and now your song is on repeat and I'm dancin' on to your heartbeat
ဂျောင်းဂုတို့အဖွဲ့ တင်သွင်းထားသော လူလုပ်ဥယျာဉ် ပရော့ဂျက်မှ ပထမဆုံး မင်္ဂလာပွဲကို ယနေ့ညနေတွင် ကျင်းပမည်ဖြစ်သည်။ ထို့ကြောင့် တစ်ဖွဲ့လုံးမှာ ပြင်ဆင်စရာ ကိစ္စများကို အပြီးသတ် လုပ်ဆောင်နေကြ၏။ ၎င်းမှာ ပထမဆုံး တာဝန်ယူပြင်ဆင်ပေးရမည့် မင်္ဂလာပွဲဖြစ်သည့်အတွက် အဖွဲ့သားအားလုံးလည်း မင်္ဂလာပွဲကို တက်ရောက်ကြမည်ဖြစ်သည်။ ပုံမှန်အားဖြင့် ကုမ္ပဏီ ဥက္ကဋ္ဌသည် တက်ရောက်လေ့မရှိသော်လည်း ယနေ့ည မင်္ဂလာပွဲကို ထယ်ဟျောင်း တက်ရောက်လိမ့်မည်ဟု ဂျောင်းဂု ထင်မိသည်။
"အဖွဲ့မှူး၊ ဒုက္ခပါပဲ"
"ဘာဖြစ်လာတာလဲ"
ဟိုဆော့သည် ခါတိုင်းလိုပင် အလောတကြီး ပြေးလွှား၍ ရောက်ချလာသည်။ နမ်ဂျွန်းမှာ မင်္ဂလာခန်းမအား စစ်ဆေးနေတုန်းဖြစ်ကာ ဟိုဆော့ ရောက်လာသည့်အခါ၌ ချက်ချင်း မကြည့်လိုက်နိုင်ပေ။
"အခု ဒီည…ပွဲကို…ငှါးထားတဲ့ စန္ဒရားတီးသူနဲ့ အဆိုတော်က လမ်းမှာ ကားမတော်တဆဖြစ်လို့ မလာနိုင်တော့ဘူးတဲ့"
နမ်ဂျွန်း၏ မျက်မှန်အောက်မှ မျက်ဝန်းများမှာ မှေးကျဉ်းသွားပြီး ဟိုဆော့ရှိရာသို့ လှည့်ကြည့်လာသည်။
"ပွဲစဖို့ အချိန်ကပ်နေပြီကို… အခုလောလောဆယ် အမြန် ငှားလို့ရမဲ့ စန္ဒယားဆရာကို ရှာကြည့်လိုက်"
"ကျွန်တော် တစ်ယောက်သိတယ်"
ဂျောင်းဂုသည် နမ်ဂျွန်းတို့ စကားဝိုင်းကို ကြားသွားသောကြောင့် ဝင်ပြောလိုက်သည်။ အချိန်လည်း နီးကပ်နေပြီဖြစ်သည့်အတွက် နမ်ဂျွန်းမှာ ထိုကိစ္စအား ဂျောင်းဂုကို တာဝန်ပေးလိုက်တော့၏။
"ဒါဆို ဂျောင်းဂု အဲ့ဒီလူကိုအမြန်ဆက်သွယ်ကြည့် ရပါ့မလားလို့"
"ဟုတ်ကဲ့ပါ အဖွဲ့မှူး"
ဂျောင်းဂုသည် နမ်ဂျွန်းနှင့် စကားပြောပြီးပြီးချင်း ယွန်းဂီကို ဖုန်းဆက်သွယ်လိုက်သည်။ အမှန်ဆိုလျှင် သူ့အိမ်အထိ သွားရောက်တောင်းဆိုရမည်ဖြစ်သော်ငြား ယခုတွင် အချိန်မမီတော့သည့်အတွက် ဖုန်းနှင့်သာ ဆက်သွယ်၍ရလိမ့်မည်။
