النظرة الأولى

بارت 17 (الجزء الثاني)

#النظرة_الاولى2
#طيبة_الربيعي
**الجزء الثاني .. البارت السابع عشر**

مساء الخير❣️
>>>>>>>>>>>>>>
جزء ثاني (17)

فتت وسديت الباب وراية.. محاسة لان مغمضة وسماعات مبين فاصلة عن العالم..

شغلت الضوة.. فتحت عيونهة فزت.. وخرت السماعات وگامت گعدت تمسح بدموعهة

مريم: ها شاهي

تقربت گعدت بصفهة وهية تشهگ بس بطلت تبچي..'طيبة_الربيعي'

مديت ايدي امسح دموعهة دنگت ورجعت تبچي.. اشوف اختي بهيچ لحظة وماگدر اسويلهة شي علمود اسعدهة..

شفت نفسي بيهة من چنت ابچي على ذو الفقار.. بس الفرق حيدر صار لغيرهة واني ذو الفقار صار من نصيبي

شاهيناز: كافي موتي روحچ، اسمعيني بعد ماعيد كلامي، صدگي يرجعلچ ندمان وعاض ايديه ندم، بس انتي مراح تنطي مجال تعززي عليه، مريم من تنقهرين وتعزلين نفسچ مراح تضرين غيرهة ترة حيدر ميضرة شي بالعكس من يسمع بيچ هيچ راح يرتاح يگول كسرتهة مثل ما هية كسرتني، خليچ قوية واجاوزي هل محنة بالصبر والتفائل

مريم: الكلام سهل شاهيناز بس الفعل امر من الصعب، حيدر مو بس كسرني والله خلاني افقد اللذة بهاي الحياة
شاهيناز: حقچ انتي مالومچ، كلنة بالدنيا لابد ننكسر ونتألم ونشبع بچي لحد ما الله يگول بس، كلشي الة نهاية وحزنچ هذا لابد الة نهاية، بس هذا الشي يعتمد عليچ انتي التحطيهة لا حيدر ولا احد غيرة، سمعي كلامي مريم وشوفي شلون نخلي يسحل نفسة مينول اظفر منچ
مريم: راح بعد شاهي شتحچين انتي'طيبة_الربيعي'
شاهيناز: واذا راح شنو يعني تبقة عليه ماكو غيرة؟ انتي بس اتركيهة على رب العالمين هية تنفك من وحدهة صدگي، احس بيچ لان اني هم مريت بهيچ فترة ذو الفقار ابتعد عني ومن اكتشفت هو خاطب حسيت هذا هو بعد حعيش مكسورة طول حياتي، بس ربچ سبحانه غير كلشي من حال الى حال بيوم وليلة صرنة البعض، شوفي شلون يقل للشيء كن فيكون

صدگي هسه يتندم، هذا حيدر ميحبچ يوم ويومين، من چانت بيدچ اللعابة ولحد هسه متأكدة مية بالمية، بس هو مجروح ومن الغضب مديعرف شيسوي حتة يضوگچ من نفس الكاس
مريم: بس اني منخطبت لو خنتة لو رحت اتزوجت، شكيت لان شفت بعيني وصحيح استعجلت من اجاوزت عليه وسويتهة مصيبة، بس مو بيدي اني انفعلت بوقتهة متحكمت بنفسي تصرفت بطيش وأذيتكم الكم مو بس أذيت نفسي
شاهيناز: هسه هذا ماضي وراح بوقتهة بعد منگدر نرجع الفات بس نگدر نصلح الحالي علمود المستقبل، احنة خواتچ امي ابوية كلنة واگفين وياچ حتى عمو رؤوف حتة امة لحيدر الي تصير خالة البنية، محد قابل على تصرفة بس ميحچون لان هو اختار بعد، انتظري شوفي شلون يرجع يبوس رجلچ وگولي شاهيناز گالت
مريم: ماريدة بعد، ليرجع ولا شي يكفي توسلت بي هواية موگفن بعيونة دمعاتي لو توسلاتي، چنت حتى رسائل صوت ادزلة، رسائل ابچي بيهن وميتة، يسمع ويقرة ويشوف بس ميرد