let's drive around town holding hands
ဖွဲဖွဲကျနေတဲ့ မိုးနောက်က ဝမ်းနည်းခြင်း
အမှောင်ယံထဲ တိုးထွက်လာတဲ့
ရင်ခုန်သံ စီးချက်များနောက်
ပြန်လမ်းမဲ့ အနက်ရောင် အသက်ရှူသံတွေကြား
ရွှဲရွှဲစိုနေတဲ့ ငိုသံတွေ ကြားလိုက်ရတယ်
အဲ့ဒီနောက်မှာ
အနက်ရောင် ထီးတစ်ချောင်းက ချိုမြိန်တဲ့ တေးသွားတစ်ခုလို
မိုးစက်တွေထဲ ကခုန်ရင်း
ညတစ်ညရဲ့ ရင်ခုန်သံတို့ အစမပြုခင်
ကျရှုံးခြင်းကို ပြက်ရယ် ပြုခဲ့တယ် ။
-
"ဒီနေ့ အကောင်းဆုံး သတင်းတစ်ခုရှိတယ် မသိချင်ကြဘူးလား"
အလျင်လိုပုံရသည့် သူဌေး၏ အမူအရာနှင့် လေသံကြောင့် ဂျောင်းဂု ဖတ်နေသည့်စာအုပ်ကို ပိတ်လိုက်ပြီး ဆက်ပြောလာမည့် သူဌေးစကားကို အသေအချာ နားစွင့်နေမိ၏ ။
"ငါတို့ဆိုင်ကို Wedding Studio ကြီးကြီး တစ်ခုက ကမ်းလှမ်းလာတယ် သူ့တို့ခန်းမမှာ အလှဆင်ဖို့ ပန်းတွေကို ငါတို့ဆီက ယူသုံးမယ်၊ ပြီးတော့ ဒီဇိုင်နာကအစ ငါတို့ဆီကပဲ၊ ဂျွန်ဂျောင်းဂုတို့ကတော့ စံပဲကွာ မင်းဂုဏ်သတင်းက Company ကြီးတွေ အထိပါ ပျံ့လို့ပါလား"
သူဌေးပြောသည့်စကားကို ဂျောင်းဂု မယုံကြည်နိုင်ပါ ။သာမန်ပန်းဆိုင်တစ်ခုကို နာမည် ကြီးသည့် ကုမ္ပဏီတစ်ခုကနေ ကမ်းလှမ်းတာ ၊ ဒါ့အပြင် ဒီဇိုင်နာကိုလည်း သူတို့ဆီက ခေါ်တာ ။ ဒါက အဓိပ္ပါယ်မရှိတဲ့ ကိစ္စရပ်တစ်ခုပဲ ။ သူ ပန်းအလှဆင်တဲ့ ပုံစံက သူများတွေထက် မသာတဲ့အပြင် အရည်အချင်းကလည်း ပုံမှန်ပဲ ။
"သူဌေး သေချာရဲ့လား"
"တကယ်ပါဆိုကွ မယုံရင် အဲ့ဒီကို ဖုန်းဆက်စုံစမ်းကြည့်"
"ဘယ်ကုမ္ပဏီက ကမ်းလှမ်းတာလဲ"
"ငါပြောလိုက်ရင် မင်း တော်တော် အံ့သြသွားလိမ့်မယ် Louloúdia Wedding Studio က ကမ်းလှမ်းတာ ငါတောင် အခုထိ မယုံကြည်နိုင်သေးဘူး"
"Louloúdia..."
ထိုနာမည်က သူ့အတွေးထဲ ဝင်ရောက်လာသည်နှင့် သူဌေးပြောသလိုပင် ဂျောင်းဂု အတော် အံ့သြသွားမိသည် ။
