قطار العمر

البارت الثامن عشر

قطار العمر
البارت الثامن عشر
للكاتب غزوان علي

(بارت طويل لعيونكم )

تاه حسابنا شنحسب
عليمن تشرح وتعتب
دنيا وضاع بيه الزين
وتساوه الكشر واللب
ناس وعايشه بوجهين
حيره شتكره وشتحب

اباوع على نوال الي مبين من وجهه متحلفه اليه وتباوع بنظرات كلها اتهام سكتت زوجه مرتضى
نوال .. هاي منو
ميناس.. وانتي شعليج جايه لبيتج
نوال .. هم الج عين وتحجين
زوجة مرتضى .. اروح اني تأخرت
نوال ..كملي كلامج شبيه زوجج شيريد من ست الحسن ميناس
ميناس.. نوال مااقبل تدخلين وعوفي المره تروح انداريت على زوجة مرتضى اخذي راحتج وبعدين نحجي
نوال .. شتحجن يمه تتفقن على الرجال المكسر شون تموتنه حتى تتزوجين رجلها
ميناس.. انتي شكعد تخربطين متستحين
جان تطلع مرت مرتضى ركض
نوال .. افلتي وين ترحين وانتي الي مسويه نفسج شريفه وعفيفه ومكافحه ومتحمله ضيم رجلج وبس انتي وبس طلعتي كل البله بيج تصادقين على رجلج والله اعلم يجوز مسويه شى وياه وجايه مرته المكروده اطمطم الشغله

ميناس.. انجبي مااسمحلج تهميني بشرفي مكافي ذيج المره تهمتيني بسالم لا عبالج ناسيتها
نوال .. وينه سالم خلي يجي يشوف الي يوميه متعارك ويانه على مودها وماكل راسنا مسويها بس هي وبس ويزامط بيها وهي اخيس من الساقطه
ميناس.. اطلعي بره لا وحق الله بلابسته برجلي اكطعه على راسج
نوال .. لج هاي عليمن اليوم احرك اهلج كح..
وهجمت عليه تريد تضربني جان يعيط عليها عمار طلع من الغرفه يدفع بلعربانه
نوال كافي
نوال .. تعال ابو سيف شوف مرتك شون لاعبه من وراك وانت رجلك بلشمس مرتك مصادقه عليك
عمار.. لا لاعبه ولا شى ومالج دخل بمرتي
نوال .. يمه انت صدوك تحجي اكوله مرتك مصادقه ومرت الي مصادقته جانت هنا
عمار.. احترمي نفسج واسكتي لتصير وياج موزينه لتصيرين رعنه وافتهمي الموضوع زين
نوال .. شفتهم لا اكيد الضرب خربلك عقلك عمار مرتك شوف على منو لافيه والله اعلم يجوز هي الي دزت صاحبها حتى يضربك كفيلك الله مو نسوان برابيك
عمار.. تسكتين لو اصيحلج سعدون يطلعج دفرات
نوال .. صيحه اقلها رجال بلكت يشوفنا حل بهلبيت المهجوم الي نگلب دعاره وانت تتستر على مرتك مع الاسف عليك توقعت تكولي اسحليها من شعرها وشمريها شمرة الچلاب تالي تسكتني

عمار.. تعالي تقربي
ميناس.. مدري شاورها وهي كامت تبلعم اريد اسمع ماكو
عمار.. اطلعين منا وحجايه زايده مااريد اسمع الي صار كله سوء فهم والمره الي جانت هنا زوجة صديقي واجت تأدي واجب
نوال .. وصديقك يمه بيه شلل مأجه
عمار .. نوال جري عدل تره تعرفيني من اتخبل احرك الاخضر واليابس اطلعين هسه من بيتي وتنسين كل الي سمعتيه ومااسمع كلمه كدام بشر لتخليني اشوفج وجهي الثاني ومالج دخل بميناس انتي بيتج وهي بيتها وكافي مشاكل يله ولي تعبتيني
طلعت وعيونها تجدح نار بس الي صافنه عليه ردت فعل عمار توقعت يطبك وياها حتى والله كلت هسه يسحلوني للشارع
جان يندار عليه ويحجي بأعصاب
عمار.. لا عبالج اتستر عليج خايف من الكواد مالتج بس خايف على سمعتي وسمعه جهالي يكولون امهم موزينه وتره سمعت كولشي كالته المره واذا تردين تولين باجر اطلكج بس اطلعين بلملابس الي عليج حتى جهالج هنا تعوفيهم واياج تخوفيني مره ثانيه بهذا السافل والي صار ارده الج اني هيج تخليني بعيني