النظرة الأولى

بارت 4 (الجزء الثاني)

#النظرة_الاولى2
#طيبة_الربيعي
**الجزء الثاني .. البارت الرابع**
<<<<<<<<<<<<<<<
جزء ثاني (4)

رجلية صارن خيوط وخطواتي صارت سريعة رغم احس رجلية ثگلن

گمت اصيح: بيبييي، بيبيييي شبيييچ، بيبيييبي جاااوبينييي

اضرب بخدهة اريد اصحيهة متصحة.. مديت ايدي على خشمهة اتحسس اذا تتنفس او لا.. اكو نفس بس ضعيييف..

گمت اصيح الحگوووووونيييي يااا نااااس ياااا عاااالم.. گمت ابچي ماعرف شأسوي.. لا عندي فون ولا شي حتى اتصل على ذوالفقار..

بيبي عندهة اييي بيبي عندهة.. ركضت ادور موبيلهة ماااااكو اااختفة فص ملح وذااب.. رجعت على بيبي اصحيهة متصحة مغمي عليييهة..

مثل المخبلة ركضت برة اصيح'طيبة_الربيعي'

شاهيناز: الححگووووني خااااالة ام سحررر، سحرررر، خاااالة الحگيييييييني

دنيا ظهر وحااارة.. ركضت على جيرانة دگيت الباااب بقوة واصيح مثل المخبلة لحد ما طلعو الناس من كل بيت والتمو يريدون يفتهمون شصاير..

اصيح بيبي راح تموت ماادري شبيهة وصرت اخربط بالحچي من الهبطة.. دخلو وياية نسوان جيرانة ام سحر وبنتهة وصديقات بيبي يعرفوهة..

نسيت اني طالعة بدون حجاب وبملابس البيت بس لمن وحدة منهم خلت شال على راسي وغطتني استوعبت اني شلون طالعة وبيا مظهر..

بس بهاي اللحظة ماباالي غير ياخذون بيبي للمستشفى بأقرب وقت.. اخذوهة رياجيل من المنطقة وراحو وياهم نسوان..

بقيت بالبيت وام سحر وبنتهة بقو يمي يهدون بية.. ساعة ساعتين ماكو لا حس ولا خبر.. يتصلون بيهم ميردون..'طيبة_الربيعي'

للمغرب بقت يمي سحر خلوهة يمي متركوني وحدي.. المصيبة فون بيبي اختفة اريد اخابر ذو الفقار شلون انطي علم..

محافظة رقمة عالغيب چان اتصلت من اي واحد بيهم.. لهناك وسمعت صوت سيارة دخلت لگراجنة.. طلعت اركض وسحر وياية خطية..

شفت ذو الفقار عيونة دم ووجهة مگلوب گلب.. گلبي راد يتوقف بلحظتهة.. اكيد وصلة خبر.. بس شكلة مو طبيعي

بچيت: ذو الفقااار

باوعلي بنظرة مكسورة

شاهيناز: دريت شصار وية بيبي

محچة شي.. سد باب السيارة وعبرني وفات للبيت.. استغربت.. شنو الصاير.. باوعت لسحر تباوعلي