قطار العمر

البارت السابع والثلاثون

قطار العمر
البارت السابع والثلاثون
للكاتب غزوان علي

فتحت الخط واني اباوع بوجهم وكتله
بس ابدل واجيك انتظرني
الصدمه على وجوه الكل كارثه واولهم عبير الي متوقعت اضحي بجهالي لخاطر اتزوج ريسان بينما اني معتبرتها تضحيه لان اعرف ذوله اطفال وسهل اقنعهم واعرف جهالي كولش زين هذا مو كلامهم تصرفاتهم والكلمات الي كالوها اكبر من عمرهم وكأن واحد كاعد يعلمهم شون يحجون
عبير.. يعني راح تعوفين جهالج يرحون
ميناس.. صعدت ومجاوبتها بس على اعصابي حاصره دمعتي وكل شويه اكول اشش لتبجين تنحل لازم تنحل بس المهم ماامشي كلام خوله وعبير واثبت للكل اني صح وكبرت وتغيرت وماارضى احد يتحكم بيه
لبست بنطرون وفوكاها قميص حيل طويل وربطه لفيتها زين والعبايه بيدي لان اعرف رايحين للكاظم ورايه زياره
نزلت لكيت سالم والجهال وعبير بس شافوني وكفو وكأنو ينتظرون شى يتغير او قرار يتغير بس اني حطمت امالهم وخليت وطلعت

ريسان .. مصدكت من خابرت وركض على جراده دخلت اركض لغرفته طفر طفره
حيدر .. ها ولك اجوو
ريسان .. منو الاجو
حيدر .. شمدريني شگلك مال واحد مهزوم كلت اخاف فخخت بيت عمك مجيد وطك ولكفوك واجيت تركض
ريسان .. يمعود يامجيد خلي يولي ولك باجر اتزوج
حيدر .. لا بربك المن
ريسان .. خالتك الشكره هو اكو غيرها ميناس
حيدر.. بهاي السرعه زين وابوك وعمامك غير خطبه ومشايه ونضرب طلقات ونهوس نشكر من عمها وابوها نشكر من كال اخذوها حتى بعدين من تتزوجها تسب نفس العم والاب الي تشكرت منهم
ريسان .. ههههههه لا ولك هي راحت لأهلها حتى تبلغهم وعلى اساس ارجعهاماكو وره كم ساعه اتصلت تريد تتزوجني
بس الظاهر المايك مفتوح لان صدى يمها وحتى صوتها مبحوح مال وحده باجيه يمكن متعاركه ويه اهلها واني كتلها حضري المستمسكات باجر يمج
حيدر .. على الخير والتمام
ريسان .. خير اليصيبك بس كولي شسوي
حيدر .. على شنو
ريسان .. علمود باجر
حيدر .. تاخذها الصبح للكاظم واني ونشوف منو من الولد ويايه نجي وراكم حتى نعقد الكم عند السيد وراها نبوسك نباركلك واهم شى تغدونا كباب من هذا الزين وابوك الله يرحمه ويرحمني وياه لان اكيد راح اكل طن رزايل منه من يعرف رحت وياك بدونه

ريسان .. هاي حياتي واني حر بيها واني مو صغير عمري ٣٣ سنه وهي ٣١ سنه يعني بالغين وكبار ومنحتاج احد ويانه اذا اكول لأهلي اخاف تصير عرضه بيها واذا باجر مرحت لميناس لو جدك يطلع من الكبور مترضى بعد بيه
حيدر .. حقها واكيد متعاركه ويه اهلها واله ليش اله باجر توكل بالله وروح هي موته لو موتين لو موته ام العود ههههههه
ريسان .. ولك سخيف تضل هيج
حيدر .. شبيه اخبل طير حر مثل طيوري لامره اتعارك وياه ودك بوكسيات ولا حب اعاند الدنيا علموده واخسر اهلي هيج خليني مشتري راحه بالي خوما مثلك اطب بمصيبه تطلع بلثانيه وكله من وره النسوان
الحياه بلا نساء كالجنه بلا نار
ريسان .. الله يافيلسوف زمانك
حيدر .. حير بروحك وبأهلك الي الله اعلم شراح يسوون بيك من يدرون وبعدين تعال حير بيه
ريسان .. خلي اروح اغسل السياره واحظر ملابسي باجر
حيدر .. شكو باجر عيد
ريسان .. ولك غير راح اتزوج وثول اي والله
حيدر .. لتنسى فلوس الكباب اهم منك ومنها
ريسان .. لا ماانسى يله اودعناك
حيدر.. الله وياك