لا يعني انتي هيج صرتي منافقة كدامهة شكل وراهة شكل ثاني
_ موقصدي بعد انتبه الكلامي
_ عفية بغزولتي يلة رجعي المواعين المكانهن وروحي نامي تأخر الوقت
_ حاضر سوسو
مرت الايام نفس الروتين برياضيات مستواي مجاي يتحسن مهما حاولت واستاذ سيف ما بطل نظراته الي بس بعد محاول يحاجيني وهذا الشي مريحني مااريدة يحاجيني اما جوارينة اهل البرمة اقصد ابو باقر قليل كلش اشوفة صدفة من يطلع الدوامة وكلعادة يباوع بس بطريقة لايمنة ولايسرة اما علاقة امي وام باقر صارت كلش قوية امي انسانة طيبة وحنونة شافت ام باقر متأذية لان منطقة غريبة وبعيدة عن اهلهة فاامي عوضتهة عن الاهل
وهماتين ماما جانت تضوج ماعدهة صديقة وشافت ام باقر انسانة محترمة وبسيطة توالمن فكثرت جيات ام باقر علينة وامي تروح بس قليل من ماموجود ابو باقر
وكثرت الصواني والمواعين ماعون رايح ماعون جاي
اما علاقتي بيهة فاني قليلة الكلام وياهة واكثر الاحيان ابقة بغرفتي اقرة
ومرة اجيت من المدرسة واني كلش ضايجة ومغثوثة
......!

ولحكايتي تتمة