النظرة الأولى

بارت 14 (الجزء الثاني)

#النظرة_الاولى2
#طيبة_الربيعي
**الجزء الثاني .. البارت الرابع عشر💔**

هذا بارت لاخ بعد شتريدون🤕❣️
داحاول اختصر واوصل للاحداث الرئيسية
اصبرو علية الجاي اسوء
>>>>>>>>>>>>>>>
جزء ثاني (14)

سئمت العتاب... حتى لملمت شتات نفسي ورحلت بعيداً عن طبول حروبك
لكنك قطعت طريقي مجدداً وقاتلتني بكل ما اؤتيت من قوة.......💔

شوية ونزل معصب ووجهة ميتفسر.. اجاهلتة.. التهيت وية البنات نسوي عشة وميساء متمل من بساميرهة مالي حيلهة خليهة تعوي وحدهة..

امل مثل الذيل وراهة ولا مخلية لنفسهة كرامة لو شخصية.. الاعرفة من بيداء عساس مؤيد ابن عمهم الذو الفقار حچالي عنة حاچي بيهة ورايدهة.. وهية هم رايدتة بس اهلهة ميقبلون الة تكمل هاي السنة اخر سنة الهة بالمعهد..

الميعجبني بيهة مو عداوتهة ضدي.. بس تمشي ورة ميساء ماعدهة رأيهة الخاص.. وخايفة لا ذيچة توگعهة بمصيبة مارتاحلهة..

اريد اطلع ضايجة صارلي كوووومة مطالعة.. وهذا مزاعلتة منو يطلعني.. اخذت سماوي'طيبة_الربيعي'

شاهيناز: راح اخذهة يمي من تنعس انزلهة
بيداء: بس اضوجكم طرديهة لتنطيهة عين
ضحكت: عيني هاي بنت الشيخ هية التطردنة مو احنة
بيداء: اي والله انوب صايرة لسان كلشي وراحت تشتكي لابوهة محد يگدر يحاچيهة
بستهة: خليهة تدلل وتدلع بجال ابوهة
بيداء: ههههههه

اخذتهة وصعدت.. هو تأخر چان مؤيد يمنة..

لبست ثوب نوم وعدلت نفسي وتمددت عالسرير وسماوي يمي العب بشعرهة.. تباوع كارتون وشلون هادئة..

احس هل طفلة ادور الهدوء بهذا البيت.. والهوسة بكل مكان بس بغرفتي.. لهذا السبب يمكن ترتاح يمي..

رأسن تنام تگوم تغفي لحد ما بعد متگدر تقاوم وتنام..'طيبة_الربيعي'

شوية ودخل.. ضايجة منة ماريدة يجي يمي.. نزع اهدومة ولبس شورت

ذو الفقار: وينچ، گومي نزليهة اريد انام
شاهيناز: نايمة بمكاني هية ممأثرة عليك
ذو الفقار بجدية: نزليهة اگلچ، لاتضلين تناقشيني

باوعتلة معاجبني تصرفة.. گمت تسترت واخذتهة ونزلت.. هية نعسانة اخذتهة بيداء تنومهة.. رجعت صعدت لگيتة يحچي بالفون

ذو الفقار: انشاءالله اجي ابو الشباب ماعوفك بيومك هذا.. لا يابة تدلل.. مع السلامة في امان الله

وسدة.. اني نزعت ورحت تمددت وتغطيت.. انطيتة ظهري وحاولت انام

ذو الفقار: لاتنطيني ظهرچ