قطار العمر

البارت الاربعون

قطار العمر
البارت الاربعون
للكاتب غزوان علي

اكعدي ميناس واسمعي حكمي وكتلج اخذلج حقج وانتم كلكم تسمعوه
ميناس.. كعدت احترام لعمي رغم معاجبني لا اكعد ولا اشوف احد وجان يكول والكل مستمع ومترقب شنو حكمه
ابو ريسان ..مجيد انت بنتك وحرمتك قتلو روح ومو اي روح حفيدي
مجيد .. حجي لتصدك بكلامها
ابو ريسان .. خليني اكمل
مجيد .. تفضل خويه
ابوريسان .. وفوكاها تعدو على حرمة بيتي ورادت تموت مرت ابني من وراهن وماحسبن حساب الدم الي بينا والقرابه وسوايتهن شينه واني مااقبل على الشينه اذا جانت لمرت ابني والي واذا جانت لغيري حتى لو جان الظالم اخويه وعائلته ولو المتعدي زلمه وروح ابويه لا اطره نصين واعلكه باب البيت بس المتعدي مره والمره ماتنضرب بس تتعاقب وعقوبتي عدكم ٤٨ ساعه تشيلون من المنطقه ما اريد اشوف خيال الكم هنا وادفعون دوست بيت ١٠ ملايين
مجيد .. شنو هذا الحكم والله حرام عليك انت متخاف الله
ابو ريسان .. ماجان گلت لمرتك متخافين الله اتقتلين روح ماشافت ضو الله
مجيد .. ماكو دليل على كلامك وكلام مرت ابنك مينوكل بيه اكيد هي تبلت عليهم وبحكم العشاير مامحسوب
ابو ريسان .. وياك بس عندي شاهده وهاي من دم زوجتك روح حيدر صيحها
حيدر .. تأمر حجي
ميناس.. اباوع الوجوه كلها تترقب شيصير وصوت عمي وصوت مجيد الي يدافع عن مرته خابص البيت خبص وحوراء وامها ساكتات بس عيونهن عليه يتوعدن بالاقوى حاسه بيهن اخذلي نطره وارجع عيوني امنيتي الزمهن واركع راس براس الحقيرات وجان اطب مره مشايفتها بس وجه حوراء وامها انگلب وصار اصفر وحده تباوع بوجه الثانيه

قبل بيوم
ابو ريسان .. تعالي بويه مريم شنهي الصار انه لسه ماسمعت كلامج  وين طلعتي وعفتي مرت اخوج
مريم .. كعدت اسولف لبابا كولشي وهو بقى صافن عليه وجان يكولي امشينا لبست جبه فوك التراك مالتي وطلعت وياه وجان نوصل لبيت ام رسل رحبو بينا وخاصه ابويه طارو بيه ممصدكين جايهم وبعد السلام والچايات جان يطلب بابا ام رسل
ابو ريسان .. خويه بلا امر عليك اريد اشوف ام رسل
ابو رسل .. صار حجي
واجتي والقلق واضح على وجهه كعدت مقابيل بابا
ابو ريسان .. سمعي خويه انه والشهاده لله اعزكم وماشفت شى موزين منكم بس من ينداس بيتي وينگتل ابن ابني هاي عيبه علي اذا مااخذ حگها
ابو رسل .. حگك ولوً تريد دم تصير
ابو ريسان .. مريتك مشاركه ويه مرت اخويه وهي طلعت بتي من البيت حتى يخلى الجو الهم
ام رسل .. اني شعليه حجي ليش تتبلى عليه
ابو ريسان .. انه ما متبلى وانتي تعرفين گلش زين كلامي صح وصيحي بتج وهاي بتي ليش بهذا الوكت بلذات خابرتها واكدت عليها تجي
ام رسل.. صدفه
مريم .. بقت تتحجج ويه بابا بالف حجه لحد مااخر شى كال الها
ابو ريسان ..اسمعي خويه انه حكمي صعب والعشيره تصدكني واذا حكمت راح يطولكم حكمي وحتى دوسه بيت ادفعون حالكم حال اخويه اني ردت اطلعكم منها واخليج شاهده بس انتي ماتردين يله بويه مريم نرد للبيت وباجر اي كلام ثاني
ابو رسل .. لا حجي على بختك انت تعرف حالنا وضعنا ولج يمصخمه شمسويه احجي وفضيها
ام رسل.. احجي بس تنطيني الامان
ابو ريسان .. وهاي كدام زلمتج گل الامان الج
مريم .. وبدت تسولف شون اتفقن وياها واجت ام حوراء تتوسل بيها وتحلفها بس حتى يطلعوني من البيت لان مراح يلكون هيج فرصه اجتهم على طبق من ذهب وهي وافقت شرط اذا صار شى هي مالها دخل