قطار العمر

البارت السادس والعشرون

قطار العمر
البارت السادس والعشرون
للكاتب غزوان علي

اتندمينه
وجينه نسحل شوكنه
برجل الندامه
وايسينه
وابتعدنه بعيد !!
لاچن طيفهم ضَل
يعتنينه ،
ظلت احجاياتهم
ع البال ما جلمه
نسينه 💔!

سالم .. خاله لتكولين هيج مقامج عالي وعلى راسي اني الي ابوس رجلج انتي مثل امي
ام ولاء .. اذا مثل امك وتعزني وتريدني ما اموت بحصرتي على شباب بتي الي راح يضيع عوفها تعيش وابتعد عنها كول الها انتهى كولشي لان هي متعرفك عوفها اروحلك فدوه
سالم .. احس الدنيا تفتر بيه وراسي راح يطگ شون اعوفها هاي روحي هاي انفاسي
انتم كعد تحكمون علينا بلموت خاله بروح اهلج لطلبين مني شى مستحيل
ام ولاء .. اني بس اكولك شى واحد وانت بعد بكيفك اذا تحبها صدوك وتريدها تعيش تعوفها لان بقائك وياها معناها اني وياك كلها ايام وندفنها بيدينا
سامر .. اني حاس بيك بس هذا قدرك وكولشي قسمه وانت مقصرت خطبتها اكثر من مره بقى بس تحافظ على حياتها
ميناس.. اباوع على سالم يرجف ويتنفس سريع وصاير نار الله يساعد گلبه باوع عليه بعيون كلها يأس
ام ولاء .. اني طلعت بدون علم الحجي ردت بس احجي وياك اجيتك وتعنيت لباب بيتك وبقت يمك اذا تحبها وتريدها تعيش عوفها وخليها تشتم الهوا احسن مما تشوفها مغطيها التراب
ميناس.. طلعو ام ولاء وسامر وسالم كعد بلكاع ويرجع براسه ليوره ويركعه بلحايط
شبيك شجاك راسك ليتأذه
سالم .. سمعتي شكالو وشطلبو
ميناس.. حقهم ما الومهم تبقى بتهم ويخافون عليها وانت شفت ابوها وشفت الي سواه يعني الناس لكعد تبالغ ولا تكذب واكيد ابوها ميعوفها عايشه ماطول هانت عليه مره وحركها ومتندم معناها ماكو اسهل من كتلتها المره الثانيه كولشي بالاول صعب بعدها يصير سهل وابوها اعتبرها ماتت وبأي لحظه ياخذ عمرها وانت مراح تتحمل تشوفها ميته

سالم .. ليش شنو الي سويته حتى يصير بيه هيج اني مردت شى من الله بس تصير ولاء حلالي
ميناس.. كولشي قسمه لمصلحتها لازم تعوفها
سالم .. يعني شكول الها والله راح اعوفج حتى تعيشين واني ابقى محروم منها العمر كله شنو فايده حياتي بعد
ميناس.. مرات نضطر نسوي شغلات منحبها ومنريدها بس حتى الحياه تمشي وحتى انخلي غيرنا يعيش يجوز الله كاتبلك حياه احسن بعيد عنها وهي هم شفتها من يوم علاقتكم ومشافت اي خير كتل واهانات وحرك واشكال البلاوي عوفها سالم خلي البنيه تعيش
عافني وطلع بدون ميحجي اي شى
بليل كاعده وافكر بسالم وضعه ودك التلفون رنيم
ميناس.. ها البلبل الفتان شونج
رنيم ..مو صوجج صوجي اني اخابرج واحجيلك كولشي
ميناس.. والله لو عليه ولا اريد اعرف احد ولا احجي ويه احد بس انتي وفارس المهم شخبارج
رنيم .. زينه خبر عاجل
ميناس.. هههههه مو كتلج متكدرين  شكو غردي
رنيم .. عبير اطلكت
ميناس.. هااا شعجب وشون كدرت تطلك بهاي السهوله
رنيم .. رجلها مسجون واقل شى راح ينحكم مؤبد رفعت القضيه من اول جلسه انحكم لصالحها
ميناس.. يوم الي واوزع چكليت من الفرحه
رنيم .. اذا انت توزعين جگليت اني اسوي عشا لوجه الله بس اخلصي من عمار
ميناس.. أمين وماما شونها
رنيم .. على حطت ايدج كولشي ماكو بس سمعت انمار مخابرها وكايل الها شوفيلي مره اريد اتزوج
ميناس.. يله على الخير خلي يتزوج ويخلصنا
وبعد شعندج اخبار
رنيم .. مؤيد مرته حامل
ميناس.. على الخير ماشاء الله يوم الج وافرح بيج برجال زين
رنيم .. عبير مأذيتني منوس تدخل لغرفتي تلعب بغراضي بلحمر والملابس وحتى تاخذ بدون متستأذن مليت واني اقفل وراها تعبت تكول كاعده بسوك على لحظه انباك مو بيت ابويه ومرتاحه بيه
ميناس.. اقفلي باب غرفتج كل مااطبين واطلعين
رنيم .. والى متى عيشتيش هاي وفوكاها كعدت على گلبي وراح تكابلني العمر كله
ميناس.. لتخافين عبير متبقى بلا رجال اسأليني اني
هااا نسيت اكولج شفت رواء بت حماج صاعده ويه ولد شنو مووز يكطع وسيارته تموت شاف منها وعجبته الزركه
نزلت وسلمت بس هو الحقير كصني كص بعيونه وكال منيلج الحلوه هاي هي كالت مالك دخل وتضحك
ميناس.. ميمي اياج تتقربين من رواء هاي وحده بايعه المستحى وكولشي تسوي مو بعيده تتفق ويه الولد عليج تره هاي تلف ومتهتم حتى لسمعتها
رنيم ..لا يمه اسم الله ولا اتقرب الله يبعدنا عنها
ميناس.. مااوصيج رنيم شكد مابيج ابتعدي عنها
رنيم ..ماشي ليضل بالج اروح ماما تصيحني
ميناس.. روحي الله وياج
لزمني گلبي من هاي الحيه رواء من اخر مره حجيت وياها واني خفت منها صايره متستحي ومتخاف الله يستر على اختي منها