from the moment that we met I knew it would be something I won't forget
ယခုအပတ်တွင်း သူတို့ တစ်ဖွဲ့လုံး အလုပ်များနေကြသည်။ အကြောင်းမှာ ကုမ္ပဏီမှ စတင်ဖြန့်ဖြူးမည့် အစီအစဉ်တွဲ အသစ်များကို ပြိုင်ပွဲအဖြစ် ပြုလုပ်၍ အဖွဲ့အလိုက် ယှဉ်ပြိုင်ရမည်ဖြစ်သောကြောင့်ပင်။ ကုမ္ပဏီတွင်း ဆောင်ရွက်နေသည့် ပရော့ဂျက်အသစ်များစွာရှိသည့်အနက် သူတို့အဖွဲ့မှာ လူလုပ်ဥယျာဥ် မင်္ဂလာပွဲပုံစံအား လုပ်ဆောင်ကြမည်ဖြစ်ပြီး အခြားအဖွဲ့ အသီးသီးမှာလည်း သက်ဆိုင်ရာ အစီအစဉ်အား တာဝန်ယူဆောင်ရွက်ကြမည်ဖြစ်သည်။
၎င်းတွင် ထပ်မံဖြည့်သွင်းလိုက်သော စည်းမျဉ်းအရ ပရော့ဂျက်အား မိမိတို့ တာဝန်ယူထားသောအဖွဲ့မှသာ အလုံးစုံ စီစဉ်ရမည်။ ထို့ကြောင့် ပြင်ဆင်ရမည့်ကိစ္စများမှာ များပြားလွန်း၍ အနားပင် မရနိုင်ပါပေ။
"အစ်ကိုဂျင် နမူနာ ဝတ်စုံတွေ အဆင်သင့်ဖြစ်ပြီလား"
ဂျီမင်သည် ဖိုင်တွဲများအား စီစစ်နေလျက် အလောတကြီးမေးလိုက်သည်။ ဆော့ဂျင်မှာ စားပွဲပေါ်မှ စနစ်တကျ အပိုင်းခွဲထားသည့် အံဆွဲထဲမှ ဆွဲပြီးသား ဒီဇိုင်းများအား ဂျီမင်ဆီသို့ ကမ်းပေးလိုက်၏။
"နှစ်ထည်တော့ ကျန်သေးတယ် နက်ဖြန် အပြီးသတ်လိုက်မယ် ပြီးတော့ ဂျီမင်ရေ ဒီဖိုင်ထဲက ဒီဇိုင်းတွေကို စာရင်းသွင်းလိုက်တော့၊ အဖွဲ့မှူးနဲ့ ငါ နောက်ဆုံး ဖယ်ထားတဲ့ဒီဇိုင်းတွေပဲ ဘယ်လိုနေလဲ အဆင်ပြေရဲ့လား"
"ဒီဇိုင်းက သစ်ပြီး လန်းဆန်းတယ် စိမ်းလွင်တဲ့ဥယျာဉ်နဲ့ လုံးဝ ကွက်တိ လိုက်ဖက်လွန်းတယ်"
ဂျီမင်၏ ချီးကျူးစကားကြောင့် ဆော့ဂျင်မှာ ပျော်ရွှင်သွားတော့၏။ ထို့နောက် တက်ကြွစွာ နမူနာဝတ်စုံများအား ပြင်ဆင်နေတော့သည်။
နမ်ဂျွန်းသည် အဖွဲ့ပေါင်းစုံ အစည်းအဝေးပြီးသွားပြီးနောက် ရှုပ်နေသောဆံပင်များကို ဆွဲဖွလျက် အခန်းထဲသို့ဝင်လာသည်။
"ဟိုဆော့ရေ ပရိဘောဂဆိုင်ကိုသွားပြီး ခန်းမအတွက်လိုအပ်တဲ့ပရိဘောဂဒီဇိုင်းကို သွားအပ်ပေးလို့ရမလား"
