صديقات على مر الزمن

بارت41

#حنين_حاتم

#صديقات_على_مر_الزمن

#صديقات_رغم_المحن💔...بارت41

مسائكم سكر 😊

سمر: واجة يوم ولادتي
وولدت اسلام جان سمين حييل وزنة 4 كيلوات
بيومهة كميل بات بلشارع بباب المستشفى للصبح
ولصبحية اجني لبنات لارا واسراء شكد فرحت من شفتهم
جانت وياي خالتي وبس ولدت عافتني وراحت لان جهالهة عدهم دوام مدارس
بقو لبنات يمي من ال7 لصبح لحد ل10
وكميل كلسا يدك علية يكلي طلعيلي اسلام خل اشوفة
اخذتة لارا الة حاضنة وضال يبجي وميقبل ينطي الهة
جابتة الي وتضحك على كميل وسوالفة
لل10 اجت لدكتورة شافتني كالت ماعندج شي طلعي
طلعوني لبنات ورجعو وياي للبيت
كميل ذبح طلي ووزعة بقو يمي للعصر سولي شوربة واني كضيتهة نوم
يكعدوني وارجع انام
للعصر كعدت لكيتهن رايحات واسلام كضاهة بس نوم تالي طلع بي ابو صفار
وورة فترة طاب وصار احسن
ومشة لايام حلوة ماتخلو من لمشاكل الي تصير بين اي ثنين
بس كميل جان كلبة جبير وشما سوي بي  ميزعل ابد
بليل نتعارك ونتزاعل وانام بلكاع لصبح اكلة روحي بحضنة
واحس علي من يبوسني ويغطيني ويروح للشغل
جان نعمة تستحق ان احمد الله عليهة بدل المرة الف
حارم نفسة من كلشي في سبيل راحتنة
تصدف مرات ماعندة ملابس يروح علساس يشتري لروحة يرجع محمل النة اني واسلام
ولو مشتري لروحة بجامة لو يكلي ستخسرتهن لروحي انتو اولة بيهن
وين ميروح ياخذنة ويا حتة من يروح يحط بانزين للسيارة واني اطبخ او اشتغل يجر عباتي يلبسنياهة ويكلي تعالو وياي علواهس
عشت ويا احلة ايام
ولو اطلب لشمس يجيبهة ويحطهة بيدي
ماتذكر بيوم طلبت منة شي وكلي مااكدر اسوي حتة لو ميكدر يجي علة نفسة وينفذة الي
وشوكت مااريد اطلع وية صديقاتي ميرفض ابد
لو شكد مااحجي عنة مااوصف حقة
ولا انطي ذرة من الي يقدمة الي ولأبني

ورة فترة لارا قدمت ماجستير لان تعين ماكو لاهية ولارامي تعينو
وميكدرون يتزوجون اذا ميتعينون هاذة شرط بيبتهة
كلتلهم لازم واحد منكم يتعين يلله اقبل تحددون عرسكم
قدمت وقترحت علية ان اقدم وياهة
اسلام جان زغير وشاغل كل وقتي بس كميل شجعني وكلي اني اساعدج بي

وفعلا قدمنة ونجحنة بلأمتحانات ثنينة وسوينة رسالة هية قدمت رسالتهة قبلي جان موضوعهة عن المصارف ولبنوك الأهلية
وقدمتهة واخذت جيد جدا
اما اني فجان موضوع رسالتي عن البنى التحتية
وماقدمتهة هواي تعبت بيهة بس تخوفت وحسيتهة ناقصة وبعد تحتاج ابحث واضيفلهة
وورة فترة طويلة من القلق والخوف ناقشت رسالتي واخذت امتياز
بوسط فرحة وبجي مني ومن كميل

راحت ايام واجت ايام ومشة بينة العمر

ذكريات : جانت اخر مرة شفت بيهة ليث
من لاكيتة بلمستشفى ماانكر بيومهة بجيت هواي وتذكرت كلشي جمعنة
وتمنيت ترجع ذيج لايام
بس شنو فايدة التمني هوة الي تخلة عني من اول عثرة
وقدرنة انو نفترق
ورة فترة طويلة من الحزن والدموع وعيت علة نفسي
وكلت اني شجاي اسوي بروحي وعلة شنو هيج موقفة حياتي
الدموع مترجع لاميت ولا عدل واني ام ولازم التفت لابني المريض
وعدة ذيج الفترة من حياتي ووراهة
حبلت برتاج علي جان محذرني من لحبالة
بس مرة نسيت دوة المانع وصار عندي حمل
وكتهة كلب الدنية وكلي نزلي كرار بعدة زغير واحنة كاعدين وية اهلي