﮼صفقة ﮼عشك

12

بقلمي(هدى الموسوي ) الاميره الموسويه👑

ما احلل لاي شخص ياخذ كتاباتي وينشرهم (ذمه)

سدن .. كلتلكم من البدايه هذا مو نورالدين الي اعرفه ... بس ممتوقعه نهائياً يحجي هشكل او حتى عنده وجه ثاني مظلم مثل الي دااشوفه هسه!!
سكتت من الصدمه منطقت بس بقيت اباوع بوجهه وخايفه من كلامه ..

نورالدين .. الي يعرف شخصيتي من البدايه ومركز بيها فأني وضحت ببدايه كلامي عن نفسي انه اني جداً هادئ وما اعصب بسرعه ماكو شي يكدر ينرفزني بسهوله او يزعجني لدرجه افقد اعصابي!
بس باليوم الي كالتلي بي ما اريدك!!!!
لاول مره بحياتي احس شي بداخلي ديحترك .. شي يريد ينفجر!
مع ذلك مبينتلها اي شي من غضبي .. عرضت عليها اوصلها ومقبلت!
تركتها ومشيت وبنفس اللحظه الي تركتها بيها قررت انو خلص انساها وانسى وجودها وهذا شي متعود عليه اني الي يطلع خارج حياتي ينتهي.
رحت بوجهي للبيت كنت اسوق بسرعه كلش عاليه!
بحيث اكثر من مره ردت اصطتدم بالناس .. مو بأرادتي الغضب سيطر عليه غضب وشي ثاني مااعرفه شنووو شي ينخر بداخلي اريد اطفي اريد انهي مااعرف بأي طريقه!!
وصلت مسافه عن بيتنا والغضب الي بداخلي بدا يزيد .. وقررت انو انهي بطريقتي!!!
بلحظه وحده وبلا اي تفكير قررت انو اضرب السياره بالباب بكل سرعتها .. !
مااعرف من وين اجتي هذي الفكره واشلون خطرت ع بالي!!
الشي الوحيد الي اتأكدت منه بعدين انو هذا كان شيطان!
واكبر شيطان الك هو نفسك.
رغم انو قرارها مخسرني شي ولا اذاني اذيه جسديه ولا اتضررت منه مادياً بس احسها نهت حياتي وقتها.. وهذا الشعور بالعجز دمرني.
بكل سرعتها مشيت بيها لباب البييييييت كلت يأما انهي حياتي يأما انهي صلاحية السياره!
لان لازم انفض الغضب الي دياكل بروحي!
ويا ريتني كنت متت ولا صار الي صار .....!
فجأه مثل السراب انفتح باب البيت وطلع شخص صاعد دراجه !!
الاوان كان فات للتراجع عن قراري لانو السياره مستحيل توكف بسهوله .. وحتى اذا حاولت اوكفها مستحيل ما اصتدم بي ..!
ثواني سرحت بيها وبعدها رجعت للواقع .. واذا بالشخص الي ع الدراجه طار وانظرب بالكاع!!!!
نزلت بكل سرعتي بس رجليه ما احس بيهم من مشيت .. حتى مااعرف اشلون نزلت من السياره ورحت اشوف الشخص الي انضرب!!
كل ظني وكل تفكيري انو هذا واحد من اصدقاء يمان .. لانو اخويه ادري بي ماعنده دراجه ومنبه عليه مستحيل يصعدها نهائياً.
فكنت اتوقع هذا صديقه الي ضربته!
وصلت يمه ماكو جثه وهامده ع الكاع بس الحمدلله كان لابس خوذه يعني اتقلل من احتماليه ضربته براسه وموته!
بحركه سريعه شلت الخوذه من راسه ...... وهنا گلبي حسيته انشل.

يمان!!!!!!!!!!!!!!!!!!!
ما اكدر احجي ولا اكدر اوصف شعوري وقتها لان بكل بساطه مينوصف.
بس كل الي اكدر اكوله انو شفت ابويه وامي واهلي ودنيتي كلهم سابحين بدمهم بين اديه.
شلته كبل للسياره ماادري وين اروح الكاع ضاقت عليه عمري كله الي راح ما اتذكر فد يوم خفت بي هالكد او انهزيت بي لهدرجه!
اخذت يمان للمستشفى دخلت الطوارئ ارعد بكل ما للكلمه من معنى صوتي كان اقوى من الرعد بيوم عاصف.
اخذو مني يمان وبقيت واكف بمكاني!!
متحركت ولا خطيت خطوه من باب العمليات حتى بعد ما طلع الدكتور بعد كم ساعه هم متحركت من مكاني الى ان طلع يمان من غرفة العمليات المغرب!
اكو شي واحد محيرني!!
ليش لما شخص اتعزه يصير بي شي متتذكر منه بس الاشياء الحلوه!
متتذكر اذيته .. متتذكر مشاكله .. متتذكر عركاته وياك وخلافاتك ويا!!
كل الي يجي ابالي ضحكة يمان شقى .. مقالبه .. وكفاته .. مساعدته .. كلامه الحلو!!
زين ليش هالعذاب!!
هذا كان يدور بعقلي اما بلساني كنت اردد كلمه وحده ... قتلته .. قتلته!