النظرة الأولى

بارت 1 (الجزء الثاني)

#النظرة_الاولى2
#طيبة_الربيعي
**الجزء الثاني .. البارت الأول**

مساء الخير❤️
طولت عليكم هواية وصار لازم انشر
رغم انشغالي ووقتي الضيق محبيت اخليكم تنتظرون اكثر
واعرف حبيتوهة للقصة بس عندي غير التزامات
راح احاول انشر الأگدر عليه
وكل ما اكتب انشرلكم
بس رجاءاً هل فترة ماگدر غير بارت واحد باليوم
اتمنة تتفهمون
قرائة ممتعة😘😘😘
<<<<<<<<<<<<<<<
جزء ثاني (1)

بسمة... يمكن اني الوحيدة بخواتي ماهتم بسوالف الحب وكل همي اخلص هندسة معمارية واتعين عند عمو الچبير توفيق.. لكن هل شي تغير بزواج شاهي وذو الفقار.. بعرسهم چانت اول مرة اشوف بيهة اهل ذو الفقار كلهم..

لان عندهم عادة الرياجيل ميشوفون النسوان ولا النسوان يشوفون الرياجيل يعني نادراً وتصير صدفة.. عكس الي من طرف اهلي شباب كلنة نعرف بعض..'طيبة_الربيعي'

من اجوي ذو الفقار واهلة علمود يزفون اختي للقاعة صارت هوسة بالبيت ومصارتلي فرصة اشوف بقية اهلة يعني اني شايفة بس امة وبيبيتة وخالتة وبعض من اقاربة وعمتة همينة شفتهة مرة من اجونة بالخطوبة..

فصار عندي فضول اشوف البقية وخاصة ابوه گالو عليه هيبة وبنيتة ضخمة.. اني بعمري مشايفة اهل الجنوب ولا شايفة الشيوخ وهل اكبارية.. بس بعرسهم من طلعنة اني مامحجبة بس شفت عيونهم عبالك تنتقدنة او مستغربة بينة اني ومريم وبعض البنات من اقاربنة..

اعرف ماعدهم بنية سافرة ويمكن تعجبو لان خوات العروس مامحجبات لان حسب اتفاقهم الكل عندة خبر انو العروس محجبة علمود اهلة يخلصون من حچي الناس..'طيبة_الربيعي'

المهم وصلنة للقاعة وبعد ما افترقو الرياجيل عن النسوان او بالاحرى چانو ديصفون الجزء البي النساء من الرجال اني اخذت السويچ من بابا علمود اجيب هدايا مال شاهي وذو الفقار لان ماما اشترتلهم ثنينهم واني ومريم وجيلان اشتركنة بهدية وحدة وهي لوحة رسم جميلة لشاهي راسمتهة جومناهة وكبرناهة.. جداً جميلة..

المهم طلعت بابا صاف سيارتة تقريباً مقابيل القاعة وهواية سيارات همينة.. طلعت شفت ولد شاب لابس بنطرون مال قاط وقميص احمر ماروني مدخلة بالبنطرون وملابس السترة مال القاط.. چان واگف يدخن جگارة ويحچي بالتليفون..

صراحةً جذبني مظهرة بس مهتميت لان عادي مرات يصير اعجاب بالمظهر وهاي مو اول مرة اي بنت من تشوف رجل مرتب يعجبهة شكلة.. هو شافني عگد حاجبة واخذ نفس من الجگارة..

اجاوزتة ورحت لسيارة بابا فتحت الصندوگ وطلعت اول شي العلاگة الچبيرة الي بيهة هدايات ماما للعرسان وبعدها طلعت اللوحة مغلفيها بكارتونة مال هدية بلون وردي فاتح..