قطار العمر

البارت الثاني

قطار العمر
للكاتب غزوان علي
البارت الثاني

طبكت سياره بصفي من الخوف مااعرف جمدت وكفت نزل شاب من السياره
شتريد
اريدج
ودفعته وخر عني شلون تلزمني
انتي بنت منو
ميناس .. مالك علاقه ومشيت وجان يلحكني
تعاي لج شون تعوفيني وتمشين ورجع لزمني من الايدي مااشوف غير انمار يجي يركض على الولد
انمار .. عوفها لك مالك علاقه بيها
الولد . وانت شنوو وخر حباب منا لا أذيك
انمار .. هاي اختي وسحبتها من ايدها
ميناس.. ومااشوف غير انمار يضرب الولد بكل قوته والتم الشارع واني كمت ادك والطم اني اخاف من المشاكل وخاصه بين الولد

بالبدايه جان انمار مسيطر على الوضع بس من سحب هذا الولد سلاح عليه خاف وخاصه الولد وجهه كله دم اذاه انمار من الضرب ذاك جبان مكدر يدافع عن نفسه ومن شاف انمار مسيطر سحب السلاح من ظهره وكمت اعيط وابجي بهستريا لك عوف اخويه اجه فارس وبارق يركضون على العياط والمنطقه انكلبت وامي اجتي تركض وعلى راسها العبايه واني بس ابجي وخايفه على اخويه

انمار .. لك انت لو رجال مجان احتميت بالسلاح بس انت واحد عار سكط جبان بس تعرف تتحارش بأعراض الناس

اسكت لا افرغ السلاح براسك
خوله .. يمه ابني دخيلك عوفه وليدي وشتريد احنا حاضرين
انمار ..سكتي يمه شنو شيريد هذا واحد گلب ابن گلب بس يعرف يتعدى على الرايحه والجايه

ميناس .. انگلبت الدنيا والمنطقه وادخلو كباريه المنطقه لحد معرفنا هذا الولد ابن مختار المنطقه واحد ساقط حزبي يوميه اله مشكله وطلابه ولان هو حزبي وابوه مختار المنطقه وحزبي جبير محد يكدر يتحارش بيه واجه جبير المنطقه وكدر يفض المشكله ومااشوف غير امي تلزمني من ايدي وسحل للبيت وتكفخ بنص الشارع

خولة .. كله منج ياحقيره ياصايعه جان اخوج ضاع مني لو صاير بيه شى منو يفيدني انتي

ميناس ..ابجي واحجي والله يوم ممسويه شى هو تحارش وجرني والله
جابر .. شبيج خوله شجاج ليش هيج تأذيها
خوله .. اليوم جان واحد من ولدك مات من وراها الگلبه كتلكم خلي ابطلها المن اداوم هذا الي حصلته من دوامها
جابر .. فهميني ولتعيطين شصار
وبدت امي تحجي لأبويه وفوكاها تزيد حجي وتتهمني اني السبب اني كاعده اسمع وابجي ولازمه شعري الي كطعته الي واشوف عبير خاتله وره الباب تضحك عليه

جابر .. وهي شعليها كلنا سامعين بأبن المختار شون واحد ممتربي البنيه شنو ذنبها ليش تذبين الصوج بيها
خولة .. هاي انت من كل عقلك تحجي اكوله جان واحد من ولدك مات وانت تكول شعليها
وبهاي الاثناء دخلو اخوتي وانمار مضروب بخشمه من وره العركه وكعد ابويه يرزله
انمار .. شتريد بابا اشوف يتحارش بأختي واصفكله

جابر ..ياابني منريد مشاكل انت متعرف الحزبين كتاب واحد منهم يكولون بيه فلان سب الريس يروح ميرجع ذوله ناس متخاف الله
فارس  .. بابا حقه انمار يعني نشوف اختنا يتحارشون بيها ونسكت والله حزبي هذا شون حجي يا بابا
جابر .. اسمعوا والحجي للكل مااريد مشاكل معودت كبرتوا وكلت راح تقل المشاكل والمصايب هلمره تزيد