صديقات على مر الزمن

بارت6

#حنين_حاتم

#لااحلل_الأقتباس_من_دون_ذكر_اسمي

#صديقات_على_مر_الزمن
صديقات رغم المحن 💔

تقربت علة لبيت وهوة جان واكف وشايل شي بيدة حس علة خطواتي وندار علية
للحضات حسيت روحي فقدت توازني من كد الفرحة صافنة بوجهة ماحجيت شي بس متانيتة يوخر حتة اطب رغم مابدي يوخر ولااريد هاي الحضة تنتهي اصلا
رفع حاجبة بحركة المتفاجئ وبتسم ابتسامة خفيفة
شلونج سمر

من الفرح اريد واحد يكرصني يضربني حتة اصدك اني بعلم
زينة زينة
شلون صارت ايدج
صفنت بوجهة ياايد هاي بعدين تذكرت قبل سبع شهور ايدي نكسرت وطابت ولسالفة اصلا نسيتهة

حييييل
طابت وصرت زينة

لحمد لله علة سلامتج ديري بالج علة روحج

هاج هاي نطيهة لواحد من الولد عبالي الكاهم

مد ايدة بيهة سبانة

اخذتهة منة وكتلة شكرا

لعفو سمورة سلمي علوالدة عبالي اشوفهة هية ولولد مشتاقلهم حبيت اسلم عليهم اني باجر رايح

شنو !!!! تروح ليش انتة شوكت اجيت ؟؟
الدمعة غرغرت بعيني وكوة لازمتهة بس الرجفة لبصوتي خذلتني وفضحت خوفي وكرهي الهلكمة حتة الحجي طلع كوة مني

لبارحة اجيت وباجر رايح تدرين شغلي هناك وملتزم بي مااكدر اتأخر
رغم مشتاق لكربلاء ولريحتهة ولناسهة الحلوين بس يلله يجي يوم وبعد ابطل اشتاقلهم لمن يصيرون ييي

بعدة يحجي نفتحت لباب وصارت امي بوجهنة هنا صحيت علة روحي اني شلون واكفة ويا بلشارع ولنوب بباب بيتنة عزززة
همزين عدنة حديقة خارجية مسيجة وزرع عالي مغطي لباب ولواجهية مال لبيت كلهة

اني صافنة علة وجه امي واترقب ردة فعلهة تقرب يمهة سلم عليهة
هية هم بادلتة سلام حار وسألت عن اهلة اني بهلحضة تملصت من وراهة وفتت جوة طبيت للغرفة وسديت لباب وخايفة من امي حيل لان متأكدة راح تنفتح علية ابواب جهنم وبنفس لوقت ضايجة لان كلي راح يروح واني احسب يوم يوم لجيتة
رجعت بية الحضة لليوم الي سافر بي اول مرة بيومهة ماغمضت عيني ولدموع غسلت وجهي وغسلت كلشي حلو بداخلي من يومهة قسيت علة نفسي قبل لكل صرت اخفي كلشي بداخلي وبلذات الوجع الى ان صار كلبي مستقر لكلشي يوجع
احيانا لشوق يخلي لأنسان مقيد ميعرف شلون يتصرف موجوع وميدري شنو الدوة
الى ان يبدي يتصرف شغلات غريبة بداخلة ميلكة اي مبرر الهة
انتقام لنفسة انتقام للشوك الي ميصيرلة حل خصوصا اذا جان لأنسان الي نشتاقلة موداري عنة ولاشايفنة بعين لأعتبار
....................................................
وبدة اول يوم عطلة بيتنة كئيب خواني بلشغل وبس اني وامي بلبيت
عدة اسبوع وبدة الملل امي دواهة خلص ولازم تراجع دكتور
من تجي مراجعة الدكتور جنت اعيش اسوء ايام حياتي مجرد ان يخلص دواهة تتحول انسان ثاني اطلع بلحديقة تكلي ها ست سمر منتضرة صاحبج
يمر ماطور من يم لبيت تكلي ها هاذة جاي عليج
وساعة تكل لخواني عدهة تلفون وتخابر بي بلة متدرون وساعة تكللهم طببت صاحبهة واحنة نايمين دمرتني دماااار
وجيب الي يقنعهة تروح للدكتور سبوعين احنة عجزنة جربنة كل لوسائل مترضة تقتنع ومنكدر نجبرهة لان تصير شرسة تضرب
ولمريض لنفسي يصير قوي بسبب لأدوية الي ياخذهة
وامي بنيتهة قوية ومن نوع جثلة بضخامة بحيث اذا تدفع واحد تكسرة
وضعهة من سيء الى اسوء اليل بطولة متنامة نهائيا انام وافز وهية فاتحة عيونهة علة حيلهن عايشة وياهة برعب يتراوالي تضربني تخنكني واني نايمة تحرك لبيت علينة
لان تنسة روحهة وتنسة كلشي
الى ان رحنة للدكتور بدون مناخذهة كتبلهة مهدئات ومنوم بس اكد علينة انو نجيبهة بأي طريقة لان ذني موعلاجهة مجرد ادوية وقتية تهدئهة لازم يشخصهة يلله يكتبلهة لعلاج
بس ياطريقة الي تنجح وياهة
جبنة لدوة مترضة تشربة صرنة نحطة الهة بلعصير مرات تشربة ومرات تشك بينة وتعاند
عدن شهرين من لعطلة اني علة هلوضع لاطبة ولاطلعة وامي مدمرتني دمااااار
صديقاتي كل تواصل ماعندي وياهم امي تلفونهة اصلا ركعتة بلحايط وفلشتة
الى ان خلصت لعطلة اني روحي خلصانة